「你會娶我嗎？」: 「雲上舞，風裡刀……」

「喂，做咩仲未走？」
 
「你又未走？」
 
「佢地又話去元朗唱k，但轉左頭唔見哂人，家姐又唔見人。」
 
佢地是指她的一群3 D班女生，一出動就8至9 個，根本就是COOKIES 或者MORNING 娘以至AKB48，少女時代的雛型。
 
「咁你回家law，我好攰，跑完班際又社際，又有師生接力，對腳好痛，同埋太早起身。」
 




「話你渣，跑幾步就攰，孱仔。」
 
「你最勁，點呀，我唔識路，帶我去搭720啦，係唔係果邊？屌，天水圍一入黑就無哂燈，鄉下地方。」當年天水圍是一個新開發的地方，只有李氏的「漿糊山莊」，當年沒有力場，更沒有自由行。
 
「咁又點呀？唔得呀？」
 
「你係村長，要靠你帶路，唔敢得罪你。」
 
「哼，算你，行呢邊呀。」
 




「喂，你肚唔肚餓？」
 
「少少啦，點丫？」
 
「去M 記，陪我。」
 
「又去，今日LUNCH 唔係食左啦咩？」
 
「今日無呀，我返左屋企煮面食，邊有你地咁幸福食PIZZA」
 




「不如咁，我同你去食PIZZA」
 
「真係？」
 
「不過我唔知邊度有PIZZA HUT」
 
「有，嘉湖銀座有」
 
「咁快D行啦」其實我當時都堅係餓，同埋唔知點解佢叫我做咩事，我都會應承。
 
「嘩，好野，唔洗等位。」
 
「而家咩時間呀，7點未夠呀，天水圍呀，邊有人會食。」
 
「唔理你，我點野食先。」




 
「一個超級至尊，細厚批，一個肉醬意粉，蒜蓉包，兩個湯一個忌廉一個羅宋丫唔該。」
 
「覆你一次，一個細超級至尊，要厚批，一客肉醬意粉，一份蒜蓉包，兩個餐湯一個忌廉湯一個羅宋湯，仲有冇其他？預計時間等15至20分鐘，多謝哂。」
 
「係咁多，唔該。」熟練之餘仲好有禮貌。
 
「你背左個餐牌？ 咁熟手？你又知我要咩湯？」更令我驚訝的是她的禮貌。
 
「我係唔係好醒先，總有一款你鍾意，我去洗手間呀。」
 
在智能手機，甚至手機也未普及的年代，人與人之間的溝通很坦誠，至少不會有底頭族的出現。如果在2014年的今天，友人離席如廁，我一定會機不離手，篤篤篤。
 
「喂喂喂，你知唔知中5文科果班女仔原來都響出面等緊位，仲有丫，我隔離班果幾個肥妹都響度食呀﹗」
 




「咁又點？」
 
「冇，講你知，哈哈」
 
「真八卦，你成個戰地記者咁」
 
「咩呀」
 
「冇野LU」
 
「你知唔知邊個陳沛然？同黃家棋拍拖果個呀」之後又係一大堆學校內的是是非非。
 
「仲有呀，你果班果個施靜雯呀，你知唔知呀，佢個男朋友原來係讀百周年嫁。」如果學校要找個人做查小欣主持八卦節目，我一定選佢。
 
「兩位，超級至尊同埋肉醬意粉」救星來了，多謝你，是是非非真係興趣不大，同埋響呢個場合講是非，真係唔太好，同埋我真係堅餓。




 
「好野，有得食，你肚餓呀，食多D食啦。」
 
「唔，知道。」其實自幼家教頗嚴，「食不言，寢不語」。因此我其實不太習慣她一路食一路講，只是她沒有察覺我皺了幾下眉頭。
 
「多謝三百二十蚊」
 
「唔該」
 
「好LU，終於可以返屋企」
 
「咩終於呀，而家同我食餐飯好辛苦你咩？」
 
「都幾嫁，都唔知聽你講野好抑或食野好。」
 




「你協調唔到呀？低B仔」
 
「係呀，哎呀，好飽」
 
「喂，你真係好累？」
 
「幾啦，咩事？」
 
「我想去睇戲」
 
「吓？而家？」其實當時都只是九點未夠，時間尚早。
 
「係呀，我想去睇風雲，因為有郭富城」
 
講真我都好想睇，當年沒有互聯網，只有人傳人的口碑，最重要是我家姐都講過好睇。
 
「咁不如去睇下有冇飛先啦」
 
「好野﹗」
 
「雲上舞，風裡刀……」套戲好唔好睇，已經唔太清楚，因為我已經好累，我地買左九點半，仲要響老麥度HEA 下，佢就當然叫我買雪糕比佢食。可能佢都知我攰，所以都盡量無撩我講野。
 
實不相暪，當麻鷹同蝙蝠血洗步家莊，捉左步驚雲返天下會，我已經訓著左。
 
似乎她真的好喜歡看自己的偶像，只是專注地看著，不發一言，沒有評論。這個習慣十多年後也沒有改變。
 
「點解小慈會死？好慘丫，我覺得佢鍾意步驚雲多D」
 
「你頭先喊過？」只見她的那雙大眼晴有點紅腫，明顯是眼淚流下的足跡。
 
「咁都比你知道，因為我覺得好感動」相信沒有一個人認為「風雲」是有感動位的，真是令人費解，我也好難去了解一個小女孩的內心世界，無錯，她當時在我的心中只是一個好煩、好多野講、串嘴、滿口歪理的小朋友。
 
「喂，多謝你陪左我成晚，知你辛苦了，你早D 返屋企休息啦。」轉眼間已經到了她的家，耀華樓的樓下。
 
「好啦，你都早D訓啦，拜拜。」當年西鐵尚未出現，接通天水圍至屯門就只有慢吞吞的輕鐵，721，天水圍至友愛，整個30分鐘的車程我在車廂內睡著了。