[絕對無糖分]就係咁，我搬左入一幢充滿一樓一嘅唐樓: １２６　賤輝

到我張開眼，我已經係床上面，頭好痛，我諗係因為尋日同龍威哥飲多左。

諗返起尋晚嘅對話，發現呢一幢充滿一樓一嘅唐樓入面，所有做一樓一嘅人都好似知道自己係為左咩野而做雞。

佢地有好多都為生活。

而ＶＩＶＩ同小雨，就係為左夢想。

再經歷過尋日嘅對話，我更加係度反思自己，平時好多人都睇唔起呢個行業，但係，呢個行業入面嘅人有好多都明自己做咩。



係龍威哥口中，我聽過……

為左自己醫癌症，出黎做雞。

為左家人嘅生活，出黎做雞。

為左自己單親嘅囝囡，出黎做雞。

係，當聽到呢Ｄ野果陣，我有諗過邊有咁老套啊？ＣＣＴＶＢ咩？但自古老套野都係最真實，令到我覺得，我真係要好好諗下自己嘅將來。



唔通我要做雞一世咩？……我指係ＫＦＣ……

當然唔會，而且我仲想同我女神澧琳一齊……點可以剩係做ＫＦＣ……

但我有咩野叻呢？

我終於體會到，當一個人想上進嘅時候，先知道自己好無能係咩感受。

唔通……我要做鴨？



姨姨！！！我不想努力了！！！

但係我又點過到自己心果關。

我起身後去刷完牙洗完面，見到小春一早就坐左係廳入面，發呆咁望住某個位，我行左過去坐低後問佢：「做咩個樣咁呆啊，剛剛放工？」

而小春就話：「我頭先見到賤輝。」

「咁又點呢？佢係我地返工果度嘅經理，見到佢有咩出奇？」我問。

而小春話：「我唔係返工見到佢，而係樓下見到佢。」

我聽到佢個答案後，都呆左，問佢：「……佢發現左我地？」

佢搖一搖頭，然後答：「佢係黎叫雞。」



下！？

「……佢、佢黎叫雞？」我又問多次，而小春點一點頭話：「好似係搵新黎果個『薰衣草』。」

「下？邊個『薰衣草』？」我問。