人渣誠自傳（完整版）: 三
之前講得唔清楚，係我問題，唔好意思。我所講既IES分組唔係分組做一份，而係揀同一條題目既人一齊揾資料，傾下點做。而學校就會派份「預備工作紙」比我地，要係上學期完既時候交。
其實我校有大概三分一人都揀「三堆一爐」，咁啱編左我地六個一組，所以巧唔巧合真係見仁見智喇。
入返正題先，分組坐低之後，Hi Hi，仲靜過圖書館。平時我地上通識堂就一定訓到死左咁，分組就傾到落堂為止，但今日我同振威一句聲都冇出。唯獨阿偉一個主持大局，分配工作，真係好型。
「唉，完全唔敢同佢講野啊。」放左學之後，振威話。
「我咪又係...」
其實係我唔理Heidi，我好驚又走音。但我又好想同佢講野，真係好亂啊，好亂啊!!!
「放開啲啦，都過左去喇。」阿偉拍一拍我。
阿偉講野就係咁玄，精簡，但又洽到好處。佢講得啱，好多野過左去，就由佢成為歷史啦。Heidi如是，張彥琪也如是，總要放低。
個日之後，每逢通識堂，我嘗試同佢地講野，包括張彥琪。我地組既關係都越黎越好，當時whatsapp興起，我地都開左個group吹水。
我亦係振威同阿偉既支持下，鼓起勇氣，私底下whatsapp左Heidi。
「Hello!」簡單一個英文字，原來send出去要咁大勇氣。
「Hi，揾我做咩啊?」
Hi Hi喇，係呢，揾佢做咩呢?最主要都係想媾佢囉，但冇理由咁同佢講架。之後我諗到學生時期萬用既問題...
「做哂功課未啊你?」
「未啊，仲差份通識啊」外加一個嘆氣既emoji。
「咁啱既，我都係wor...」其實我根本冇做過任何功課。
跟住，我地傾下大家既興趣，佢鍾意食咩，大個有咩夢想之類，一傾就傾到兩、三點...係咪好小學雞呢?但當時既我覺得，好幸福。
之後既兩個月，我同Heidi都有繼續保持聯絡，每晚都會whatspp傾計。最近，佢仲話想同我傾下電話...
「喂~」把聲真係好好j。
「喂...」除左喂返佢之外，我唔知仲可以點應佢。
「你做緊咩啊?」
「冇啊，係呢，其實點解你會想傾電話既?」我問。
「因為我想聽下你把聲囉~」
嘩Hi，係咪即係媾我咁既意思啊!?
「...」
「講下笑咋，見你whatsapp成日都咁遲先應，咪想傾電話囉」佢話。
原來如此，有陣時打LOL打成粒鐘，你都知架啦，一個專業既電競選手，係唔能夠分心。所以有時佢揾完我，我會隔成粒鐘先佢。
「你唔會介意架可...?」Heidi細細聲問。
「點會呢，我不知幾想。」
「吓...?」
Hi Hi，講錯野!
「冇，我話唔介意姐!係呢.....」
傾下傾下，我地傾到凌晨五點幾，第二朝仲要返學，緊係唔夠精神啦。至於傾左啲咩，向左走向右走記得咩...我諗返轉頭，都唔知點解可以傾咁耐。
訓得個兩個鐘，又要起身返學，唉。第一堂就係通識堂喇，我地六個坐埋一齊。我望住坐我對面既Heidi，今日既佢，黑眼圈好大，但都仲係咁靚。
「嘩!Heidi你黑眼圈咁大既?琴晚做咩黎啊?」坐佢隔離既巧婷問。
「咦!你個黑眼圈都唔差喎!」振威問我。
Heidi望一望我個黑眼圈，我又望一望佢個黑眼圈，互相對視數秒後，輕輕一笑。嗚呀!!!好美啊!!!!
依種只有我地兩個先知既感覺，好甜。
我諗，依種就係戀愛既味道。
「死仔包，從實招來!!!!!」Lunch既時候，振威衝埋黎。
「乜料啊?」我問。
「仲扮哂野!!!?朝早通識你同Heidi眉來眼去咁，我同阿偉見到哂啦!!」
阿偉冇出聲，點一點頭。
「Hehe」一諗起今朝既事，我情不自禁地笑出黎。
「Hehe!!!!??講!!!!!!!」振威再次逼供。
我亦冇隱瞞既意思，一五一十講哂比佢地聽。
「叻仔，做到野。」阿偉豎起拇指。
「咁你仲等咩啊?明對你有意思啦，上佢啦。」振威話。
雖然我都覺得自己有機，但係，毒向左走向右走最忌係咩丫?就係自信，太有自信既話，容不易變到阿舜咁啊。萬一我會錯意咪瀨哂野!?
「機會，要把握。」阿偉同我講。
我信阿偉，但我又好怕Seven。究竟去唔去馬好呢?去?定唔去?
如果去既話，要點去呢...?
我內心不斷重複依幾個問題，一直到放學返屋企，完全冇停過。就係我萬般苦惱既時候，我撞到佢...
「Hi，咁啱既。」
「有幾啱啊...我住你對面架。撞到有幾出奇?」張彥琪道。
自從我地同組之後，我開始同返佢講野，但都只係見到面會打招呼既程度。話時話，我都好耐冇試過係屋企樓下見到佢。
「係呢，你係咪鍾意黃曉玲啊?」即係Heidi。
「你點知架!?」我比佢嚇一跳。
雖則話大家講返野，冇以前咁尷尬，但亦未至於熟到問對方既心儀對象。所以，我完全估唔到佢會咁問我。
「你地兩個今日眉目傳情得咁明顯，想唔知都難啦。」係喎，我地同一組架喎。
「真係咁明顯咩?」我紅都面埋。
張彥琪兩眼望到我實一實，問:「你想唔想媾到佢啊?」
吓!?關你向左走向右走事咩!!!
正當我諗住講出口既時候...
「我可以幫你媾到佢。」
張彥琪既視線一秒都冇移開，我知道，佢係認真既。
「係真唔係啊你?」我問。
「信我，你就一定媾到。我係女仔，我一定比你更清楚女仔既心理。」佢話。
雖然佢曾經呃過我，但佢不無道理，而且我又想媾到Heidi。於是，我半信半疑咁，聽佢既意見。點知係往後我先知道，依個決定，好錯。
「好，我信你。」