我比一個籃球追殺: 你究竟係咩

我見周圍無人，決定踎低睇真啲個籃球。
紅卜卜，好似血咁紅。其他野無咩特別。我伸手指摸左一下，黐笠笠，隻手指仲黐左啲好似血咁紅卜卜杰pat pat既不知名物體，聞落仲有陣怪味。
我昅實個籃球，愈昅得耐我就愈feel個籃球都昅緊我。
我好似shot左咁同個籃球講野︰「你真係一個普通既籃球？」
佢顫左一下，我估呢個就算係佢既答案。
我又問︰「你跟蹤我？」
我真係覺得自己痴線架，竟然好似審犯咁審個籃球，但係我見到個籃球居然好似點左一下頭。
呢排係咪讀書太大壓力呢，竟然覺得自己可以同個籃球溝通。
個籃球開始彈下彈下，發出我聽到嗰啲拍波聲。
我盡地一搏︰「講，你究竟想點！」




佢反轉左自己，用個背脊對着我，然後，嗰度裂開左一個半月形既開口，入面黑媽媽，我睇唔到入面有乜野。
佢唔係…對着我笑呀嘛…