愛是恆久忍耐: 第六十四章

第六十四章

未行到去巴士站，煨番薯嘅氣味就撲鼻而來。

Ashley的眼神一路行一路睇住個小販，佢兩隻就好似見到寶物一樣閃閃發光。

我先醒起佢去到Cafe之後只係冇食到任何食物，好快就瞓左，我諗佢呢一刻應該好肚餓。

當我經過炒緊栗子嘅手推車旁，我停低然後買左一條煨番薯。





Ashley同我行到等車嘅巴士站度中，除低左手套拎住個裝住煨番薯嘅紙袋，兩隻手發力一屈就拗斷左條番薯，然後將紙袋裝住個半條番薯交左俾我。

「趁熱食呀！天寒地凍嘅天氣，食返一啲熱嘢個人會特別感覺幸福。」因為啱啱在炭爐拎出嚟有咁上下熱度，所以佢一面對住條番薯吹氣降溫。

我隔住紙袋都感受到條番薯有返咁上下嘅熱度，所以我忍唔住問佢。

「你啱啱“赤手空拳”撕開條番薯你唔覺得好熱嘅咩？你用個紙袋嚟隔熱啦！」講完我將手上包煨番薯交俾佢。

「我隻手啱啱凍嘅時候拗斷佢個下唔太覺得佢熱，宜家先感受到佢嘅熱力。」佢將自己手頭上個半條番薯扔左落個紙袋，然後再捧住個紙袋吹氣。





一段時間之後，佢急不及待拎起其中一條番薯咬落去，然後臉上立即呈現滿足嘅笑容。佢呢個笑容，我諗係自從我撞車之後最發自內心嘅笑容，而我亦因為呢一個笑容而睇到呆左。

突然之間一種炙熱嘅感覺傳到我臉上，令到我從發呆狀態恢復正常。然後我見到Ashley拎起裝番薯嘅紙袋貼住我塊面。

「做咩要咁做呀？」見我恢復正常之後，Ashley拎開左熱辣辣嘅紙袋，然後我用自己因為寒冷天氣而冰凍嘅手，為自己塊面去降溫。

「鬼叫你唔理我呀！」

「我幾時有唔理你？」對於佢話我冇理到佢嘅指控，我完全摸不著頭腦。





「重話冇，我嗌左你幾次都應我重唔係冇理到我咩？」

「我可能啱啱諗緊野，所以冇應你啫，你嗌我做咩？」

「個番薯凍冇頭先咁熱，我想叫你快啲食，點知你嗌左你幾次都冇反應，所以我先會拎袋番薯叫返醒你。」

「係嘅，我分左心唔好意思。」我講完之後就想伸手入紙袋拎條番薯出嚟食。

「你食我呢舊先啦！我啱啱好搣咗層皮。」

講完呢句之後，就將佢手上面搣好皮嘅番薯伸到我個咀前面。

當我咬左一啖之後，突然間醒起佢之前都咬左一啖，一諗到同佢間接kiss之後，我覺得自己身上所有嘅血一下就湧到上個頭，塊面感覺到勁㷫烚烚。

我好慶幸香港冇落雪呢回事，如果唔係啲雪一接觸到我塊面，我諗我嘅體溫可以令到接觸到我嘅雪立即蒸發出一團熱氣。