愛是恆久忍耐: 第二十七章

第二十七章

我屋企同學校既距離其實好近,平時我勁唔鍾意返學放學例牌會塞車既情況,係呢個moment我最想佢塞車既時候,竟然十分暢順,所以我可以同Ashley平排坐既時間非常短暫。

返到屋企老媽子竟然唔喺屋企,所以間屋只係得我同Ashley兩個人。

雖然好耐之前廣告有話孤男寡女獨處一室,女仔實有損失,但係我真係冇膽向Ashley做出任何不當行為。(關於呢句對白,係一個蒸餾水廣告嚟嘅,大家有興趣可以搵下。)

本身Ashley應該拎完嘢就會走,點知佢臨走嗰一刻,俾佢見到我屋企一部W字頭遊戲機。





「你屋企原來買咗呢個遊戲機呀？我屋企人唔畀我打機㗎,你可唔可以開俾我玩下呀!」

「部機駁好咗㗎喇,你鐘意隨時可以玩得。你想玩咩game？一係你自己去揀下。」 講完之後拎咗一大疊嘅遊戲game出嚟等佢選擇。

「一個人玩好悶呀,有冇啲game可以畀我哋兩個人一齊玩㗎？」

「有呀,呢隻party game可以畀兩個人玩㗎。」我喺堆game入面抽左一隻party game出嚟。

「咁既然你介紹得就玩呢隻game啦!」Ashley仲未等開機就急不及待拎住個手制。