從西鐵醒返之後……: 51
＊
「佢已經死咗，只要你殺死多一個人，就可以造成打和嘅局面。」倪少賢平淡咁講，「但你係無可能殺得死我，所以你只可以殺死另一個人。」
另一個人……？
倪少賢嘅聲音將我拉返嚟現實，頭痛亦漸漸停止落喛。
我赫然醒起除咗夏舞同倪少賢，藍組重有一個人未死……
「駱譯……」我愣然道出駱譯嘅名字。
「無錯，你只要殺死佢，遊戲就會完結。定係，你依然係選擇犧牲自己條命呢個選擇，去換取佢嘅安全？」
「我……」
即使夏舞死咗，但駱譯依然未死。
一個人都好……我都想拯救到一個人嘅性命。
「你殺死我啦。」我緩緩企返起身。
「就算無法救到自己鍾意嘅人條命，你都係選擇犧牲自己俾其他人生存？」倪少賢露出輕蔑嘅笑容，「簡直係為咗滿足自己虛榮心嘅偽善者。」
「你唔會明白。」
「明白咩嘢？」
「人心。」
倪少賢聽完之後，鮮有地展現出不悅嘅表情。
「我覺得自己果然同你溝通唔嚟。」倪少賢搖一搖頭，然後向我行過嚟，「沉醉於拯救他人嘅虛榮之中嘅你，呢種死法果然係十分適合。」
「我都覺自己同你唔夾，所以……」
我握緊拳頭，反過來向倪少賢衝過去。
「就算到最後一刻，我都唔會放棄！」
倪少賢俾我突如其來嘅反應嚇到，甚至不自覺咁後退兩步。
「哈！你所謂嘅唔放棄就係主動嚟受死呀？」
「你睇下你身後係咩地方先。」
「身後……！」倪少賢瞪大雙眼，第一次展現驚愕嘅表情。
無錯，倪少賢身後嘅位置係天台邊緣，佢就喺呢度將夏舞推落樓。
所以，我會以其人之道還其人之身！
即使會受到懲罰，我都會拼盡最後一口氣捉實倪少賢，同佢攬埋一齊去死！
倪少賢嘅舉動一瞬間慌亂起嚟，但佢好快平靜返落嚟，緩緩向我講：
「你以為搏埋條命出嚟就可以將我殺死？我唔會俾你如願以償。」
「睇下點！」我毫無猶豫衝過去。
我已經做好死亡嘅覺悟。
駱譯……我最後嘅希望，大家嘅夙願，就全部靠晒你！
夏舞、莉莉、修洛文、鬼仔、詩詩、古朗、愛兒……我好快要嚟見你哋。
就喺我同倪少賢距離唔夠兩米距離——
「停手—！」
第三把聲從我後方傳嚟，將我嘅腳步叫停落嚟。
「駱譯……！」我轉身一望。
「逸哥……好彩趕得切……」駱譯氣喘如件咁從天台門跑過嚟。
「係你……？」倪少賢瞇起眼睛望向駱譯，「不過都嚟得啱，你可以有機會見證遊戲嘅終結。」
「遊戲嘅終結……？」駱譯呆咗呆，「嗯，我係嚟見證遊戲嘅終結……逸哥，你嘅數字係幾多？」
「點解係要……」
我原本打算問佢點解要問呢條問題，但係……既然係駱譯問呢條問題，咁我就會毫無隱瞞去回答佢。
「4號。」我照實咁講。
駱譯聽到之後，唔知點解竟然露出鬆一口氣嘅表情。
「逸哥，多謝你到最後都願意信任我。」駱譯忽然展現出燦爛嘅笑容。
「唔通你……」倪少賢瞪大雙眼，驚惶失措咁講。
「我想成為一個強大嘅人……我想成為一個好似逸哥你咁嘅人！」
駱譯大叫一聲，然後向我衝過嚟！
「駱譯……？」我驚訝咁望住駱譯，完全唔明白發生咩事。
反而企喺另一邊嘅倪少賢好似明白發生咩事，好驚慌咁想阻止呢件事發生。
「你！我唔會俾你咁做！」倪少賢伸出手，將距離僅餘三個腳步嘅我掂過去。
兩隻手同時掂落我身上。
『接觸判定——』
我呆滯咁望向駱譯。
機械聲從手帶傳出……係從我同駱譯嘅手帶發出。
『紅方取勝，藍方被捕捉。』
駱譯嘅雙眼同鼻孔流下鮮血，然後向前傾倒。
我即刻向前扶過去，但已經卻遲咗一步，駱譯如同斷線木偶一樣跌落地下。
「喂！駱譯！」我即刻踎低身將駱譯抱起，然後向住佢大叫。
發生咩事……究竟發生咩事……
「咳！咳！咳！」倪少賢放開接觸我嘅手，猛然掩住嘴咳血。
唔單止駱譯，就連倪少賢都受到懲罰！
雙眼流下兩行血痕，痛苦掩住嘴巴嘅倪少賢挨喺天台邊緣度不停喘氣。
機械式嘅聲音仍未停止，駱譯嘅手帶已經熄滅，但我同倪少賢嘅手帶仍然發出機械式聲音，而且重係連續發出兩道廣播。
『遊戲發生變化，Reverse生效，所有人數字大小癲倒。』
『接觸判定——紅方取勝，藍方被捕捉。』
聽完所有嘅廣播之後，我終於明白係咩一回事……
「駱譯……點解，點解你要咁做！」我不停向駱譯吶喊。
「逸哥……」駱譯滿口鮮血撐起笑容，「我終於……可以做個有用嘅人，幫到逸哥你……」
「你講咩呀？我從來無覺得你係一個無用嘅人！」
「我知道……所以我更加報答要逸哥你，得你會咁樣關心一個好似我咁無用嘅人……」
「駱譯，駱譯呀！」我不停吶喊駱譯嘅名字，淚水卻已經忍唔住缺堤而下。
「逸哥……我有做到一件有用嘅事，幫到逸哥你嗎？」
「做到！做到！你已經做到，你已經係一個好有用嘅人！」我不斷點頭講。
「咁就好喇……我好仰慕你，好仰慕你咁強大嘅人，我一直好想變成你咁……」臉上混雜血與淚嘅駱譯燦爛咁笑著，「我終於可以做到……」
「你做到喇，你已經比我更加強大，更加勇敢嘅人！」我緊緊抱住駱譯嘅身軀，用盡全力去抱緊。
「雖然係處於遊戲，但我無忘記過同逸哥共肩作戰嘅情境，嗰陣係我人生最幸福嘅事……多謝你……多謝……你……」
駱譯嘅頭緩緩垂落我肩膊上，再無任何聲音。
「駱譯……駱譯！」任由我點樣大叫都好，亦聽唔到任何回應。
駱譯，佢為咗救我而犧牲自己嘅性命……！
我將駱譯嘅身軀小心平放地上，呢刻佢面帶笑容，表情就好似講緊佢而家好幸福咁。
係去咗邊度咁幸福？係去咗天堂嗎？
咁嘅話……天堂一定係個好幸福嘅地方。
我抹去模糊雙眼嘅淚水，然後轉身望向倪少賢。
明明同駱譯同一時間受到懲罰，但倪少賢仍然未斷氣，挨喺天台邊緣苟延殘喘。
「多得『監察者』嘅權限，總算係俾到機會我同你傾埋最後一次偈。」呢刻倪少賢大半邊臉染成血紅，白色高領衫上都一滴滴血跡。
「你……重想講咩？」悲痛過後嘅我平淡咁問。
「唔係咩特別事，只係想問你……」倪少賢竭盡力氣問，「即使無法拯救到所有人，你都要竭盡全力去戰鬥？」
「我……如果知道結果最後會咁殘酷，或者我會非常氣餒，但即使係咁，我都會選擇同命運對抗，竭盡全力去拯救每一個人。可能到最後係一種無意義嘅行為，但我唔係因為偽善，所以去救人，而係因為明白其他人嘅痛苦，所以去拯救佢哋。」
「出到去之後嘅情況會俾而家更加殘酷，而且會失去一切，失去而家安穩嘅時侯。」倪少賢強行將身子撐起，挺直個人認真咁望住我，「就算係咁，你都要繼續？」
「我會繼續，直到我死為止。」我堅決咁答。
雖然我始終唔明白倪少賢嘅話，無論係咩都好，答案都唔會變。
「哈哈哈！」倪少賢仰頭大笑一聲，「你變咗，變得堅定咗。而家嘅你，或者會接受到現實，唔會再沉醉喺虛假嘅夢之中……咳！咳！」
倪少賢終於頂唔住，咚一聲跌倒地上。
「佟逸霖……你就即管掙扎落去，前往殘酷嘅現實，然後繼續望住其他人死去……最後……」
倪少賢發出最後一道笑聲。
「千祈唔好感到絕望……直到你……無法掙扎……為止……」
終於，倪少賢亦斷埋氣。
倪少賢……直到最後我都唔知佢心裡諗緊啲咩……
明明係敵人，明明係想殺死我，甚至想將我置於絕望之中。
但係最後佢講出一番咁嘅話。
或者從一開始，倪少賢就無諗過將我趕盡殺絕，如果唔係佢點會犯下將Reverse交畀駱譯呢種大錯誤，如果唔係佢點會遲遲唔殺我，如果唔係……
佢點會慢過離我更遠嘅駱譯掂到我？
一切，已經無從得知。
兩道屍體瞓喺我腳邊，我仰望著頭頂漆黑一片嘅天空，享受著最後呢個勝利。
真係……有啲落寞。
遊戲開始至今嘅畫面，我所遇過嘅每一個人，依然深深烙印喺我腦海之中。
駱譯、夏舞、倪少賢、莉莉、修洛文、鬼仔、詩詩、Ellie、阿曉、古朗、愛兒、家明、William……
終於，完結了。
之後，我將會要去面對倪少賢口中所講嘅殘酷現實喇掛……
得返一個人，真係十分符合《挪亞方舟》呢個故事。
我環望四周，等待遊戲嘅終焉。
不過，廣播遲遲未有傳出。
所有人已經死晒，就連最後嘅倪少賢、駱譯同夏舞都已經死咗，遊戲應該完結先啱……
但係我手上嘅手帶仍然亮著紅光，彷彿同我講緊遊戲依然繼續。
究竟……係咩一回事？
『玩家人數發生變動，紅方……』當我仍然疑惑緊時，廣播隨即響起。
但係我無留意到廣播內容，因為我聽見——
一道微弱嘅呼吸漸漸傳出。