[絕對無糖分]就係咁，我搬左入一幢充滿一樓一嘅唐樓: ８８　解鈴還須繫鈴人

放工後，我同阿ＫＩＮＧ父母去到一個餐廳，我叫左個餐，而佢地咩都無叫……

佢地望住我食……搞到我食得好唔好意思。

「係呢，阿ＫＩＮＧ平時都係返果間ＫＦＣ，但點解平時唔見你地搵佢嘅？」我先打破沉默，問佢地問題。

而佢地一臉自責話：「我地……都唔知有咩面目見佢。」

然後，阿ＫＩＮＧ爸爸就問：「唔知……囝囝有無同你講過？」



我諗，佢係想問我知唔知先前佢地屋企發生咩事，我答佢地：「佢有講，但我唔知係未全部。」

我講完後再望望佢地兩個，佢地臉上嘅自責反而少左，相對地，多左幾分解脫嘅表情，然後，阿ＫＩＮＧ媽媽就話：「其實一直而黎我地都有黎呢度想搵佢，但我地一直都唔敢現身，因為我地真係唔敢面對囝囝。」

我望住佢地，都好明白佢地嘅心情，「我聽阿ＫＩＮＧ講過，你地係未已經離左婚㗎嗱？」

佢地望一望我後，點一點頭，而阿ＫＩＮＧ爸爸就話：「我同佢都係用左好耐先肯面對大家，雖然而家我地兩個離左婚，但一齊住左咁耐，點會無感情，我地而家都仲視對方為家人一樣。」

佢地兩個互望左一下，一齊會心微笑。



「而且，我地知道一直而黎囝囝都覺得我地個家係模範家庭，無諗過果一晚嘅崩壞會令囝囝變到咁。」阿ＫＩＮＧ媽媽話，然後阿ＫＩＮＧ爸爸跟住講：「仲有果個女人，果個簡接令阿ＫＩＮＧ初嘗禁果嘅女人。」

我聽到佢咁講後，就問：「你地指薇琪？」

「你都知？」阿ＫＩＮＧ爸爸有少少詫異咁問。

「阿ＫＩＮＧ都有同我講過，但我覺得，令阿ＫＩＮＧ轉變咁大嘅，大部份責任唔關呢個女人事，後而係因為頭先你地口中所講嘅巨變，令到佢果排搵左一個唯一發泄嘅方法。」我話。

「唯一發泄嘅方法？」佢地兩個異口同聲問。



「就例如，如果果陣有個朋友係陪佢做運動，可能佢就用運動發泄，陪唱Ｋ的話，就可能係唱Ｋ，陪打機的話，就可能係陪打機，甚至……如果果段時間陪住阿ＫＩＮＧ嘅人係吸毒的話，可能阿ＫＩＮＧ都會患上毒癮，所以，果段時間阿ＫＩＮＧ咁脆弱，佢身邊有機會成為誘惑嘅野，都可以令阿ＫＩＮＧ沉迷。」我講完後，阿ＫＩＮＧ父母就望住我話：「你所講嘅都好有道理。」

咦……我都無諗過我講得咁有道理，我前排仲對要幫阿ＫＩＮＧ搵功德呢件事好迷，但估唔到一下子又比自己解開左咁。

「所以，我覺得解鈴還須繫鈴人，要幫到阿ＫＩＮＧ，要靠你地。」我話。

然而，阿ＫＩＮＧ父母一聽到我咁講後，又開始自責起黎，「我地都唔知點樣面對囝囝……我地仲未有心理準備企係囝囝面前，同佢講野……」

我望住佢地，有一種力不從心嘅感覺，因為我知道，呢件事唔係講出黎就做到咁簡單。