【愛情/輕甜】☺我的鄰家女孩☹: 十四、〈 便飯 〉

 十四 、〈 便飯 〉 

19:30 

再次黎到雪瑩嘅屋企 

伯母遞左杯熱水比我，叫我等佢煮好飯。 

仔細觀察，唔知係咪我錯覺，雪瑩屋企嘅家庭照特別多，不過全部都係細個嘅佢，係我熟悉嘅佢。 



學生相、屋企相、玩千秋 

咦? 呢個咪就係我地細個一齊玩嘅公園? 

望住想中熟悉嘅地方同笑容，我心入面隱約有種刺痛感。 

個公園以前嘅大千秋、鐵滑梯一早已經因為怕危險而拆左，依家香港都唔知邊度仲有呢兩樣野，唉…   


桃花不依舊，人面也全非... 




「食得飯喇!」伯母係廚房叫道。 

我都自動自覺幫下手搬D餸出黎。 

鹹魚蒸肉餅、蝦仁炒蛋、炒菜心、薯仔炆雞翼、紫菜豆腐湯 

四餸一湯，白飯任裝 但係兩個人食好似有D多…? 



「冇咩好野招呼你啊下，不過隨便食啦唔洗客氣!」伯母抹左兩下額頭嘅汗。 

「… 唔係話雪瑩唔係度食咩? 都買左咁多嘅?」 

「哦… 係啊，我都係買完先知啊瑩今晚唔翻黎食，所以咪順便叫你過黎一齊食囉~」佢笑笑口咁講。 

「黎ㄚ~隨便食~講下呢排你同雪瑩有咩進展啊!」 

伯母打開電視，做緊 愛․回家  

我夾起舊薯仔放落口，果然唔同老母煮係唔同味，伯母煮嘅好似比較淡味。 

「其實… 佢冇理過我…哈哈」我其實有D唔好意思，所以越講越細聲。  

「哎呀!做咩唔追出去啊潮偉~ 啊軒仔你講咩話?」睇黎伯母幾中意睇 愛․回家。 



「冇! 我話伯母你整D雞翼好好食之嘛~」  

佢望一望我個碗 

我望一望佢望我個碗   


仆…     


伯母突然面色變得嚴肅  


點解我咁失策!周浩軒你個on9仔!   




佢深深嘆一口氣  

「啊瑩成日都突然話唔翻黎食飯，所以屋企成日得我一個，都好耐冇聽過人讚我煮野好食喇…」 

我即刻夾多舊炒蛋塞入口 

「真係好好食架伯母! 要我食多碗飯都得啊!」 

伯母微微一笑，又夾左D肉餅比我。 

「鐘意就食多D啦~」   





食完飯，好飽，真係好飽 

不過伯母又切左生果比我 無理由唔食嘅… 


「係呢，雪瑩依家有冇讀書架?」我揸住舊橙隨口問。  


其實都唔算隨口嘅 我真係唔知佢依家做緊咩 

上次啊Nick帶佢黎飯局啊Nick都淨係話同雪雪係中學同學介紹 

點解雪瑩會鐘意啊Nick呢D花花公子…  




「啊瑩依家全職做sales啊，隔離街口間寵物店之嘛，佢話店主對佢好好，每個月都有比勤工獎佢…」 

「每月啊瑩會比萬五蚊家用添! 」 


 萬五??? 

咁多???  

做Sales最多咪萬幾蚊一個月，當你真係有勤工獎都好似誇張左少少? 

莫非雪雪將賺翻黎嘅錢全部都比曬伯母? 

「佢成日都嫌我用埋曬D舊野…上禮拜比左部咩「埃風十」我，我都唔識用嘅… D字又鬼死咁細，都係我自己部舊機好D…」伯母攞左部機出黎比我睇。 

「其實…字呢有得較大細架!不如我幫你?」 

我兩三下手勢就搞好 

「你睇下夠大未?」 

「啊~軒仔你真係識好多野，讀大學果然唔同D!」 

「啊哈哈…簡單野黎遮…」  



.
.
.


 ------------------------------------------------- 

Yingying.ptgf 

13posts 546followers 1following  

168cmGemini

歡迎DM 

-------------------------------------------------
 
 
 
 
 Message     



 -------------------------------------------------
Ivonne? 

-------------------------------------------------