[傷感愛情] 無語問蒼天: 第二十九章 - 墮落的真相

人馮喜事精神爽, 事業愛情皆得意嘅時候, 工作能力自必然都會大增, 幾個 project 斬吓眼話咁快就搞掂哂, 緊係啦, 阻差辦工事小, 阻我倫哥收工就事大, 今晚唔使番學, 我嘭嘭聲咁執好哂啲野之後就收工走人, 行到公司出便, 蝦, 咩原來有人已經響我公司門口度等緊我喎, 詠欣正展現住一個甜美嘅笑容咁嗌住我, 「偉倫, 做咩今日咁快就可以走得嘅?」

我行上前錫左詠欣面額一啖之後, 「人地趕住收工要去見妳吖嗎!」 詠欣再黎一個甜到更溜嘅笑容, 「咦…, 都唔知講真定講假嘅?」 隔離響起左一吓咳聲, 哦, 原來係詠欣個表姐倚麗黎喎, 倚麗好鬼馬咁望住我地笑住黎講,「咁咪好囉, 因誤會而結合, 而家見到妳地咁我都戥你地兩個開心啦!」

落到公司樓下, 我同詠欣提議不如番我屋企度食飯, 咁順便亦都可以比個驚喜我老媽子佢咁, 主意已決, 我地跟住就去買左一啲手信同斬左料之後, 然後我地就好心急咁要趕番去屋企度, 入到屋後, 我向住老媽子大嗌, 「老媽子, 睇吓邊個黎左?」 老媽子見到係詠欣黎左之後, 跟住見佢已經笑到見牙唔見眼咁, 詠欣行埋去老媽子度, 「婆婆….呀唔係, 我應該改口要叫伯有先啱, 伯有世伯, 你地好嗎?」

呢一晚, 我老豆同老媽子都表現得好開心咁, 老媽子成晚都捉住詠欣隻手係咁同佢傾個唔停, 而詠欣亦氹到老媽子成晚都係咁笑到咔咔咁聲, 見倒佢地各人都咁開心, 呢一刻我亦感受到呢個家正充滿住幸福同快樂嘅感覺。

手指正在撥號, 「媽, 妳個心係咪仲係好痛呀? 媽….我會盡快籌夠錢比妳入醫院度做手術架!」 電話嘅另一邊正傳黎咳嗽聲, 「咳, 淑嫻, 妳不如唔好再搞咁多野嘞, 呀媽呢個病…咳咳咳咳…, 唉, 都係醫唔好架嘞, 妳啲錢…咳…不如就留番比自己用黎傍身仲好啦!」 已經忍唔住喊緊嘅淑嫻再講, 「媽, 妳唔好咁啦, 我無論幾咁辛苦都好, 我點都要搵夠錢去將妳呢個病醫番好為止架!」 



醫院內, 「醫生, 我媽媽個情況係點呀?」 醫生托左副眼鏡指住張 X 光底片黎講, 「郭小姐, 妳媽媽心臟幾條主要血管已經去到嚴重閉塞嘅程度, 但醫院方面真係要排到下一年先至有期比佢做手術, 但如果妳要快嘅, 咁就唯有轉去私家醫院度就即刻可以同佢做手術, 但坦白講, 手術費方面就真係會係幾貴吓, 所以, 我都希望妳會明白呢個情況!」

淑嫻正一個人響街上徘徊住, 諗起為左醫呀媽呢個病, 佢除左甘願出賣肉體之外, 就更連最心愛嘅人都要離佢而去, 每次諗番起偉倫果次響時鐘酒店門口度鬧佢嘅果一番說話, 淑嫻個心直到而家都依然仲係極度刺痛住當中。
 
第二十九章圖述
 

 
正沐浴在愛河當中的詠欣份外明艷照人