愛是恆久忍耐: 第三十三章

第三十三章

當我擘大眼嘅時候,我發覺眼前有一團強光射住我。 

我諗緊呢團光,係咪就係臨死體驗所講既走馬燈。 

當我對眼習慣左團光之後,我望向四周發現自己身處醫院,而唔係天堂。(我呢類無神論人士,就算死左,等緊我既都可能係地獄而唔係天堂。) 

既然我未死,我第一時間就想檢視一下自己既傷勢。 





睇電影同電視劇既時候,通常撞親車既演員,第一時間都會想抬起隻腳,之後發現自己撞完車之後,下半身癱瘓或者截左肢。 

我醒返之後,都下意識去抬起隻腳,點知我真係抬唔起隻腳,其實唔止隻腳,我其他身體部分好似都抬唔起。 

我第一時間心諗今次仆街啦,做乜撞一次車我竟然全身癱瘓。

 正當我為咗下半生都要響張床上面度過,悲傷難過嘅時候。 

我聽到Ashley把聲喺我耳邊響起。 「你终於醒啦!」 





「我訓左幾耐呀？」
 
跟手佢望一望病房入面個鐘,我又跟住佢睇一睇個鐘。

 個鐘時間係11：00,出面個天重咁光,原來我暈左既時間只係一個鐘頭多少少。 

「炒個車我都只係訓左一個鐘頭多少少,我身體都幾強壯。」我講完之後都覺得自己個Gag好爛。 

「邊個同你講話你瞓咗一個鐘頭呀!你條死仔瞓咗一日啦!」





「一日？我約你十點宜家先得個11：00點會訓左一日呀!」我一邊講一邊心諗,估唔到Ashley都幾幽默講呢個笑話去呃我。 

「宜家係12月25日既11:00,咁都唔係訓左一日?」

 事情遠遠超出我既想像範圍,俾車撞一撞竟然暈左一日。 

「所以你喺醫院等左我一日?」

「冇呀,撞你個司機報完警,救護車到場既時候,我同救護員講我喺你朋友,最後就跟埋救護車送完你入院,咁岩個時阿康打電話搵你,我接左你個電話同佢講你既情況,之後佢就叫左你屋企人過嚟醫院,跟住我在醫院逗留一段時間就走左。」

「對唔住!我冇留意睇燈就衝左出馬路。」


「我都冇受傷,講咩對唔住,不過醫生話你落地個下撞親個頭,所以照例要住院觀察兩三日先可以出院。」 





「我個頭撞到但點解我好似全身都郁唔到?」我講完之後又再次嘗試郁動全身,但都係郁唔到。 

「醫生冇講到有呢個情況,但我可以問問姑娘睇下佢會唔會解釋得到。」講完之後Ashley就轉個身行出去病房。 

假如我真係真係全身都郁唔到既話,我都唔知應該點算好。