[絕對無糖分]就係咁，我搬左入一幢充滿一樓一嘅唐樓: ２０　冤家路窄

究竟點解會有對老夫婦行入去我住緊果幢大廈度嘅？

唔通佢地係住客？

無可能啊，呢兩個星期都唔見到有呢對老夫婦出現過……

唔通係幫襯！？

唔係掛，老婆陪個老公上青樓！？



成朝早做野果陣，我都諗緊呢個問題。

「蕃薯，點解你今日好似咁多野諗嘅？」發現我神不守舍嘅澧琳問。

「無啊，未訓醒姐。」我求其搵過借口應答，其實我好少搵借口答澧琳ｄ問題，但係無理由同佢講關於我住嘅地方，唔知佢知道左後會點嘛。

「我仲以為你有咩心事添，如果無就好。」澧琳微得好甜咁話，佢個笑容真係好似天使！

好！唔可以比女神膽心！專心做野先！



「小姐，妳想要咩……餐！？」頂……我面前果個人，係呢排成日串９我嘅ＹＯＹＯ。

係啊，就係拆我祠堂果個貓女郎ＹＯＹＯ啊，後面仲有果日一早走左嘅兔女郎ＣＯＣＯ。

仇人見面份外眼紅！！！

「原來你係呢度做雞嘅！」ＹＯＹＯ語帶挑釁咁話。

「小姐！我係賣雞，唔係做雞，咁妳地兩個而家係未叫雞啊！」我壓低聲線答。



而ＹＯＹＯ就答：「係啊！兩個Ａ３蜜糖雞飲百事拎走啊！」

「環唔環保啊咁！」我答。

「唔環保啊！拎Ｄ套黎啦！」ＹＯＹＯ回話。

然後我好大力咁督果部機後，行去後面拎雞，就係呢一刻，一把聲將我由憤怒抽返出黎：「點解……你都問人地環唔環保嘅？」

仆街！嬲撚到唔記得澧琳都係度添！佢咁問法，好明顯頭先聽到晒我地Ｄ對話啦。

突然比澧琳問一問，所有動作都靜止左咁，「ｅｒ……ｅｒ……」我ｅｒ左成５秒有多都未諗到點答，但係我身後個位ＹＯＹＯ就已經話：「咁撚耐架！你地識唔識做雞架！」

仆街！如果唔係澧琳係度，我實發返妳圍，而個賤輝經理見到我果位有個客咁燥，就即刻行過黎睇咩事，「唔好意思啊，呢為靚女。」而且佢仲見到係靚女，今次實入晒我數。

「你快ｄ道歉啦！」屌！仲要道歉！？



但我見企係ＹＯＹＯ身後個ＣＯＣＯ細細咁講：「算啦，唔好又為件事嘈，我地都有唔岩，快ｄ買完就走啦。」

ＹＯＹＯ擰住頭望一望ＣＯＣＯ就話：「見係妳咁講，算啦。」然後又大大聲同膊輝講：「咁快Ｄ比個餐黎啦。」

「係係係……靚女叫到即刻整，幫緊妳幫緊妳幫緊妳幫緊妳幫緊妳……」賤輝行左過黎我度後就話：「你快撚ｄ死返入去唔好係度阻住啦！」

我死死地氣行返入去，行臨走果陣，睥左ＹＯＹＯ一眼，而且仲有我個眼神同佢講：妳！好！野！君子報仇十年未晚！！！

而ＹＯＹＯ又係果個好得戚嘅樣回應：黎未黎！驚９你啊！

但係，我察覺到佢身後嘅ＣＯＣＯ就不停用眼神同我講：對唔住啊……

返到入去後，好唔憤氣咁坐左係度，而澧琳就行左入黎問：「你無野嘛？」



「無。」我簡單答左句，雖然我好嬲，但係有女神關心，Ｄ火都收左一半。

「其實……你係未識果兩個女人架？」澧琳呢一問，我打左個突。

「……點解妳……會咁覺得？」我問。

「無啊，我見你同佢地都有互望，我以為你地識架咋。」原來澧琳都幾聰明……但係如果我話識佢地，佢實會問落去，問我地點識架ｗｏ……都係答佢唔識好Ｄ。

「唔識架我地，互望係因為同佢地嘈緊嘛。」我是但答左呢個答案。

「唔好嬲啦，我都未見過你咁嬲嘅。」澧琳唔知我係因為比佢地拆祠堂而嬲，「……無嬲啦而家，但係一陣賤輝實入黎鬧我。」

澧琳呢個時候拍一拍我膀頭話：「一陣我都幫下口，睇下會唔會好ｄ。」然後，又係果個天使般嘅笑容。

望到呢個笑容，真係咩煩惱到無晒。