「你會娶我嗎？」: 「喂，咁你知唔知我家姐響邊？」
「喂，有冇見到我家姐？」
「邊個你家姐呀？」
「我家姐咪周詠琳law﹗」
「屌，佢係你家姐？你係佢個妹？」
我已經盡量將對話聲線押底，但一知道佢係周詠琳個妹，粗口本能地由口中爆出。當時自修室內的某d同學已經開始對我們的行為有d不屑，可能佢地心中已爆出「靜d啦，屌你」。
一個連大力d抖氣都會比側目的自修室，就是我校大多數同學特別是準備應付公開考試的一群，放學的「蒲點」。
「我地出去先講。」
為免被「道德撚」同學指篤，我就輕輕的移開椅子，放輕步履，情況就好似潛入金庫的湯告魯斯，擔心驚動附近任何機關，示意她到外面才說。
「喂，咁你知唔知我家姐響邊？」
「你家姐？下晝請左病假，返左屋企。」
正當我對她們二人姐妹關係依然半信半疑之際，我想再追問「你真係佢個妹」之際，比我發現到佢面色沉了一沉，同時有點焦急。
「呢度有冇電話？」
「有，響入面，影印機隔離。」
當時仲係去行山要問屋企人借手提電話的年代，同而家相比，響whatsapp text 個message 或者上facebook 影張相打下咭，自嘲呃like，打個status，任君選擇。
「喂，家姐，你無事嗎？睇左醫生未？你咩病？嚴唔嚴重？食左藥未？我即刻番屋企照顧你。」
一口氣問了五個問題，睇得出佢幾關心佢家姐。我見已經為她解決問題，正準備返入去繼續溫習之際，她突然拉住我的夏季恤衫，示意我不要離開。
「喂，屌你，做mud 鳩」我心諗。同時佢好似響電話另一邊收左d 指示。
「好啦， bye bye，我好快番來，你抖下啦，家姐」
「喂你家姐今朝一早已經話唔舒服，可能唔夠訓，下晝告左假。」
當年，學校請病假不需要遞交醫生紙，只需要電話投注。或者當時人心比較純樸，老師根本認為學生不會「詐病射波」。而家返工，你老闆知你冇醫生紙sick leave，佢唔殺左你就奇，真是so 9 sad。
「詐病請病假 又要付出代價 好彩呀邊個有醫生紙明碼實價 仲要做緊特價」農夫歌仔斬有得唱。
「唔唔」
「我家姐叫你借住50蚊比我去食野先。」
「吓？」
「係呀，唔信你打去問下佢law」
當年街頭行騙案件尚未普遍，如果唔係呢個case一定比「我全家都好平安」更膾炙人口。
「食咩要50蚊咁多呀？食個晚飯都可以啦？」
講真，當時又真係有D肚餓，本來打算溫多陣去樓下發發買個雞髀返回家算數，而家因利成便又好，受人所託又好，返入去執埋D野準備走。
「你等我一陣啦，入去執埋D野，咁你要食咩呀？」
「去M 記啦」
在那個年代，屯門市廣場老麥的地位就等同於九龍人的老尖五支旗桿，是男女老幼的集散地。「九點半市中心老麥啦」因此老麥門口總是人山人海，反而入而真心食bell chan 的人就唔多。1997年的老麥，任何bell chan 都是20蚊有找。
由自修室只需步行約10分鐘，經屯門市鎮公園，就可以到達屯門市中心。沿途喋喋不休不休的她，也許是前世因為洩密而被罰啞藥，今世講過夠本。
「喂，你係唔係想追我家姐，成日打電話比佢？」
「我只是打電話問功課，你多鳩事。」
「嘩，有人講粗口，好驚呀！」語氣明顯帶點摟屌及扮驚mode。
「你好煩丫，你今日唔洗拍拖咩？唔洗煲電話粥咩？」
「多事啦你﹗」
「我要食魚柳包餐，汽水飲雪碧少冰。」一入老麥門口她已經為自己點好餐並示意我去買。
「咁你去找個位啦。」
「果邊咪有law，你盲嫁咩？」
我已經開始習慣了她「一言九鼎」的說話模式，句句都「串串貢」，永遠不失霸氣，可能靚女真是有d性格。
「魚柳包真是最好味的。」
「係咩，咪又係包一個。我唔得佢d漿，有嘔味，酸酸叔叔」
「妖，話你冇tasty，呢d先好野呀」之後再大條道理講點解一定要食魚柳包，為了怕左佢再煩鳩我，我認輸了
「好啦，下次食。」
本身打算那那臨食完個餐早d回家沖涼訓覺，但她咬一啖，講十句，足足左成個鳩幾鐘先清哂個盤d野。
「你餓鬼上身呀？食得咁快？」
出自她的嘴巴，真是無句好聽同順事的說話，總是尖酸刻薄，要對手屈服至死方休。
「係呀，我想快d返屋企，好q眼訓，你未食完我走先，明天見。」
「喂，有冇搞錯，要一個天水圍美少女陪你食m 記，之後食完就閃人？」
好一個歪曲事實的能手，假以時日，李柱銘響高院同你打官司都要輸。
「咁你走得未？」
「去埋廁所洗洗手先啦，食薯條隻手好油丫。」
當年未有沙士、禽流感，勤洗手的生活習慣當時尚未成熟。
「你去輕鐵站，我行呢邊回家，拜拜。」
「喂，你有冇風度嫁，唔送埋人地去等車？」
算鳩數，怕鳩左你，費事再比你串。
「好啦，行啦，去輕鐵站啦。」
「乖」
我心中悶哼了一句「屌啦星」。
輕鐵站等車時我一粒聲都冇出。
「喂」她同時用手拍了我手臂一下。
「點？」
「你嬲呀？」
「唔係，只是有d眼訓。」
「仲以為頭先串你，你招架唔住，所以嬲左。」
「屌，我堅眼訓，冇哂ram」
「好啦，寡人體恤你今日都辛苦啦，批准你回家訓覺啦，仲唔謝主隆恩？」
「屌你，痴完未呀？上車啦，早d訓，咪煲粥，明天咪遲到，同我問候下你家姐，拜拜。」那陣香味，又一次出現，隨著晚風吹到我面上。
「妖，又講粗口，拜拜啦，長氣。」