愛是恆久忍耐: 第六十五章

第六十五章

當我食完個啖之後，Ashley又再次專心咁搣番薯皮。

如果佢個一刻繼續望住我的話，我會尷尬到想在巴士站掘個窿跳落去。

為免佢繼續對我嘅餵食行為，我伸手接過Ashley手上嘅紙袋，然後拎淨低嗰一條番薯出嚟，連埋皮一啖就咬落去。

「喂，番薯一定要摵皮唔可以連皮食㗎！」對於我連皮食呢個行為，佢感覺到好驚訝。





對於煨番薯一直都連皮食嘅我嚟講，搣皮呢個行為係一件好麻煩嘅事，而且根據我嘅觀察，唔搣皮就咁食嘅唔係單單得我一個人。

「唔搣皮食有咩問題？餐廳薯角都有連皮上，大家都係照連埋皮去食。點解薯角可以連皮食而煨番薯唔可以連皮食。」

「咁餐廳會洗下個薯仔，煨番薯你都睇下佢嘅皮都黑曬，咁污糟冇人會連埋皮一齊食。」

佢講完之後一手搶左我手上面條番薯，然後放返落紙袋入面。

本身我想反駁餐廳薯仔佢都冇親眼睇到人洗，但我最尾都係將想反駁嘅說話吞返落肚。





之前咬左兩啖嘅番薯好快就俾佢搣好皮，然後佢遞俾我示意食佢手上個條先，然後佢開始將淨低個半條番薯搣皮。

「你唔係肚餓咩？食完先再慢慢搣都唔遲啦！」

「唔洗理我，你食住我個半條先，我搣完手上呢條會食㗎啦！」

雖然佢口講唔洗理佢，但我決定在佢兩手唔得閒嘅時候，親手餵返佢食我手上條番薯。在餵佢食左幾啖之後，佢都剛剛好搣好曬皮。

同佢相比，我其實重未好餓，所以我叫佢食左先，到食唔曬先俾淨低嘅番薯俾我。





「唔得，咁樣咪變到我好似好大食囉，一人一啖食啦！好食嘅食物同人分享係美德嚟。」

結果我同佢一人一啖好快就清曬個袋番薯。

觀塘泳池呢一個巴士總站，唔知點解一到冬天就會特別凍。

呢一刻我哋手上面最溫暖嘅野，己經落曬我哋胃度，所以經過寒風再吹一吹嘅情況之下，我同Ashley兩人個人都凍到不停打冷震。如果我等個架巴士再唔到嘅話，隨時暈喺度都似。

因為等車位置十分空曠，Ashley同我講想將食完嘅番薯紙袋扔走，然後佢走去搵垃圾筒。因為佢希望一陣唔洗拎住件垃圾上車, 同埋想跑去垃圾桶呢個輕微嘅活動的情況之下，令自已個身可以暖啲。