從西鐵醒返之後……: 41

神父突然企出嚟，無啦啦又講災難，又文明終結，又世界末日，令人摸不著頭腦。

但佢嘅表情又唔似講緊笑，又唔似發緊癲，而係非常認真嘅表情。

「遊戲嘅終結，只係災難嘅開始，我哋人類將會面對前所未有嘅空前巨大災難！」神父高舉雙手大叫。

「啊……神父先生，你講嘅災難係咩災難？」泰拳女好奇咁問。

「revelation，即係啟示錄，係記載住人類末日嘅一本書！」神父繼續講落去，「因為人類太過邪惡，觸怒咗上帝，於是上帝決定要給予人類審判，將所有人類全數肅清！」





「條友講嘢愈嚟愈無厘頭，由一個遊戲講到去世界末日，跟住重拉到去上帝度。」鬼仔講。

「神父，我以前讀宗教學校，有聽過啟示錄呢個故事。」行山男反而好認真咁問，「啟示錄嘅結局中信主嘅人係會得救，就算本身唔信主但因為末日而信主嘅人亦會得救，又何來將所有人類全數肅清呢個結論？」

「無錯，事情本應如此，但人類實在太邪惡，做出太過傷天害理嘅事，所以上帝改變咗主意，決定好似大洪水咁將所有人殺死！」

神父講完之後繼續自己喃喃自語，大家聽完基本上都認為神父只係個亂噏一通嘅傻人，無人再去理會佢。

「嗰個神父……係咪已經俾遊戲逼到傻咗？」莉莉苦笑住講。





「大概係啲盲信宗教嘅人掛。」鬼仔講。

當一個人陷入絕望時，會盲目依賴自己嘅信仰都唔定，特別喺呢個咁殘酷嘅遊戲篩選之中。

原本應該係咁。

但當我諗到神父、默示錄……重有挪亞呢個名時，就覺得彼此之間好似有啲聯繫。

「神父。」我行到神父面前。





「係！」神父一臉豁達咁歡迎我。

「既然上帝要肅清所有人類，咁呢個遊戲嘅意義喺邊？」

「你唔係信呢個著住神父衫嘅大叔鳩噏嘛？」鬼仔吃驚咁問。

「遊戲……遊戲……只係暫時嘅庇護所。」神父忽然變得細聲，「外面嘅世界已經末日，然而我哋可以喺呢個虛幻嘅空間生存多陣，但呢度遲早都會崩壞，所以只可以不斷減少呢度嘅人嘅數量，盡可能保存更多人類。」

我聽完之後，都一頭冒水起嚟。

「嗱，你就算點問呢個神棍都無用，佢根本咩都唔知喺度鳩噏。」鬼仔講，「如果佢知嘅話就唔會喺度喇。」

「問下總好過無嘅。」

挪亞、revelation、End and Rebirth……呢一切之間一定有所關聯。





『咳咳咳……』挪亞嘅聲音從電視機下方嘅一個喇叭傳出，『恭喜大家成功通過第四層遊戲，嚟到呢個最後嘅舞台！大家畀啲熱烈嘅掌聲畀自己先！』

喇叭傳來激烈嘅拍手聲，拍手嘅人就只係得挪亞一個。

『睇嚟大家嘅反應都好熱烈，期待咗呢個最終遊戲好耐喇！無錯，只要通過呢個遊戲嘅人，就可以真正登上方舟離開呢度，邁向我哋嘅樂園！哈哈哈！』

「我真係想一拳打爆個喇叭去……！」莉莉十分不忿咁講。

「同感。」鬼仔點一點頭。

『好喇，開心嘅嘢我已經講完，之後就入正題吧！今次嘅遊戲，最終層遊戲係——死鬥大廈。』

大廈……？





我哋呢度荒山野嶺，何來有大廈呢樣嘢？

『你哋心裡面一定有個問題，呢度何來大廈呢？』挪亞竟然將我心中所想嘅事道出，『答案就係你哋眼前嘅木門度，麻煩得閒嘅大家試下將門打一打開。』

「我去開。」行山男主動行去木門前，將木門打開。

……咩話？

「呢道係……鐵閘？」行山男不解摸住眼前鐵閘。

無錯……門後忽然多咗道滿佈鏽跡嘅鐵閘，而鐵閘外再唔係啱啱我哋行上嚟嗰條山徑，而係如同公屋大廈設計嘅走廊。

唔怪得石屋裡面嘅設計咁似公屋住宅，原來……我哋一早就被傳送到第二度。

『無錯，你哋而家已經身處一棟二十層高嘅大廈。遊戲將會以回合式進行，每個回合我會透過電視向你哋發放指令，只有限時內滿足指令內容嘅人先可以生存，無滿足到嘅人將會受到懲罰。好喇，而家你哋先打開電視櫃嘅第一個櫃桶先。』





我依照挪亞嘅指示，將電視櫃櫃桶打開。

裡面有……九個紅色手帶？

我將九個手帶拎出嚟放喺檯上，大家都十分疑惑望住堆手帶。

「你哋睇！」鬼仔拎住其中一個手帶，「上面有數字，重有一粒掣！」

『呢堆手帶將會影響你哋之後嘅命運，戴咗上去之後到指令結束為止都係無法除低，所以要三思而後行呀！遊戲規則就係咁簡單，而家你哋睇下電視先！』

沙沙沙——

電視忽然著咗，屏幕顯示一陣雪花。





「係阿哥！」鬼仔大叫出嚟。

「夏舞、駱譯……」我驚訝咁望住電視屏幕。

電視顯示出嚟嘅，係包括夏舞、駱譯同埋鬼仔嘅阿哥在內九個人嘅相。

『哈哈哈哈！係咪見到熟悉又懷念嘅臉孔呢？無錯，佢哋同你哋一樣，係第四層遊戲另一個場地嘅生還者，而且同樣喺呢棟大廈裡面。喺接落嚟嘅遊戲，你哋兩組人將會喺呢棟大廈進行遊戲！』

我無將挪亞嘅話聽入耳，因為見到夏舞同駱譯佢哋無事，一時之間實在太過興奮。

「睇嚟大家都好似見到識嘅人。」行山男冷笑一聲。

「唔通你無？」泰拳女問。

「同我一齊嚟嘅人早就死晒，得返我一個。」行山男冷冷咁講。

「係咁啊……你真係唔好彩。」

唔單止我同鬼仔，莉莉、Ellie、阿曉，其他人都目不轉睛望住屏幕上嘅人，只係得行山男同神父無咩反應。

咁係理所當然，因為除咗夏舞同駱譯之外，重有其他認識嘅臉孔喺當中——

傑少……重有倪少賢。

倪少賢嘅出現對我嚟講唔係太意外，因為我熟悉佢份人，所以我知道呢個篩選嘅遊戲唔會將佢嘅腳步拖下。

反而係傑少……第一眼望到有啲驚訝，但諗深一層，只要可以好似佢咁不擇手段，再加上一點運氣，的確係喺遊戲中十分有優勢。

「傑少……！」鬼仔見到傑少嘅樣，竟然露出憤怒嘅表情。

「鬼仔，你睇下先……」詩詩向鬼仔講：「係雷爺。」

詩詩嘅目光停留喺屏幕上嘅另一個人，係一個髮型清爽，雙眼有神，著住運動褸嘅少年。

我記得佢……係第二個遊戲時同古朗一齊上嚟搵我哋嘅運動男，不過當時對佢無乜印象所以好快唔記得咗。

「雷爺都無事……」鬼仔一剎那露出開心嘅表情，但好快就收起嘴臉，「但係Bobo唔喺呢九個人之中，即係Bobo已經死咗。」

「佢哋係……？」我講。

「佢哋都係我嘅同學。」鬼仔答，「我、詩詩、雷爺、Bobo、Charlotte、阿欣……重有你見過嘅曉婷，同埋鬼捉人遊戲時俾單車手打死嘅Anson，大家都係同一間學校嘅同學。」

「原來係咁……」

估唔到會有咁多認識嘅人同時捲入呢個篩選。

但係同時，亦會見到更多認識嘅人死喺眼前。

雖然呢刻鬼仔同詩詩表情平淡，但佢哋心裡面一定十分傷感。

我掃視屏幕上嘅人……夏舞、駱譯、傑少、倪少賢、鬼仔嘅阿哥，同埋鬼仔口中嘅雷爺。

除咗佢哋，重有一啲唔認識嘅人。

不過我嘅視線停留咗喺某個人身上——

我記得呢個壯漢……佢叫做堅哥，係第二個遊戲時1609嘅人，愛兒嘅同伴。

當我望見佢，就不由然諗起愛兒喺我面前被射殺嘅一刻……

實在係痛苦記憶。

『大家已經認得對面嘅臉貌喇嘛？咁事不疑遲，最終層遊戲即刻開始！』

挪亞講完呢句之後，聲音就消失於廣播之中，而隔咗陣電視屏幕又變成一片雪花——

「唔係講笑啊嘛……」

我希望只係我一時睇錯，但係……事實就係咁殘酷。


指令內容非常長，一時間我未能理解到成個內容。

但已經唔重要。

因為當我見到其中一行字時，心情就瞬間崩潰落嚟——

遊戲完結之後，人數較少嘅人方會全員受到懲罰。

咁嘅話……



我同夏舞、駱譯之間，就必定要有一方要死……