「你會娶我嗎？」: 周念慈，中三D班

「你，出去果邊集隊。」其中一個被抽出的女學生，年初四表情，口中念念有詞。
 
經過我身邊走過時，隱約聞到一陣香味。「痴撚線的，返學噴香水，搞咩？」FF 撚上身。
 
訓導組老師會趁早會集隊乘機檢查學生校服儀容：頭髮並非黑色、配戴飾物耳環、化妝、校服裙過短，都會被抽出，一字長蛇陣排在訓導處門外。
 
「你今個月第幾次比我捉你染頭髮？你睇下你條裙？似咩？」
 
「唔記得。唔知。」斬釘截鐵的回應又不失霸氣。
 




「好心你學下你家姐，讀書叻，操行好，再係咁你唔洗諗原校升中四。」
 
「哦。」態度沒有改變。
 
中三女學生返學化妝，改短少少條裙，點解會被定性為一個壞學生？問題好大？唯一解釋是可能她自小已經明白「女為悅己者容」與「人靠衣裝」的道理。人吃人的社會，曉打扮，善用自己優點的人，總是有好處。
 
小息到教員A室門外罰企一星期，是她的懲罰。當時我我唔明罰企有咩用。
 
她，周念慈，中三D班。