從西鐵醒返之後……: 47
而家嘅情況係六比五，我哋呢邊鬼仔、剛一同泰拳女死咗，剩低嘅有我同詩詩，匿喺基地嘅神父，同埋下落不明嘅莉莉、Ellie同阿曉。
至於對方死嗰四個人都係死喺我眼前，所以剩低落嚟嘅人亦可以用排除法搵出——啱啱落荒而逃嘅雞冠男、夏舞、駱譯、鬼仔嘅阿哥阿武，同埋……倪少賢。
無錯，將局面導向而家咁嘅人，正係倪少賢。
佢係一個天才，我諗到嘅嘢佢都一定諗到，佢唔會諗唔到透過打和令兩邊同時存活嘅方法。
而家嘅局面一定係倪少賢故意促成，係佢故意促成互相廝殺，無法和平解決嘅局面。
我醒起第三場遊戲完結之後，倪少賢曾經同我講過一句——
下次我哋再見時，可能就會係敵人。
倪少賢嘅話中真意，真係呢個意思。
雖然唔知倪少賢究竟知道幾多嘢，但我一定要阻止雙方繼續互相廝殺，然後將倪少賢搵出嚟。
「我哋離開呢度先。」我向詩詩講。
我帶住詩詩跑到去另一條走廊嘅後樓梯，我小心翼翼探頭出去，確保安全之後先離開呢度。
不過即使遇到對面嘅人亦無咩好怕，夏舞同駱譯嘅話一定會支持我嘅計劃，雞冠男雖然係敵人但應該唔敢向我哋出手，阿武應該都係個好人嚟……
唯一需要警戒嘅人係倪少賢，但詩詩講過遊戲開始被襲擊時有個紮頭髮嘅男人自稱1號，符合呢個特徵嘅人只有倪少賢一個。
如果係而家，或者重可以將局面扭轉。
無錯，只要……犧牲我條命嘅話。
「大哥哥，你想做啲咩……？」詩詩未完全平復情緒，講嘢依然有啲鼻音。
「我重未放棄我嘅計劃，只要可以說服大家停止廝殺，而家雙方剩低落嚟嘅人都唔使死。」我照實講出。
「但係而家……雙方人數並唔一樣呀。」
「放心，唔會有問題。」
我緊握拳頭，帶住詩詩向下方樓層搜索。
放心……無論係詩詩，定係夏舞同駱譯，我都唔會俾其他人再死。
我想改變呢個絕望嘅局面，即使如何艱難亦好。
由細到大，我已經經歷過好多絕望……爸爸離家出走，返學俾人笑無爸爸，同學當我係怪胎，屋企貧困到連三餐都食唔飽，為咗讀大學借到一身債，重有媽媽佢……
媽媽佢……究竟點樣？
當我諗到自己人生絕望時刻時，不由然就浮現媽媽嘅臉孔，但我無論如何都諗唔起係咩事……
點解會咁……
額頭突然變得劇痛，一片一片零碎嘅記憶浮現喺腦海之中，但我無法整理出記憶嘅片段……
「大哥哥！小心！」詩詩突如其來嘅大叫，將我拉返到現實。
一抹高大嘅影子從轉角位映出，影子嘅主人霎時轉彎向我衝過嚟！
但佢喺離我哋幾層梯級嘅位置停下。
「……係你哋？」阿武訝異咁望住我同詩詩，然後焦急咁問，「你哋有無見過我細佬？」
我同詩詩臉色一沉，阿武嘅第一個問題就問中核心。
無錯，阿武應該係個好人，佢有份幫手打低單車手，重幫夏舞包紮槍傷，睇落並唔係壞人。
只不過，能唔能承受至親嘅死係另一回事。
「鬼仔佢無事，佢——」
「鬼仔佢已經死咗。」我截停詩詩善意嘅謊言，直接將真相講出。
「你……話咩話？」阿武不可置信咁望住我，「你一定係講笑喇……」
「對唔住……」我低下頭，「鬼仔為咗保護我哋，選擇同對面其中一個人同歸於盡，所以……對唔住。」
「點解會咁……！」阿武握緊拳頭，一拳打落牆度，「點解我趕唔切，點解……！如果係我細佬嘅話，就算要我犧牲自己條命都唔緊要！但係點解！」
阿武一拳一拳打落石屎造嘅牆上，打得拳頭皮膚擦損，流下一條條血痕。
「希望你可以節哀順便。」我仍然保持低頭姿勢，「但我有樣嘢想同你講，係關乎到鬼仔最後嘅心願。」
「我細佬……最後嘅心願？」阿武呆滯咁望向我。
「我有個方法可以令雙方嘅人唔使受到懲罰。」我將計劃講出，「規則只係講明會懲罰人數少嘅一方，但如果雙方人數一樣，無一方嘅人數較少，就唔會有人受到懲罰。呢個亦係鬼仔嘅願望，無論係詩詩，定係對面組嘅係，佢都唔希望其中一邊死。」
雖然係利用咗鬼仔去完成呢個計劃，但至少……呢個的確係鬼仔希望嘅事情。
但係，阿武講出一件驚人嘅事實。
「呢件事我哋都知道，我哋嗰邊有個紮頭髮嘅男人講過相同嘅話。」
「咩話……？」我驚訝得即刻瞪大雙眼。
倪少賢……竟然講過相同嘅話？
我原本以為而家嘅局面係由倪少賢引導成咁，但阿武卻講出呢個驚人嘅事實……
唔通促成呢個局面嘅人，唔係倪少賢？
不過阿武之後嘅話將我嘅一切猜測否定。
「但嗰個人話即使呢個指令打和，下個指令都會繼續互相殘殺，直到最後兩人為止。」阿武繼續講，「佢自稱係呢場遊戲嘅『監察者』，重預先將下個指令講畀我哋知。」
「下個指令……係咩？」
「下個指令，假如生存人數多過兩個人，就大家自相殘殺到得返兩個人為止。」
……咩話？
雙手不禁顫抖著，聽到呢個事實嘅我實在太震驚……
「雖然我哋都對呢件事半信半疑，但假如佢講嘅嘢係真，咁喺呢個指令將其中一方殲滅先係最好嘅方法……至少可以減少生存人數，增加自己生存機率。」
原來係咁……
咁講嘅話，遊戲開始到而家發生嘅事情都可以解釋……
無人嚟交涉、Vanessa嘅出爾反爾、一開始突如其來嘅基地襲擊、雷爺嘅一意孤行……
所有事統統都可以解釋。
「不過我始終對佢講嘅嘢有所懷疑，而且從一開始我就係諗住我細佬……」阿武將視線移到詩詩身上，「同埋你可以兩個人生存到最後。」
「阿武哥哥……」詩詩低聲咁講。
「不過如果鬼仔最後嘅心願係想我哋都可以生存落去嘅話……」阿武鼓起精神，忍住雙眼淚水，「咁我會選擇幫你哋。」
「阿武……多謝你。」我向阿武道謝。
「咁你而家諗住點做？搵晒兩邊剩低嘅所有人出嚟？」阿武問。
「無錯。」我點頭講。
「咁我哋要快手啲先得，睇嚟時間應該無多。」阿武提出建議，「或者我哋要用啲令全棟大廈嘅人聽到嘅方法，將所有人聚集一齊。」
我諗起第二場遊戲時，我曾經透過代價交換換取酒店嘅廣播權。
但係一開始間屋入面又無電話，挪亞又未必喺大廈裡面，公屋大廈本身又唔會有廣播系統……
只係剩低最原始嘅方法。
我望一望後樓梯間嘅標誌，呢度係十六樓。
我大大力深呼吸一口氣，雙手放喺嘴邊，然後對住轉角位大叫：
「所有聽到我把聲嘅人，我有方法保證而家剩低嘅人喺呢個遊戲唔會受到懲罰，無論係紅方嘅人定藍方嘅人！」
我再深呼吸多口氣，然後繼續大叫：「如果你聽到我把聲嘅話，就即刻嚟十六樓，我會留喺十六樓等你哋嚟！」
「咁大聲佢哋應該聽到，不過唔知會唔會真係有人上嚟。」阿武講。
「我哋行出去度等喇。」我講。
我、詩詩同阿武行返出去走廊，企喺三條走廊嘅中心點等待。因為阿武係藍組關係，為免有誤觸，所以我哋之間會稍微保持距離。
剩低落嚟嘅人當中，夏舞、駱譯同莉莉一定會贊成我嘅決定，阿曉都應該好容易說服，而Ellie……雖然我同佢之間存在誤會，但關於自己存活嘅事，佢應該唔會特意反對。
神父佢應該重喺紅組單位度，而最唔確定嘅人就得返雞冠男同倪少賢。
一陣腳步聲傳出。
其中一條走廊上，一道身影漸漸走近，而且對方手繫紅色手帶。
「阿曉。」我道出對方名字。
阿曉緩緩行到身前，掃視詩詩同阿武一眼，留意到阿武手上嘅藍色手帶後，轉過頭問我：
「你啱啱講嗰番話係認真？」
「係。」我回答。
「咁你應該知遊戲開始時發生咗咩事，對面嘅人並唔可信，佢哋絲毫無諗住同我哋合作。」阿曉側目阿武一眼。
「情況已經有變，我相信我可以說服剩低落嚟嘅人。」
「就算你說服到，但而家人數係六比五，重點樣可以打和？」
「無錯，我知道。」我保持堅定嘅眼神望住阿曉，「到時我會犧牲自己，將人數變成五比五，令到雙方人數打和，咁樣足夠未？」
唔單止眼前嘅阿曉，就連一旁嘅詩詩同阿武聽完之後，都露出十分詫異嘅眼神。
「大哥哥，你……講真？」
「嗯，我講真。」我合上眼點頭。
「我唔明白，點解你要做到呢個地步。我知道你係一個願意付出，唔會計較嘅人，但點解你要做到呢個地步。」阿曉反而皺起眉頭，十分不悅，「就算你死咗，都唔代表我哋所有人一定會生存，點解你要咁做？」
「我……」我頓時語塞。
「係因為嗰個女仔？」阿曉質問我，我明佢所講嘅女仔係邊個。
係夏舞。
我緩緩開口，講出我心底話。