90後的初戀——五十年後嘅我，叫我向佢表白。: 【九】

落堂嘅時候，我見到羅佩思同一個男仔一齊行，而個男仔仲幫佢拎手袋。
 
「你真係唔駛幫我拎架啦，我依家好翻好多啦。」
 
「唔得，妳血壓過低到上堂差啲暈喎。我同妳入去Starbucks坐低休息下啦。」
 
唔知點解，直覺話我知，個男人係狗公。所以我就偷偷地跟住佢哋入去。
 
「妳男朋友呢？唔見佢接妳放學嘅？佢唔知妳呢排病病地咩？」個男仔買咗杯熱茶畀佢飲。
 




羅佩思只係苦笑咗下，冇講啲咩。原來羅佩思病咗？點解同佢一齊住嘅我反而唔及一個同學清楚？
 
「佢點做人男朋友架，尋晚見你Facebook啲相，妳居然仲病住煮飯佢食，仲係咪男人嚟架？妳哋一齊咗好耐架啦？」
 
「嗯……其實……」羅佩思繼續苦笑住咁回應，「佢唔係我男朋友。」
 
唔知點解，聽到佢咁樣講，我忽然有啲心痛。如果，我唔係佢男朋友，我憑咩要佢一直照顧我呢？
 
「吓？即係佢一直纏住妳？咁妳需唔需要我幫妳趕走……」
 




「係我纏住佢。」羅佩思有少少眼泛淚光咁講，「尋日發生咗啲事，令到我明白呢點。」
 
狗公冇再講啲咩，眼定定咁望住強忍淚水嘅佢。
 
「但係，我唔會後悔。只要佢過得幸福，我就幸福。」
 
「妳……真係傻。妳係個好女仔嚟，其實啊，我哋英文系好多男仔都對妳有意思架，好似Johnny同Kaiser咁，如果有日妳累了，咪考慮下佢哋囉。」
 
冇幾耐，佢哋就企起身走，而我就去咗上堂。
 




 
 
「嗨。」下一堂嘅時候，我又撞到黃子霖。身邊嘅大學朋友見到有熟人同我打招呼，就慢慢行開。
 
「妳又自己一個人啊？」我環顧四周，都唔見有人企黃子霖身邊。
 
「嗯，暫時未識到朋友。」黃子霖有啲尷尬咁講。
 
「冇住Hall咩？冇去Ocamp？」我扮到好隨意咁問。
 
「我男朋友唔鍾意。」佢壓低聲同我講，眼神有啲閃縮。我認真一望，先發現原來佢比以前消瘦咗好多好多。
 
「我介紹朋友妳識啦，呢位係Jason，Ashley，仲有……」我拉佢埋去我班朋友身邊，介紹大學朋友畀佢識。
 
「啊……」正當我拉住佢手腕嘅時候，佢慘叫咗聲。其他朋友就有啲嚇親咁你眼望我眼。




 
「妳整親？」我捉住佢隻手問，佢想縮走，但我唔放。
 
身邊朋友察覺到氣氛尷尬，就識趣咁入咗Lecture Hall霸位先。
 
「我冇事啊……」佢依然想縮開手，唔知點解，佢眼神話我知，唔係咁簡單。
 
我拉住佢，用力扯開佢右手衣袖，先發現佢成隻手臂都瘀曬。我再拉開佢左手衣袖，同樣地，都係佈滿傷痕。
 
「我跌親。」Lecture Hall門外慢慢變得少人，佢臉都黑曬咁低頭講。
 
而我繼續捉實佢隻手唔放。
 
「真係冇嘢啊……」佢用力甩開我隻手，而我又一下拉翻住佢隻手，唔畀佢走。
 




「佢係咪打妳啊？」我好認真咁問。
 
「咩啊，都唔知你講咩……」
 
「我問，係咪曹大志打妳啊！」我好大聲咁喝問，Lecture Hall門外零星站住嘅人都望咗過嚟。佢咩都冇講，就捉實手袋，一枝箭咁跑走咗，連堂都冇上到。
 
我咁緊張做咩呢？明明黃子霖同我就只係久別重逢嘅中學同學。明明，我就唔係佢邊個。
 
由個日開始，黃子霖就愈來愈少出現係學校，就算撞到，都會慌忙避開我。
 
 
夜晚，羅佩思send Whatsapp message 問我係唔係我房，我居然會覺得好煩，直接熄咗手機。我成個腦都係諗住，係咪曹大志打佢呢？我先至醒起，原來筆記係提我揭開黃子霖嘅衣袖。
 
可惜嘅係，之後幾個月，佢都不停逃避我，再冇機會講上一句嘢。
 




「他不配做對象　可惜妳太善良
他背叛妳　偏妳沒法睜開眼看真相
馴服就似綿羊　相戀太善良　大多打敗仗
受騙的那個比騙徒更混帳
 
我可等妳嗎　可等到妳傷口結疤
我這種固執不比妳更差
好心地但運氣差　做壞人才耀眼
良善太過平凡　怕註定要陪跑
 
單戀也是正常　天生我太善良
早愛着妳　可怕是妳一早看透真相
馴服就似綿羊　相戀太善良　大多打敗仗
受騙的那個比騙徒更混帳
妳這樣情長　再等妳也是妄想」