[傷感愛情] 無語問蒼天: 第二十五章 - 情絲暗生

雪雪雪, 我響附近公廁用水沖洗緊個傷口, 而詠欣就幫我去些粉買左啲膠布藥水之類嘅野黎同我敷藥,  詠欣幫我貼緊塊膠布響個額頭度, 「咪郁啦, 男人老狗咁怕痛!」  詠欣嘅手勢好鬼溫柔, 但冷不防佢唔記得胸口粒鈕無左, 我面對住佢條波罅, 呵, 果然真係止得吓痛咁喎, 詠欣知我昅緊佢野, 跟住見佢眉頭一皺之後就…., 「嘩, 作死妳咩? 咁大力襟落人地個額頭度!」

敷藥過後, 我同詠欣就響石櫈度坐住, 兩個人靜住咁都唔知講啲咩至好, 我開始 ar 啲野黎同佢講, 「係…係呢詠欣, 頭先妳打果幾個鬼佬果招係叫咩名堂呀?」 詠欣無我咁好氣, 「叫兜巴星, 唔使學架, 不過成日都用嘅!」 哦, 「咁…喂, 其實妳有無男朋友架? 唉, 問都嘥氣, 妳咁靚女, 啲仔排到落電車路都見唔到龍尾啦, 哈…哈…」 「低能….」

嘘, 倔雷除咁, 不過都算啦, 起碼今日同佢都仲可以坐埋響一齊, 坐左一陣, 我拍左大脾兩下之後, 「呼, 夜嘞, 我聽朝仲要買野比老豆食同去探老媽子, 喂, 攞妳部手機黎比我先啦!」 詠欣望住我諗左一陣, 跟住就好似有啲唔多願意咁遞部手機黎比我, 我用佢個電話接通左我個電話之後, 「搞掂, 咁樣我地得閒就可以互 chat 吓嘞!」

呢晚, 我成晚響屋企好似烚熟狗頭咁笑住, 而另一邊, 詠欣見今晚我向佢道左歉之後, 個心亦都舒服左唔少咁, 諗起我為左佢同啲老外打師奶拳個樣, 詠欣自己都忍唔住咁笑住出黎。

幾日之後, 唔嗱係呀? 我響老蘭同啲老外打師奶拳嘅片段居然比人擺左上網黎洗緊版, 啲點擊率居然仲係唔少果隻, 慘嘞, 啲 comment 仲係恥笑我居多, 咩番生李小龍, 白痴仔大戰老外, 港女三巴勇救廢男, 叫我快啲去死嘅就更不計其數, 我昅下班同事, 個個都好似古古惑惑咁偷笑住, 死嘞, 我估條片已經響公司內廣傳, 無嘞無嘞, 呢舖就真係一世英名一朝就喪哂嘞。



距離收樓日期仲有兩個禮拜, 我嘅心情亦開始有啲興奮, 今日老媽子比電話我, 話我地鄉下有個呀姨, 而家響上面已經無人無物咁孤伶伶一個人生活, 而平時佢就只係幫人打吓住家工咁黎賺取啲生活費, 老媽子話同佢傾左電話, 提議個呀姨不如申請落黎響我地屋企度幫吓手, 咁順便亦可以照顧埋佢地兩老嘅起居生活…….. 

我知老媽子嘅心意, 佢係唔想一個人再響老人院度住咁悶, 而且佢亦不嬲都想番屋企黎同我地一齊住, 我聽倒佢咁講, 即時就答應老媽子嘅提議, 老媽子聽到我咁講之後, 即時就開心到飛起咁滯。

今日超勁多野做, 連食飯時間都要出左去同個客傾野, 商場內, 我攞住啲圖不斷同個客研究緊啲佈置同擺位嘅問題, 商場 food court 之內, 一對眼正不斷遠遠咁留意住我, 「詠欣, 妳睇咩睇到入哂神咁呀? 喂, 一陣食完飯我地不如過去 shopping mall 果邊行吓囉!」一班同事正同詠欣講住。

客人同我講, 「個建議好好, 張生, 咁其他啲野就麻煩哂你繼續幫我跟進嘞!」 呼, 搞掂, 雖然已經餓到我仆街, 但一陣好快就仲有另一個客要見, 所以我嗱嗱林先去老麥買個傷殘牛肉巨無霸黎咬吓先, 我邊咬住包, 邊飲住汽水, 但突然膊頭比人好大力咁拍左一野, 「喂, 李小龍!」
 
咳…咳…咳…., 濁死我嘞, 究竟邊 Q 個黎架? 我望吓後面, 哦, 咩原來係詠欣黎呀, 「咳….唔, 咩…咩咁啱呀!」 我含住啖包噴住包碎咁同佢講, 「咦, 噴哂出黎, 你吞左先至再講野啦!」 詠欣皺住眉頭咁鬧我。



我夾硬吞左啖包之後再講, 「咩咁啱妳又響度食飯呀?」 詠欣笑住答我, 「係囉, 又會…咁…啱嘅, 你又係響呢頭做野呀? 呀…係呀, 死啦, 果次響蘭桂坊段片比人擺左上網, 而家啲同事響公司度笑到我面都黃哂嘞!」 

我又同番佢講, 「剩係妳先比人笑, 我咪仲慘, 頭先個客都問我段片果個究竟係咪我黎? 咁我就梗係打死都唔認啦!」 詠欣聽完之後笑得好開心咁, 好靚, 詠欣笑嘅時候真係好靚。 

「喂, 夠鐘囉, 妳唔使做呀? 我咬完個包一陣仲要趕下場去見客呀!」 詠欣望吓隻錶, 「哦, 咁…咁我都要走嘞, 唔同你講嘞, 拜拜!」 「拜拜!」 望住詠欣呢個咁靚嘅身影逐漸遠去, 直到響我視線範圍之內消失左之後我先至捨得離開。
 
呢個下晝, 我一路做野但個心就一直都係咁掛住詠欣, 死嘞, 咁唔通…..我已經鍾意左佢?
 
第二十五章圖述
 



 
偉倫對詠欣開始暗生情絲