【愛情甜故】我同條女敦倫的日子: 出外遊走1
自從識左黃芷茹之後，我發覺佢都係個好玩得嘅人，有時更覺得佢份人有啲過份落觀，亦知道佢住我屋企附近，所以約出黎會比較方便，
每次約佢出黎玩少少事都可以笑一餐，笑點十分低，明明一樣悲觀嘅事都可以表現得好樂觀，同埋佢已經廿歲人但心智仍然表現得好唔成熟，
佢仲同我講做每樣野都樂觀面對就唔會再驚遇上任何困難，仲會有時開解下我講下道理，
我心諗做人點都會有低潮嘅時候，就好似俾人昆左一皮野走唔通仲好開心咁同人講自己俾人昆左咩，
不過阿欣身邊有呢啲朋友都好嘅，起碼唔會帶壞佢先，而我亦都已經當左佢係我身邊幾好嘅朋友，唔單止做gym，仲會成日都約出黎玩，
話就話我同佢唔係識得好耐，但出奇嘅係又幾啱傾，正常女仔都唔會咁快同個陌生人傾得咁熟掛!?
而呢段日子我已經將我以前同阿欣嘅經歷一五一十講晒俾佢知，包括J痕、心魔、性慾強都講晒佢聽，佢聽完之後都俾我嘅經歷嚇親，可能連佢都估唔到我以前咁衰，
然後佢竟然識同我講人誰無過，仲將我同啲釋囚比較，同我講依家做返一條好漢就唔洗再諗返以前過去嘅野，叫我唔再為過去嘅事而愁。
而今日天氣幾好所以我地就約出黎行山，
「喂阿茹姐，做咩帶我黎行啲泥路，咁L污糟。」
冇錯!今日佢係帶我去行"真正"嘅山路並唔係石屎路。
「你知唔知呢啲先叫享服大自然，感受最原始嘅山路。」
我倆著住長袖衫沿住一條好窄嘅山路行緊，而佢更著住條運動緊身長褲係前面帶路，凸顯佢pat形嘅線條。
「得閒行下嘉頓山咪算囉，嗰度風景幾靚。」
「你以前先同張倩欣去完，費事憶起你傷心事啦。」
「加上嗰度先得幾步路行得有幾耐，你話最近有啲潺緊係要做多啲運動行多啲路，你應該要感激我帶你黎行。」
「我...我不知幾強壯邊忽潺。」
可能我遺傳左老母，原來有時我都鍾意呈強，所以我決定爬佢頭行快過佢，我唔可以食女人塵。
「我依家就行快過你，睇下邊個潺啲。」
好快我就由佢側邊爬左佢頭，沿住一啲石頭路微微直上。
「頂你爬我頭就話我潺，唔得，我要爬返你頭，等你咁得戚。」
然後佢跑住咁由我側邊爬左我頭，原來茹姐佢仲呈強過我。
「你好似好唔輸得咁喎，哈哈。」
我見佢再爬返我頭我就冇再爬返佢頭，淨係笑佢好唔輸得，佢快我5米左右。
「姐姐平時行山仲多過你食飯，你最好跟實我唔好快過我。」
茹姐爬我頭後就倒後行命令我，當正我係細路咁唔俾我快過佢，我也是無奈地望住佢。
「你唔跟實我就會盪失...」
佢話未講完隻腳就KICK到舊石頭向後仆低左落泥地。
「哈哈哈，咁鍾意呈強今次仲唔癩野。」
到佢仆低左我當場立即由無奈變為恥笑佢，真係睇人仆街最開心。
「起身啦，唔笑你啦，我唔鍾意笑人。」
直至我行到埋去我遞隻手俾佢抓佢起身，見住佢怒啤我我唯有忍住笑，然後佢就抓住我隻手起翻身。
「你睇下你一仆街條褲就污糟晒，好彩啲泥係乾嫁姐。」
我見佢條褲咁多泥跡所以我拎出隻水諗住幫你抹一抹。
「驚唔驚凍啊，驚就忍住啦。」
然後我將支水濕濕我條毛巾就直接慢慢抹走佢條褲啲泥跡。
「拎紙巾抹算啦，整污糟晒你條毛巾。」
「唔緊要啦，毛巾抹會抹得乾淨啲。」
直至我幫佢抹晒啲泥跡我先收翻埋條毛巾同支水。
「唔該晒...」
「唔洗客氣舉手之勞姐，好心你下次行路就帶眼唔好再咁得戚，知唔知?」
我拍拍佢頭。
「知啦。」
然後佢明顯地已經放慢腳步同我行。
「係呢，點解你會咁鍾意張倩欣?」
茹姐突然做咩問起我呢啲問題!?
「咦，做咩你轉性啊?冇啦啦問埋我呢啲問題嘅。」
「我都係好奇問下姐，認真啲答啦。」
「OKOK! 其實我咁鍾意阿欣係因為佢真係好好，佢人又靚又識關心我又夾得黎，當我做左咁多對唔住佢嘅事佢都會包容我，阿欣俾到我一種特別嘅感覺，所以我真係好鍾意佢。」
「咁...我呢?」
「你同佢緊係冇得比啦，你咁鍾意呈強成個男人婆咁，邊有女仔好似你咁鍾意呈強嫁，哈哈。」
「頂你啦，話我似男人婆。」
聽到我咁話佢佢即刻拍左我頭一下。
「唔係咩哈哈。」
「你就男人婆，我不知幾斯文幾靚，大把仔想溝我。」
「係就好啦，出pool請我呢啲單身狗食飯。」
然後佢就怒啤我一下。
「係呢茹姐咁你呢，點解你成日都可以咁樂觀?又咁快可以同我呢個陌生人熟絡?又會開解人?」
「唔怕話你聽，其實我將來想做個社工，所以我好鐘意識新朋友同陌生人傾計，又會做下人地樹窿開解下人，同埋與其苦口苦面過日子倒不如樂觀啲日子仲好過啦。」
原來茹姐佢第日係想做社工，有樂觀性格都唔出奇嘅。
「原來你第日想做社工，呢份工唔錯喎，你做我樹窿得唔得?有乜事搵你呻就得。」
「其實我已經係你樹窿啦，前排你講晒你以前啲經歷出黎我有認真聽。」
「不知不覺原來就做左我樹窿，哈哈。」
「我覺得每個人都係，只要將心入面嘅不滿呻晒出黎就唔會再咁唔開心，成個人就會鬆晒。」
「去做心理醫生啦黃芷茹，你唔做晒左個位。」
「講笑咩，要攞牌嫁...」
就係咁，我地繼續我一句你一句咁行山，同佢傾計真係乜都可以傾一餐，
呢位朋友真係識得過，可能連個天都唔想我再頹落去，所以就派左茹姐黎開解我。