[絕對無糖分]就係咁，我搬左入一幢充滿一樓一嘅唐樓: ６８　私生女

最衰都係果個薇琪，無啦啦比老師罰抄學規１０次，我地學校校規咁多，實有排抄，而且我仲要返屋企前抄完，唔係返到屋企抄，阿爸阿媽知道左後，實要再抄道德經……

我一邊無奈咁抄緊，而另一邊我聽到有Ｄ聲慢慢接近。

好似係一首歌黎，但不嬲無聽歌嘅我又唔知係咩野歌。

然後，歌聲好似接近到我身後就停止唔郁，但我無理到，一直係度抄校規，就係我落力抄嘅時候，一塊白布飛左係我面前。

塊布……咁特別嘅？



我停左筆好奇咁望住塊布，用支筆搞下佢，點解塊布有Ｄ熟口面嘅，布上面條繩好似係邊度見過，而呢個時候，我耳邊突然有人吹一口氣，然後好輕聲咁講：「係我條底褲啊，岩岩除，仲暖架。」

我聽到後又係成個人彈起左，見到嘅……又係佢！！！

薇琪又一個好意味心長嘅笑容望住我話：「見你今日無舉報我，條底褲就送比你啦。」佢愈講個人愈埋，埋到鼻尖已經碰到鼻尖。

「妳……妳想點啊！」我話，然後想一手推開佢，但點知比佢捉住左隻手，後比佢制服左係張枱上面。

……頂，點解我咁廢比個女仔反制服。



薇琪眼定定望住我，然後笑左出黎：「仲估入到黎呢Ｄ學校會悶到痴線，估唔到第一日就比我搵到件咁正嘅ＫＡＩ子，睇黎都可以係度留一段時間。」

「咩……咩野ＫＡＩ子啊。」我話。

「ＫＡＩ子唔駛知咩野係ＫＡＩ子。」然後佢行開左，拎住自己條底褲再扔過黎，「送左比你就收好佢，日日帶住，唔好唔見啊，如果比我知道你無帶起身，我實有好多方法整死你。」

咩野人黎㗎佢，做咩我好地地讀個書，都要遇到呢Ｄ人啊，「妳妳妳未咁ＷＯ，妳先第一日黎呢度，我……我係度咁耐，話晒都係妳前輩ＷＯ。」我鼓起勇氣咁講。

而佢，無理我講咩，仲係我講完之後就即刻講：「你而家手上面拎住我條底褲，咁姐係……我而家下面無著。」



咦！？咁……咁姐係……

佢又好似今早一樣從施故技，佢用手慢慢將條裙拉起，然後向我則身，慢慢露出左佢雪白嘅大脾，我仲見到一個紋身。

然後，佢又露出左一個得呈嘅表情話：「唔知今次會罰你咩？」

「……下！？」我疑惑咁問，然後佢突大叫：「啊！！！！！！！」跟住，老師黎左……「又係你！」

「老師，澤天仁同學迫我除條底褲比佢……」薇琪竟然喊左！？

頂啊！妳有無咁好戲啊！？但而家唔係諗呢個時候，因為我手中拎住薇琪條底褲，果位老師眼定定望住我話：「澤天仁同學！估唔到你係一位毫無廉恥嘅敗類！咁嘅事都做得出！今次實抄死你！薇琪同學，妳同我一齊捉呢個人敗類去校長室，我會好好咁幫你！」

嘩！唔係掛！直頭係屈ＷＯ！

「老師……唔係你所見到咁㗎！」呢一刻我真係想喊出黎，我咁大個仔都無試過又幾大委屈。



我一邊比捉住我嘅老師拖住行，一邊望住係旁邊扮緊喊嘅薇琪時不時望住係到偷笑，我意會到呢個係一個勝利嘅笑容。

唔通！唔通我澤天仁一世英名從此喪！？我唔想啊！我仲咁後生，人生都未開始就要完結！！！！？

當我面對校長室道門果一刻，我就同一個就要踏上斷頭臺嘅死囚一樣，人生完結真係有走馬燈㗎願來，阿爸！阿媽！我對唔住道德經！但你地要信我！我係冤枉㗎！！！

我就係咁有內心戲之下進入校長室，一入到校長室，個老師就開口一輪咀咁將所有野講出黎，但係校長望一望我痛不欲身嘅樣，再望一望薇琪後，嘆左口氣同老師講：「得，呢件事我會處理，呢度無你嘅事，出去啦。」

「下？校長，澤天仁同學佢……」「我叫你出去，我會處理，聽到未。」校長不怒而威咁話，然後個老師就怒啤住我離開。

老師一離開後，校長就同我講：「澤天仁同學……」

「校長！我真係無做過㗎！你比個膽我都……」



「我信你，放心。」

呢個係我同校長嘅短暫對話……下！？我都未講佢就信我，發生咩事啊，唔通世界上真係有奇跡！？

我不明所以咁望住校長，然後痛哭流涕話：「校長！！！你真係明察秋……」我連個毫字都未講出口就比校長推開左，然後佢行到薇琪面前話：「入得黎讀，妳就乖乖地好唔好？」

等等！？頭先校長個語氣點解咁溫柔？

然後，薇琪笑左笑咁箍住校長條頸，仲錫左佢一啖後話：「我係比面老豆你先入黎讀，但無諗過認真乖乖地咁讀ＷＯ。」

……我頭先……聽左Ｄ咩？

「都同妳講左係人地……係人地面前唔好叫我老豆啦。」校長竟然好似一個驚比人知道秘密嘅人咁話。

「放心啦老豆，呢條友咁ＫＡＩ，唔會講出去㗎。」薇琪講完後，校長就望向我呢邊，然後同我講：「澤天仁同學，呢個秘密真係唔可以比人知道，比人知道左真係會死人㗎，幫校長保守秘密好唔好？」



……我根本都未接受到而家所有野，只係個腦空晒咁對住校長點一點頭。

直到我走出校長室，我先知道今次無事之餘仲知道一個天大秘密。

「薇琪……妳係……？」我問，而薇琪係我未問完就答：「我係佢私生女。」

……救命啊！！！今日到底有幾多件事會發生㗎。