[絕對無糖分]就係咁，我搬左入一幢充滿一樓一嘅唐樓: １３６　朋友邀請

忐忑嘅心情，腦入面不停諗緊係未真係要幫薰衣草落黎香港……

「唉……」

「唉……」

「唉……」

咦！？唔通因為我真係好唔開心，連唉聲嘆氣都有回音？我即刻環顧左四周一下，發現原來另外果兩聲唉氣，係來自小春同賤輝。



「問世間情是何物……」小春講左句上聯。

「直教人生死相許……」賤輝講左句下聯。

然後，佢地兩個隔住我怒目而視。

「你知咩撚野係情咩！」賤輝話。

「有鬼人會同你相許！」小春話。



「薰衣草話愛我㗎！」「薰衣草話會嫁比我啊！」又進入呢個吵交輪迴……事源係咁，因為薰衣草係七日鮮，雙程證到期就要返上去，返上去前一晚，就係佢係我間房同我傾左幾句計果晚，但我無諗過，佢果晚唔只同我一個人傾計，仲同小春及賤輝見過面。

見面內容，不外乎都係果Ｄ「等我，我會返黎」、「你係度要乖乖地啊」、「記住要掛住我」但通常呢Ｄ臨別說話，我只覺得會係ＣＣＴＶＢ果Ｄ濕９劇會聽到，無諗過現實世界有人會講，最緊要係，點解有人會信……

其實現今科技咁發達，咁多通訊軟件，已經過變左好多異地戀，就連ＶＩＶＩ同小雨果陣分隔兩地，都可以用視訊日日見，咁點解薰衣草返上去，唔可以同小春或者賤輝，用通訊軟件交談。

原因，可能係佢仲有好多碼頭，小春同賤輝只係其中兩個不起眼嘅。

其二，小春同賤返係薰衣草眼中根本唔重要。



吵吵下，佢地又開始唉聲嘆氣上黎，我見到佢地兩個咁，都唉左一下……

「都唔知一個女人，點解可以搞到Ｄ男人咁。」呢一句說話，係剛剛路過嘅澧琳講：「三個都係同類人。」

下！？等、等等先！咩三個？

「澧琳，我無啊，唔關我事㗎。」我對住澧琳話。

「唔知！我唔理！我剩係知果日個女人一出現！你地三個就咁！」澧琳好嬲咁話，其實我又真係好少見到澧琳咁嬲。

唔通……澧琳嬲係因為我！？

「妳信我啦，我真係同果個女人無關係㗎。」我不停同澧琳解釋，仲不停同澧琳講會帶佢去玩，會送野比佢，直到我見到澧琳笑，我個心先定Ｄ。

「我暫時放過你咋，我仲未信晒你同果個女人無關係。」澧琳話，然後就行去另一邊做野。



係我心頭嘅大石突然放下，我成個人真係軟晒……即係輕鬆晒，但呢個時候，我電話響左下，我睇一睇電話，係其中一個通訊軟件嘅朋友申請。

……又會無啦啦有人加我好友？我打開後睇，見到果個人張相……係薰衣草，佢個朋友邀請第一句係話：蕃薯，我有Ｄ香港問題想問一問你？

我見到後即刻ＤＥＬＥＴＥ左呢個朋友申請，唔好問我點解，總之當下我只係覺得ＤＥＬＥＴＥ左係一個安全嘅行動，但我無諗過，本身唉聲嘆氣嘅小春同賤輝，原來一早已經係我身後面睇左我好耐。

「點解薰衣草會加你朋友？」小春朋，佢眼神好哀怨。

「點解！答我！」而賤輝眼神，係想殺左我咁。

呢一刻，我之後我不久將來，都會過得好慘……