[絕對無糖分]就係咁，我搬左入一幢充滿一樓一嘅唐樓: １２１　點解做雞？

其實，我做呢份工係為左啖氣唔想衰比小雨睇，定真係想為左我地兩個快Ｄ搵多Ｄ錢？

呢一刻，我真係唔知。

我只係知道，我係龍威哥間房度，望住佢果道有好多閉路電視嘅牆，見到一個又一個男人係每一間房門口出出入入果一刻，心入面開始驚。

而龍威哥望住我，問左一個問題：「無人係自願做雞，妳講點解妳想做雞？」

我諗左一陣後答：「為左錢。」



佢靜左靜，我諗，呢個答案佢應該聽過好多次，我亦都覺得，無人會同佢見第一次面，就講晒自己點解做雞嘅衝動。

而且，我而家都唔知我想做雞嘅原因係因為錢，定因為啖氣。

然後，龍威哥點一點頭話：「好，妳幾時可以返工。」

我諗左諗答：「即刻都得……但我無地方住，可唔可以……」

「可以，就住係返工果間房就得。」龍威哥答。



佢講左樓層同邊間房係我後，比左條鎖匙比我，然後話：「Ｄ錢點樣拆我會再同妳講，呢部電話拎住，記住唔係同男人搞緊野果陣，部電話一響妳就要即刻應機，知道未。」

我，點一點頭。

我拎住部電話同鎖匙，去到我做野果間房。

我望住道門，上面貼左好多唔同紙，有個唔係我個名嘅名「ＥＶＡ」，我唔識呢個名發音，然後其他紙就寫住咩全套、環保穿爆、大波、長腿、３６Ｇ……

仲有個牌掛住係門口，個牌上面寫住「請稍候」。



我開門入去，第一下就聞到一陣味，係一種難以形容嘅味，聞落似乾淨但卻有少少嘔心。

我一入門口後，電話就響左下，見到有個ＭＳＧ……應該係龍威哥。

龍威：妳如果咩都唔識，今日就訓一晚，聽日我會搵個人教妳。

望住部電話，我真係唔多識用，研究左好耐先覆到兩個字。

我：知道

我望住間房，我真係估唔到，我會有做雞嘅一日，而且更加唔咁諗，如果比小雨知道後，佢會點……