【愛情甜故】我同條女敦倫的日子: 告別

「阿豪，對唔住，我要走先一步啦。」

突然我聽到阿欣把聲，打開眼，我就見到佢係我前面，周圍白茫茫一片，睇黎我再次身處在呢個虛無世界。

「阿欣...?係咪真係你?我好掛住你。」

一見到係阿欣後我即刻撲向阿欣攬住佢。

「阿豪，應承我，我走左之後快啲忘記我，唔好再日日為我而喊。」



「阿欣我真係唔捨得你，你唔好走得唔得嗚嗚，你走左我生存仲有咩意思。」

內心有一股壓力湧上使我不自覺地流下眼淚。

「我都好唔捨得你，但我必須要走，我唔係你身邊嘅日子你一定要好好保重。」

「唔好走...唔好走啊!我呢生人唯一最愛嘅女仔只係得你咋，你仲記唔記得你有好多地方想去，我將來會帶你周圍去，我地再睇日落，再坐摩天輪好唔好?我會陪住你。」

「其實阿茹都係個好女仔，你嘅人生仲有佢，淨低落黎嘅日子就由佢代我去晒咁多個地方，你要好好珍惜佢。」



「茹姐根本唔係你，佢唔可以取替你，加上我同佢只係friend黎咋，我淨係會癡實你一個。」

今次一見，我變到成個細路咁十分癡身。

「阿豪，我係時候要走唔同你講住啦。」

「唔好走...我唔會俾你走!」

我攬到阿欣實一實唔俾佢走，但佢個身體慢慢由下至上化成一粒粒光茫飄走。



「我亦要多謝你一路上幫左我咁多，你係一個堅強嘅人，你一定要保重、要好好生存落去。」

好快地我攬住嘅身驅已經冇左。

「我愛你...」

阿欣講完呢三個字就成個人消失係我眼前。
.
.
.
「阿欣!!」

突然我係床上一下紮醒，大叫左一聲，原來呢度係醫院，睇黎啱先嗰個又係夢境黎。

「阿豪，你醒啦?」



茹姐係我隔離慰問我。

「豪哥，你終於識醒，我地已經係度等左你兩日。」

原來阿偉彤姐都係度。

「你地係度等左我兩日?」

「係啊，你昏迷左兩日，我地一直係度陪住你。」

彤姐亦都開口講野。

「咁阿欣佢點樣?」



我問完後大家都沉寂左一陣子。

「你昏迷期間，佢已經係琴日離開左我地。」

彤姐表情頓時表現得十分憂愁。

「你講乜野!?你話阿欣死左...?」

我一時間接受唔到呢個事實，因為對我黎講黎得太突然，就好似一瞓醒覺就傳黎死訊咁樣，眼角不自覺流下淚水，估計我夢境入面見到嘅阿欣就係佢嘅靈魂。

「最衰都係我，係我呢條廢柴冇好好保護到阿欣，我眼白白親眼睇住伯母用刀捅阿欣但我就毫無還手之力，我正仆街。」

「豪哥，你又唔洗咁怪自己嘅，你已經幫左好大忙嫁啦，起碼你都將彤妹佢由屋企拯救左出黎先，你仲要好勇敢同伯母打過，因為佢真係一個好殘暴嘅人。」

「對唔住，我以前仲怪錯左你打左你一拳，原來你以前咁衰都係伯母一手搞出黎，不過你依家同以前真係變左好多，你變翻一個堅強有義氣嘅人。」



阿偉知得咁清楚睇黎茹姐乜都同佢講晒。

「茹姐同你講晒?」

「係啊，佢同我講晒，帶住兩條女逃走咁難嘅任務都俾你完成到，俾著我應該我死左都未帶到佢地出去。」

「出到去又點，最後我咪又係保護唔到佢，仲差啲連茹姐都出事。」

「唔好再怪自己啦，我知你已經盡左力，彤妹出左事個個都唔想，而且係個個都估唔到。」

「仲有一件事，你原諒我我地做翻兄弟好唔好?不過鹹書就冇啦，但我真係好有誠意。」

「隨你啦，做我兄弟點可以唔原諒你。」



雖然阿偉想引我笑，但我笑唔到依然係咁頹。

「兄弟!我地呢世都係兄弟，我當你做翻兄弟嫁啦。」

「咯咯咯!」

阿偉說罷出門就有人敲門入左黎，係個阿sir。

「我想問呢度邊個叫唐富豪?」

聽到我名我緩緩地舉起手，然後個sir就行黎我度。

「我地係你地家屬條屍件衫上面搵到枝錄音筆，佢有張紙黐住指名道姓要俾唐富豪，我過黎就係將佢拎俾你。」