[絕對無糖分]就係咁，我搬左入一幢充滿一樓一嘅唐樓: １４１　搵幫手

一方面我不停諗緊方法點樣拉返小春唔好再比佢沉船。

一方面我又好嬲，薰衣草咁樣做係食緊兩家茶禮！？定係佢想是但一邊得都對佢自己有好處？

但佢有無真係咁想落黎香港，要做出咁自私嘅行為！？

我回望返企左係ＫＦＣ門口望住個牌嘅小春，見到佢不停望住個牌若有所思咁，而賤輝係呢個時候察覺到我企左係佢身後面，大聲咁同我講：「頂你啊！行路無聲嘅！返到黎快Ｄ去做野啦！」

我望住佢點一點頭，正想走果陣，佢拉住我問：「喂！你捐左錢未！」



我甩開左佢然後答：「我唔會捐呢Ｄ錢。」

賤輝見到我咁都呆左，因為平時我唔會做出咁嘅野，佢停左停後先反應過黎：「喂！你而家咩野態度啊！你信唔信我……」我未等佢講完，已經狠狠地望左佢一眼。

佢見到我咁，都無左講落去，而我就行左去崗位繼續做野。

做做下，澧琳行左過黎問：「你今日無野嘛？我未見過你會咁對經理。」

我望一望佢嘆左口氣答：「有Ｄ事煩緊。」



「可以講我知啊。」澧琳話。

聽到佢咁講，我都唔知好唔好直話直說，不竟呢件事關小春同賤輝私人士，但面對住嘅人係澧琳，我真係毫無反抗力，最後一五一十將件事講左比澧琳聽，當然我將我住嘅地方，同點解知道３萬８呢件事入飾左先講佢知。

澧琳聽完後，我真係未見過佢咁嬲，佢嬲到紅都面晒咁講左句：「邪花！」然後厲眼望住我話：「但我知你有野隱瞞我。」

……頂……女人直角係未真係咁準啊。

我回避佢眼神，而佢又講左佢：「遲Ｄ先審你，而家解決左個邪花先。」



澧琳望一望賤輝，然後望一望門口嘅小春，仲係好嬲咁同我講：「你睇下你地呢Ｄ男人，咁易就比女人迷到咩都唔識諗，比人呃都唔知。」

「……係。」我真係第一次見到澧琳咁嬲。

「一係就比女人呃，一係就賤格打女人，男人真係衰。」澧琳話……打女人？唔通澧琳講緊佢阿爸！？

「你啊，唔好學埋Ｄ衰野啊。」佢無啦啦同我講。

「……係……知道。」我點一點頭後話：「但而家最重要係諗方法睇下點樣救呢兩條友。」

澧琳嗤氣左一聲後話：「你地男人嘅事，你自己負責，諗好話我知。」講完後就走左。

……到最後都係要自己諗方法，但係呢個時候，我身後傳出一把聲：「咁又唔係得你一個人諗嘅。」

咦！？邊個！？邊個讀取我心聲！？



我轉身望一望，見到阿ＫＩＮＧ笑笑口話：「我頭先聽到晒。」

「頂！你行路無聲架！？幾時係度架？聽到幾多野啊？」我問。

「聽到晒。」阿ＫＩＮＧ仍然笑笑口答我。