[絕對無糖分]就係咁，我搬左入一幢充滿一樓一嘅唐樓: １２０　見工

係香港三個月，習慣左……而家嘅生活……

我唔知呢個習慣係好……定係唔好……做野方面，雖然有份工，但係……好似做咩都力不從心咁。

呢份工係賣衫，係旺角某間商場入面賣Ｄ平價衫，唔知係我唔識點樣同香港Ｄ女人溝通，定係佢地睇我唔順眼，賣衫果陣，我成日比佢地白眼，搞到老闆成日話我。

但係，呢份工可以同小雨一齊，就算有幾多苦我都可以忍。

而且……我地而家仲等錢用。



不過就算點忍都好，只要當有Ｄ咸濕伯父想靠近小雨，我就無名火起，會極力阻止佢地，甚至鬧走佢地。

但係，好多情況都係發生係賣衫果陣。

係，Ｄ咸濕伯父帶住Ｄ後生女黎買衫果陣，想咸濕小雨，但小雨話果Ｄ係客，所以忍佢。

以前佢比自己阿叔搞，我已經保護唔到佢，而家，仲要係我面前比人咸濕都救唔到！？我緊係唔會比呢件事發生。

所以發生好幾次後，老闆就炒左我。



而今晚，我同小雨返到屋企後，小雨問：「做咩今日又發咁大脾氣？」

「唔通我睇住妳比男人搞啊！我緊係打撚死佢啦！」我答。

「但係人地係客啊。」小雨話。

「客咩啊！客就可以摸身摸勢啊！」我話。

然後佢無聲出，只係好靜咁坐左係我身後，雖然我背對住佢，但我知道佢而家喊緊。



我慢慢轉身，見到佢不停擦眼淚。

「妳做咩啊？」我問佢。

但佢只係望左我一眼後，又繼續喊。

「我想保護妳有錯咩？」我又問。

佢答：「忍下囉，我地而家又要貯錢，如果唔忍會無左份工㗎。」

「唔做果份工，我出去搵其他就得啦。」我話。

「妳搵到咩！」佢突然話，而我呆左望住佢……「姐係妳都覺得我自己一個人搵唔到份工做，賺錢啦。」

小雨聽到我咁講後，意識到自己講野重左，「……我唔係咁嘅意思。」



我衝左出門口，而小雨都跟住衝左出黎，但平時我不嬲跑得快過佢好多，所以過左一陣我就跑甩左佢。

我係香港街道不停無聊咁行，都唔知行都邊度，突然身邊擦過一班講一口唔喊唔淡廣東話嘅女人，身上散發出一種香水味同一種難以形容嘅味道。

我睇得出佢地係做咩，跟住佢地身後面，走入左一幢好舊嘅唐樓。

係呢幢唐樓入面，我係走廊不停來回行，直到有人開始發現我，直到，佢地覺得我阻住佢地……「妳再唔走，我叫呢度話事果個出黎。」

我都係咩都無講，直到，我見到果個男人出現。

「喂，小姐，妳係度做咩啊，知唔知阻住我地做生意啊。」個男人話。

而我，望住呢個男人，好認真咁話：「我等錢用，可唔可以請我。」



個男人聽到我咁講後，先係呆左，然後笑一笑話：「咁樣黎見工我龍威都係第一次見。」

無錯，呢個男人就係龍威哥。