[絕對無糖分]就係咁，我搬左入一幢充滿一樓一嘅唐樓: ３２　公園

坐左係床度，望一望個鐘，８點，今日有早更。

一邊刷牙洗面換衫，一邊係度諗，點解關對老夫婦事？如果真係關佢地事，咁我又應該做Ｄ咩？幫佢搵菁菁？但彩虹姐都同我講左，佢地試過搵伯伯咁耐都未搵到，我又點一個人搵到菁菁呢……

臨出門口……

「又咁早著到咁出去打劫啊。」呢把聲一聽就知係果個成日串我嘅ＹＯＹＯ，佢又時累得滯就會問舅父借間房訓唔返家，睇黎佢尋晚都係度訓。

其實一開始聽佢Ｄ語氣，係覺得好討厭，但聽聽下就慣左，又或者會開始同佢鬥下咀。



「係啊，妳有無興趣。」我話。

只見佢嗤笑左一聲，「嗤！我先唔會著到咁出門口，又唔係身有屎。」

其實，佢又講得好岩，不過……「但點解妳落樓又要戴口罩呢，唔係身有屎的話。」

平時見到Ｄ姐姐仔開完工返家果陣，都會見到佢地著平時Ｄ輕便裝，然後戴帽加口罩遮樣，雖然無我著都成個通緝犯咁，但其實同我個做法又有咩分別？

每次我講到呢度，佢都只係話：「我地做嘅出發點，同你出嘅出發點都唔同，你唔會明。」



咁究竟係咩出發點呢？我試過問佢，但佢無正面答過我。

落樓，見到ＶＩＶＩ同小雨手拖手咁上樓……

「早晨。」我點頭同佢地打過招呼。

「早晨，蕃薯仔。」ＶＩＶＩ姐話，而小雨就好指羞咁縮左係ＶＩＶＩ身後面。

講真，搬入黎到而家，我同成幢大廈Ｄ人都溝通過，唯獨係小雨佢無正式同我講過野，而且每次見佢，佢實係同ＶＩＶＩ一齊。



我唔知佢係怕羞定點？但佢做得一樓一，無可能會咁怕羞掛。

ＨＩ完就ＢＹＥ暫時就係我同佢地兩個嘅溝通程度，落到樓，又係行去公廁換完衫先返工，今日係同女神早更，同佢做同一個位，一大朝早見到女神，成個人都醒神晒。

但係，今日望住澧琳就會諗起果對老夫婦，究竟我真係愛澧琳，定係我想得到澧琳呢？

接落黎呢幾日，我都不停諗呢個問題，直到有一日朝早放工，我又經過果個公園，我見到果位婆婆住左係公園某處。

我行左過去，企左係婆婆面前後話：「……伯伯，又去左彩虹姐度？」

婆婆一開始係用疑惑眼神望住我，但當佢聽到我講彩虹姐果一刻，就露出左微笑，然後話：「你係彩虹Ｄ朋友？」

「係……」我點一點頭。

然後婆婆話：「我有聽彩虹講，佢將我同老公Ｄ野講左比一個後生仔聽，果個後生仔，就係你？」



我又點一點頭，然後我問婆婆：「其實，婆婆點解可以比自己一個咁愛嘅人，去搵另一個女人？」

婆婆微笑左下話：「愛，要擁有左先愛架咩？」