[絕對無糖分]就係咁，我搬左入一幢充滿一樓一嘅唐樓: １０９　小雨

－－－－－小雨回憶第一人稱－－－－－

如果，一個人一生中會遇到一個影響佢一生嘅人的話，我諗，就係呢一個人。

我好記得，果陣我係１２歲，剛剛由國小升上國中，所有野都好似從新黎過咁，而我亦都遠離我嘅家鄉，係親戚屋企住，目的就係近我而家所讀嘅中學。

我係個台灣人，但好鍾意睇香港電影同劇集，所以慢慢都學識講小小廣東話。

今日係我第一日入學，好緊張，緊張到我有少少暈……



……咦……真係有Ｄ暈，仲眼前一黑添……

到我醒返果陣，已經係保健室。

我聽到，有人唱緊歌。

「徘徊在似苦又甜之間～望不穿這曖昧的眼～」咩歌黎呢，唱得好好聽。

「愛或情借來填一晚～終須都歸還～無謂多貪～」唱歌呢把女聲好好聽。



「猶疑在似即若離之間～望不穿這曖昧的眼～」但又會有人唱廣東話歌嘅，我慢慢張開眼睛，而唱歌呢把女聲都停左落黎，「似是濃……咦，妳醒了？」

我望住眼前呢個女仔，佢生得好靚，但靚得黎有一種英氣，而我望一望佢後，就用廣東話問：「妳識唱廣東話歌㗎？」

個女仔比我咁樣一問後，就話：「咦，妳識講廣東話㗎？我係廣東黎台灣，除左屋企人外，好耐都無聽人講廣東話。」

原來，佢係廣東人。

「係呢，妳又會無啦啦暈左嘅？」佢問我，而我就吱唔咁答佢：「……平時……我都係咁。」



「唔緊要！妳黎我屋企開嘅中醫度，我幫妳針一針。」佢嘅答案令我嚇一跳，「下！？針一針？」

佢見到我表情咁後，就笑住話：「我意思係針灸，放心，唔好睇我咁細，我好專業。」

估唔到我第一日返學，就可以識到朋友，而且……係我一生人中，第一個結交嘅朋友，係以往嘅生活入面，我係無朋友，可以話，係去到邊，比人蝦到邊，就算係屋企我都唔多出聲，我就好似形同無活係呢個世上一樣，可有可無咁。

「係呢，妳叫咩名啊？」我係第一次比人咁問我。

「我、我叫小雨。」我答佢。

「小雨，個名好好聽啊，我叫ＶＩＶＩ，妳以後咁叫我就得㗎拿。」佢講完後，就坐係我旁邊，摸一摸我個頭問：「仲有無暈啊妳？」

佢手心果種溫暖，慢慢又我額頭傳入體內，真係好暖……好暖……