[絕對無糖分]就係咁，我搬左入一幢充滿一樓一嘅唐樓: ９０　安排約會

「咁你打算點做？」小春問。

而家佢係我間房，傾緊點樣可以令到阿ＫＩＮＧ見返佢父母。

「我都要有兩個打算，第一係佢見返父母可能會好開心落淚，因為佢其實都好想見返佢地，第二係佢見返父母可能會好嬲，因為佢就係好憎恨佢地。」我講完後，小春眼定定望住我，用一個目無表情嘅樣拍左幾下手掌後話：「你講撚完好似無講咁。」

……其實係，我自己講完都覺得好似講左等於無講，頭先果番話就好似鬼唔知阿媽係女人咁，兩個極端比我講晒。

而小春就諗左諗：「其實不如諗係點樣安排佢地見仲好啦，係想瞞住佢地約左先，定係偶遇，又或者明刀明槍約？」



經小春咁樣一問後，我又陷入令一個思考。

要佢地明刀明槍約就應該無咩可能，如果可以，一早已經約左啦，駛鬼等到而家。

所以呢個方法唔可行。

剩返嘅係瞞住約同偶遇……

偶遇到可能唔太ＷＯＲＫ，事關阿ＫＩＮＧ父母其實一直都有暗地裡跟住ＫＩＮＧ，如果佢地有膽偶遇，其實都一早偶遇左，而且就算阿ＫＩＮＧ父母真係想同ＫＩＮＧ偶遇的話，阿ＫＩＮＧ見到如果仲係嬲緊，都係會跑走。



「都係瞞住佢地約好Ｄ。」小春無啦啦咁講。

我望住小春，好難得我地思路咁一致，「咁你覺得點樣瞞住佢地約？」

小春又諗左諗後話：「我覺得，約係一個佢地都唔咁發爛嘅地方會好Ｄ，約危險情況減到最低。」

呢一刻，我望住小春問：「你今日做咩醒左咁多，平時嘅你唔係咁。」

小春反左下白眼……真嘛，平時佢一開口就講叫雞野，邊有今日咁正常。而佢無理我，繼續係度思考，我見佢成個諗樣後，都繼續諗有咩地方適合佢地見面，唔駛一陣，我同小春對望左一下，然後異口同聲咁話：「我地做野果間ＫＦＣ！」



地點諗好，就差時間，同埋要點同兩邊開口。