從西鐵醒返之後……: 50

＊

我係一個平凡嘅人。

出生喺一個平凡家庭，有平凡嘅雙親，好平凡咁成長，入咗一間平凡嘅學校，成積好平凡，社交好平凡，本身亦好平凡。

正因為太平凡，所以就好似一個無用嘅人。

成積唔夠人出眾，運動唔夠人突出，社交唔夠人廣闊，外表打扮更係一個隨街可見嘅人。





就因為咁無用，所以由細到大一直都俾人睇唔起。

老師從來唔會寄預我希望，打籃球踢足球隊友永遠唔會傳波畀我，周圍嘅同學當我係唔會反抗嘅傻仔咁玩，大時大節精心打扮自己外表但從來唔會得到人注意。

我就係一個咁平凡，咁無用嘅人。

正因為我太無用，於是我變得愈嚟愈懦弱。我唔敢表達自己嘅意見，唔敢反駁其他人嘅無理，無論係做咩嘢都係跟喺人哋後面，就連行路都唔敢同人平排行，只會一個人好似跟尾奇咁默默跟喺後面。

最後，我變得只會逃避。





俾人欺凌，俾人指責，俾人給予無理嘅請求，明明係人哋錯但反而俾人鬧返轉頭，甚至咩嘢都無做過都可以無啦啦俾人鬧，俾人恥笑。

唔緊要，只要逃避就好。

將呢一切就接受落嚟，然後不停逃避一切。

當望住人哋成積好俾老師讚，望住人哋運動勁變成萬人迷，望住人哋受到好多同學愛戴，望住人哋即使係細微動作都得到人注意。

無問題，就係咁樣。





我嘅人生本來就係應該咁，因為……

我係一個平凡嘅人。

本應如此。

即使遇上超乎現實想像，無法用科學解釋嘅死亡遊戲，我嘅責任就只有一個——

如同路人企喺一邊慌張大驚小叫，然後如同路人無人注意到就滑稽咁死去。

但係，我遇見一個人。

佢係一個厲害嘅人，唔單止聰明透頂，而且十分唔怕死。喺受到死亡威脅底下，佢引導住大家去進行遊戲，睇住遊戲嘅每個陷阱，甚至會願意冒住性命風險去救人。

佢係一個為人著想又溫柔嘅人，佢毫無自私嘅想法，即使係陌生人亦好，只會有危險佢都會嘗試去拯救佢。當每個人仍為自己嘅性命擔驚受怕，佢卻為每個陌生人嘅性命而拼命奮鬥。





我親眼見過佢從死亡底下救下一個女仔，為咗其他人而獻出自己性命，甚至極力說服慌亂嘅大家一齊合作。

佢嘅存在，就好似我以前見過嘅人一樣，都係咁耀眼，咁遙不可及。

我只能同以前一樣企喺一邊觀望。

但係，今次唔同。

如同佢咁耀眼嘅一個人，竟然會注意到毫不起眼嘅我，會體諒我懦弱嘅性格，會願意聽取我嘅意見，會給予我無條件嘅信任。即使我搞衰咗成件事，佢都毫無怨言，重笑住咁安慰我。

呢次係我人生第一次有人留意我。

我好開心，好興奮，好感謝……我好想向佢表達我嘅謝意。





佢為咗救一個女仔而付上性命冒險，為咗溫柔照顧佢而講出違心嘅謊言，為咗拯救佢而同其他人對抗。

所以當佢哋有難嘅時侯，我鼓起咗人生第一道勇氣，做出一件我從未想像過嘅事情。

我嘗試改變自己，向現實反抗。

我憧憬著佢嘅身影，佢已經再唔係耀眼嘅光芒，而係立於我眼前龐大嘅背影。

而我想去追逐佢，即使係一小步都好，我都想嘗試變成佢咁樣。

咁強大，咁溫柔。

但係，我始終都係企喺原地。

多得佢嘅計謀，唔單止成功打低空姐，重將小丑迫入絕路。





但失去佢嘅領導，因為我無謀嘅建議，令大家陷入單車手嘅險境，莉莉、修洛文，重有啱啱先認識嘅一對兄弟都因為咁差啲死去。

家明亦喺呢場戰鬥中喪生。

到頭來，我都係一個無用嘅人。

我最後都係幫唔到佢手，要佢獨自去面對最後一個面具人，重令到佢哋受傷。

我，真係好無用。

當我自己一個留落荒山，重差啲俾突然出現嘅怪物殺死時，我真係無法再撐落去。我差啲就想就咁樣死去，逃避呢場篩選。

但係，我遇見到嗰個女仔，係佢十分重視嘅嗰個女仔。





我終於明白，一切都係源於自己嘅懦弱。

但即使如此，佢仍然給予我從未得到過嘅注目，從未得到過嘅關懷。

所以我向自己發咗個誓，我再唔可以繼續無用落去。

我要做一個強大嘅人，我要向佢報恩。

哪怕要付上自己嘅性命亦好……



我都要好好守護住佢，以及佢所重視嘅事物。

我，駱梓譯，以我自己嘅性命發誓。