[絕對無糖分]就係咁，我搬左入一幢充滿一樓一嘅唐樓: ２５　入閘

我係龍威哥間房前，敲一敲門，「龍威哥，唔阻你嘛？」我推開門後，見龍威哥好自在咁坐係床上面，睇住港漫，無望過我一眼話：「唔阻啊，入黎。」

我行左入房，輕輕咁關度門，然後就同佢講：「龍威哥啊，我可唔可以係度留一陣，我想……」

我都未講完我想點，應威哥就已經話：「你係未想留係度睇閉路啊？」

如此料事如神嘅應威哥，我真係嚇左一跳，「……你點知架？」

「我望住個閉路見你走左幾轉去彩虹度，都估你有野想搵佢架嗱。」佢收起左本港漫，然後望住我話：「我見你成日睇一個同彩虹好似嘅ＡＶ女優Ｄ片，係未想幫襯啊？」



突然比佢咁問一問，個人唔知點解有少少慌，「唔唔唔唔唔係！無咁諗過！」

「唔係咁你又成日行落去？」龍威哥問，而我就好坦白將我今日嘅事同佢講左次，而佢就諗再諗後話：「你所講嘅野，其實我都見過幾次，但無深究過，如果你知道左後，話比我聽。」然後佢笑左笑。

有佢嘅批准，我坐左係Ｄ閉路電視前面睇住彩虹姐間房出面嘅情況，發現原來彩虹都好多客，要搵個空擋睇黎要等好耐。

而係等嘅途中，龍威哥同我講佢睇緊嘅港漫劇情，我就講下我自己返工做野嘅經歷，打發時間，而講講下，佢突然同我講：「你知唔知頭先你話唔係想幫襯彩虹，我放心晒。」

我不明所以咁望住龍威哥，而佢就話：「第一次都係比自己鍾意嘅人好Ｄ。」



下！？我紅都面晒咁問：「你……你又知？」

「做我呢行，睇咁多人，點都睇得通嘅。」龍威哥話，然後佢有少少黯然：「你仲後生，又Ｄ野係可以去試，但有Ｄ野一定要諗清楚。」

佢一副語重心長咁話，然後，佢望一望個閉路，「睇黎你機會黎，快Ｄ落去啦。」

我望一望閉路，彩虹門口Ｄ終於無人，「好，等我知道左後，我實會話比你聽架龍威哥。」

「你係記得先好啊。」龍威哥笑笑口咁話。



我用勁快嘅速度衝落去彩虹姐間房，見佢門前面塊牌係「請按鐘」，然後，我跟住上次彩虹姐教我嘅方法，按下佢個門鐘。

「叮～～～咚～～～」門響，傳來嘅係彩虹姐詫異咁問：「蕃薯仔，你做咩啊？我開緊工架。」

而我就氣喘咁答佢：「我……我有Ｄ野想問妳。」

然後，我只聽到幾下高跟鞋嘅聲，門開左一條細縫，我見到彩虹姐小小面，然後佢話：「入黎先，唔好企係度。」

我推開門，人生第一次入一樓一嘅房間。

我記得，提子哥講過，呢Ｄ叫「入閘」。