【愛情甜故】我同條女敦倫的日子: 舊地重遊

隔幾日之後佢又叫我陪佢去MK睇衫，

冇錯!對上一次去MK睇衫已經係同阿欣去嗰次，可能我去返個傷心地點都會憶起我嘅回想，不過我亦都想去多次當懷緬下。

「茹姐，呢日又做咩冇啦啦約我出黎睇衫。」

我地係旺角街邊邊行邊講。

「唔係你睇係我睇啊!」



「你成個男人咁仲洗乜睇衫，去街邊求其買年長袖牛仔褲咪算。」

話就話佢成個男人婆咁，不過其實佢都幾靚，只不過串佢就緊要彈下佢。

「頂你又話我似男人，人地lady黎嫁。」

聽到我咁話佢佢即刻又打左我一下。

「哈哈係呀lady嘛...咁你今日想去邊度睇衫。」



「我諗住H&M買，嗰度啲衫平。」

H&M!? 咪去正之前同阿欣睇衫嗰度。

「下...唔好去嗰度買得唔得?」

「頂你你一心都係想我係街邊求其買件姐，我就係要去H&M。」

「唉，咁好啦去就去，依家啲港女話左去邊就要去邊，真係服左佢。」



既然茹姐心意已決去H&M，我都無謂改變佢主意，突然我感到手臂一陣刺痛。

「頂你個肺話我港女!」

我望一望手臂，原來佢大大力mi緊我。

「饒命饒命!茹姐唔好mi，唔好mi係我錯...啊好痛...我啱啱係講靚女先啱，係靚女。」

頂佢mi得咁大力超痛，我只好苦苦向佢求饒，呢啲就係冬天著T-shirt嘅壞處。

「知錯啦下話，下次再聽到你話我似男人港女我就再mi得你大力啲。」

我認錯之後佢先慢慢鬆手，睇黎茹姐唔單止似男人認叻，仲好有尊嚴。

「係嘅係嘅，我地去睇衫。」




一陣控動之後好快我地就到左H&M，一入到H&M佢拿拿林就帶我去女裝嗰邊睇。

沿途我地經過一排排嘅衫，聽住間舖播緊嘅英文歌，令我亦跟住細細聲哼左幾句，

當我地經過某一排衫嗰陣，有一套衫係令我覺得特別顯眾，

「呢套衫靚喎，我極力推薦，你買得過。」

我係側邊拎左套全"綠"色套裝俾佢，一件綠色布質長袖，一件綠色短裙，仲有頂綠色帽。

「頂你啦，你係邊搵到呢套出黎?呢套俾你日後條女著就啱。」

「哈哈，綠衫綠褲綠帽綠左，日日一身綠住出街幾唔錯。」



「你係咪想買姐，男裝嗰邊都有喎，要唔要我陪你去買?」

「今日你睇衫唔係我睇衫。」

「咁就放低佢啦，唔好整污糟左人地件衫。」

既然玩完佢之後我當然都要放返件衫，然後我地就繼續睇衫，

最後佢竟然睇中左一件啡色長風褸，風褸中間兩邊都有一排大鈕，著起身成個偵探咁，我當然都不自覺地恥笑佢。

到佢買完件風褸之後我地就行出左H&M黎到人來人往嘅街道，

當我地係人群中行左冇幾耐佢突然向前仆左仆，原來佢俾人踩到條鞋帶甩左。



「乜你條鞋帶咁長嫁，你差啲俾人搞到仆街。」

俾我斷正佢柒左，即刻冇野好講。

「我地行埋一邊先啦，我幫你綁一綁鞋帶。」

然後我地行到去一個少人嘅位置踎低幫佢綁鞋帶。

「嗱，我依家就幫你打個雙蝴蝶結，我保證你唔會再甩。」

而佢就好鎮定地企住望住我幫佢綁鞋帶，直至綁完佢先講野。

「好，搞掂。」

「點解冇啦啦變得咁好人幫我綁鞋帶?」



「舉手之勞姐，唔通想見住你仆死咩。」

「我自己綁咪得，洗乜要你幫我綁，不過都要向你講聲唔該嘅。」

唔知點解佢講呢句嗰陣係微笑住個頭係擰側黎講，而佢塊面亦都紅晒。

「你知你呢啲港女嫁啦，緊係連鞋帶都唔識綁，再加上你咁懶更加唔會綁雙結啦，我唔幫你綁仲可以搵邊個幫你綁。」

「仆街啦你，又話我港女。」

當我快言快語講錯野之後，佢即刻又大大力mi我手臂。

「啊...唔好mi，我錯我錯，我講錯野，好痛...啊...」
.
.
.
俾佢mi完痛左一陣後，我地就係條街上繼續行，行左不久突然前面有個著得幾文青嘅女仔行近我面前。

「先生，阻阻你花5分鍾時間幫我填一填問卷啊~好快嫁咋。」

原來係想搵我填問卷，出街周不時都會見到呢啲人，不過慶幸老子依家得閒就幫你地填一填。

「好啊!」

「唔該晒!」

然後佢俾左部i-pad我填，為左省時所以我全部都揀左十分同意，相信好多人都會咁做，唔只得我一個咁做，

因為我係鳩填所以唔洗兩分鍾就填完，當我準備遞返部i-pad俾佢時，佢又講左一句。

「你可以俾埋你嘅女朋友填喎，阻多你幾分鍾。」

女朋友!?佢幾時變左我女朋友。

「好啊!」

正當我想辯駁之時，茹姐就諗都唔諗答應左佢，而茹姐就咁由我手中拎走左部i-pad黎填，

直至幾分鐘過後佢亦都填完，遞返部i-pad俾個女仔之後我地就離開左，

「佢啱先叫你做我女朋友喎，你唔駁佢嘅?」

「算啦佢都唔知，一男一女出街多數都會俾人當係情侶。」

「情侶?我地friend黎嫁咋，佢地諗多左。」

「係囉，我地friend黎嫁咋，邊個想做你女朋友喎。」

「係囉，我都唔會同個男人婆一齊啦哈哈。」

「又話鳩我頂你。」

當我一話佢佢又打左我幾下，真係掌掌到肉，搞到我手臂紅晒，著短袖真係慘。