從西鐵醒返之後……: 40【5/F 死鬥大廈】
＊
遊戲……完結？
面前嘅怪物張開尖牙利齒嘅血盆大口，而且重傳出陣陣惡臭，但係佢無咬落嚟我度，而係停止咗動作。
沙沙沙——
怪物佈滿腐肉嘅皮膚一層一層剝落，瞬間融化為一攤血水。
一陣惡臭瞬間傳入鼻腔中，臭到我差啲就當堂想嘔出嚟。
但係我著眼點並唔係呢樣。
我並無踩到鐵罐，但遊戲突然結束，係因為玩家人數剩返九個。
而喺呢個廣播播出之前嘅幾秒，Suki喺我眼前俾怪物殺死咗。
換言之，當時只係得返十個生還者，當Suki死咗之後，玩家人數剩餘九個，所以遊戲就結束。
到頭來，我同Suki唔單止係爭奪最後生存名額嘅對手，而且爭奪者就只係得我哋兩個。
Suki嘅屍體就喺我身後，佢最後嗰刻展現出嚟嘅笑容，大概係放棄咗殺人呢種現實嘅做法，打算同我堂堂正正去爭最後一個鐵罐。
不過最後佢竟然俾突如其來出現嘅怪物殺死，真係令人諷刺。
我腳邊唔知幾時多咗個斜孭袋，袋入面有大量朱古力同能量棒，兩支水，重有一支電筒。
望到堆嘢食同水，先察覺到原來而家有幾咁肚餓同口渴，不過我選擇孭起斜孭袋，離開呢個惡臭連連嘅地方，搵個有得坐嘅位先停低休息食嘢。
雖然遊戲完結，但廣播仍然有其他指示……篩選重未完結。
並且將會係最後一場。
我坐喺一舊大石上，然後好好咁食嘢同飲水，回復一下體力。
兩個鐘時間都算充裕，遊戲玩咗咁耐呢座山嘅高度大約都感覺到，休息一陣然後由呢度上去應該重趕得切。
而且而家身體狀況，亦唔容許我再繼續行動。
「夏舞、駱譯……」我不自覺講出佢哋嘅名。
佢哋一個二個都生死未卜，但十八個出線者之中一定要有你哋份……！
休息完之後，就向山頂進發。
一路上偶爾都會見到深紅色嘅血水，同埋死狀慘不忍睹嘅屍體。
大約行咗半個鐘，終於到達山頂，喺最頂點位置有個十分殘舊嘅石屋。石屋外牆剝落，鋼筋外露，塵埃滿佈，重有啲蜘蛛網黏喺外牆，彷彿唔知幾多年無修葺一樣。
我將手放落生晒鏽嘅門柄上，準備將蛀蝕晒嘅木門打開。
剩低嘅人都應該聽到同一個廣播，跟隨指示上到嚟山頂呢個石屋，所以只要一打開門，就可以知道生存落嚟嘅人。
唔該，一定要見到夏舞同駱譯佢哋……！
我拉動門柄，將木門推開。
「大哥哥！」一打開門，第一個見到嘅人就係詩詩。
「詩詩……」
詩詩企喺門前驚呆咁望住我。
「小妹妹，我先無咁容易死。」我拍一拍詩詩個頭，然後望向屋內眾人。
屋內嘅人紛紜將目光移到我身上，計埋我同詩詩，呢度一共有七個人。
夏舞、駱譯……！
我即刻掃視眾人臉貌，只不過……夏舞同駱譯並唔喺呢間屋裡面。
雖然見唔到夏舞同駱譯佢哋，但就見到另外兩個我認識嘅人，而且其中一個對我嚟講佢嘅存在並唔係話十分意外。
「Ellie。」我望向企喺角落，露出十分驚訝表情嘅Ellie。
「點解你……」Ellie瞪大雙眼，不可置信咁望住我。
除咗Ellie之外，阿曉都喺呢間屋度，就企咗喺Ellie隔籬。
阿曉見到我之後，一瞬間露出訝異嘅神色，不過好返又變返平時毫無表情嘅臉。
「你哋無死實在太好。」我平淡咁講。
Ellie見到我嘅出現，驚訝得一時間畀唔到任何反應，呆若木雞企喺原地。
我重記得Ellie將我推落山。
Ellie……佢心中應該認為係我害死佢哥哥，所以先做出咁嘅行為。
雖然如此，不過我並唔痛恨佢，就結果而言我平安無事，而且學修洛文咁講——當一個人絕望之時，心靈就會扭曲。
可以嘅話，我想向佢好好解釋清楚，彌清成件事嘅誤會。
不過似乎而家唔係時侯。
挪亞罕有地喺遊戲結束之後，唔係以迷暈我哋或者瞬間轉移嘅手段將我哋聚集，而係要我哋自行到達山頂石屋集合。
今次佢又想話咩把戲……？
我觀望屋內環境，但發生呢度比起想像中格格不入。
原本我以為室內應該同石屋外表一樣殘破，只有爛地一塊，咩嘢設備都無，但而家我赫然發現頭頂掛住一盞LED嘅長燈，而且屋內牆身地板非常潔淨，同屋外係兩個世界。
眼前重有一部電視機，一張梳化，一張長檯同幾張凳，而右方有三間房，一間廁所，一間廚房，最後一間房裡面則擺放咗一張床。
問我第一印象嘅話，呢度比起係荒山小屋，更似公屋住宅，甚至同我屋企無咩分別。
唯一突兀嘅地方，就係其中一面牆有三隻紅色噴油寫出嚟嘅字。
「End and Rebirth……？」我皺起眉頭望住呢三隻字。
「呵欠……」一個著住sport bra同運動短褲，身型同線條突出，睇落似係打泰拳嘅少女忽然出聲，「我哋重要等幾耐？」
「斷估要等齊所有人掛。」另一個戴住cap帽，全身行山套裝嘅男人挨住牆邊，「雖然呢座山細，有顯眼嘅山徑行上嚟山頂，但喺咁黑嘅環境底下，蕩失路都係好正常。」
「喔……」泰拳女講，「唔知最後兩個人會係點樣嘅人。」
「無估錯嘅話應該齊人之後，就會開始最後一個遊戲。」行山男講。
無錯，呢間房計埋我都係得七個人，換言之重有兩個人仍然未到達石屋。
如果……嗰兩個人時限內到達唔到石屋，又或者死咗嘅話，咁會點樣？
挪亞特登將所有玩家分為兩批同時進行篩選，必定有佢嘅目的……或者關聯到嚟緊最後一個遊戲嘅發展……
大家默不作聲等待，除咗我同詩詩，以及Ellie同阿曉之外，其他人都係各自各靜待，彼此之間並無交流。
我察覺到身旁嘅詩詩低下頭，雙手握得非常之緊。
「你……擔心緊鬼仔，係咪？」我問。
詩詩微微點一點頭。
呢刻我唔知應該點安慰佢好，畢竟我已經講咗一次鬼仔仍然在生呢種毫無根據嘅話，如果到最後鬼仔無出現喺佢面前嘅話，只會令佢更加絕望。
但係，我相信鬼仔一定會返嚟搵詩詩……呢個大概係同為男人之間彼此嘅心靈相通。
「放心喇，鬼仔無跌穿跌爛嘅話，一定會成功嚟到呢度。」我選擇向詩詩講多次毫無責任嘅話。
只不過我哋呢度只係得返兩個名額，如果鬼仔真係仍然生存，咁呢邊生存名額就只係得返一個……
唔足以俾夏舞同駱譯佢哋平分……
唯一嘅盼望就係夏舞同駱譯佢哋喺另一邊場地，而且都取得最後嘅生存名額……
詩詩忐忑不安咁等待著，而我亦戰戰兢兢盯住木門。
無幾耐，外面又傳嚟一陣腳步聲——
而且唔係一個人嘅腳步聲。
喀嘞——
兩抹身影映入我眼前，一個係身型比較矮小嘅身影，而另一個則係身材比較突出嘅少女身影。
詩詩雙手掩嘴，愣望住眼前呢個男仔。
「詩詩，我嚟遲咗。」滿臉傷痕嘅鬼仔露出潔白嘅笑容。
「鬼仔！」詩詩衝過去，用力抱緊鬼仔。
「做乜啫你，我先唔會咁易有事。」鬼仔一邊掃住詩詩嘅背安慰佢，一邊望向我講：「唔該晒你照顧詩詩。」
「唔使。」我對住眼前呢個令人驚喜嘅男仔講。
不過令人驚喜嘅唔止係得鬼仔一個，我將視線移到另一個人身上。
「莉莉……」
莉莉撥一撥佢啡色嘅曲髮，抹一抹額頭上嘅汗，然後講：「估唔到我哋竟然可以再次見面。」
「我都估唔到，遊戲開始咗咁耐我都無見到你嘅蹤影。」我講。
「總之大家無事就好。」莉莉緩緩步入石屋，然後將門閂上。
最後兩個人係鬼仔同莉莉，換言之駱譯同夏舞嘅下場只有兩個可能性——
喺另一邊場地，又或者……已經死咗……
我希望係前者。
九個人已經人齊，但係依然無任何事情發生。
「齊人啦喎……」泰拳女雙手抱胸，唔耐煩咁講。
「咁等法真係令人折磨……」行山男講，「睇怕要等兩個鐘過咗之後，先會開始最後嘅遊戲。」
「你哋啱啱就一直喺度等，無其他嘢發生？」莉莉問。
「無錯。」行山男點頭。
「話時話……」莉莉行到用紅色噴油寫咗三隻字嗰道牆前，「End and Rebirth，呢三隻字係咩意思？」
「我哋都唔知，一入到嚟就已經見到。」泰拳女手指公指住行山男，「或者你可以問佢，佢好似係第一個到。」
「我入嚟嗰陣就已經有，應該係對方故意寫畀我睇。」行山男答，「但至於係純粹用嚟搞氣氛，定係有其他意男，就唔知道。」
望住呢三隻字，我又諗起另一隻字——
「noitalever」
係喺第一個遊戲完咗之後，喺西鐵上見到嘅字。
我問行山男同泰拳女佢哋：「你哋喺第一個遊戲完咗之後，喺西鐵度時有無見過一隻N字體嘅奇怪英文字？」
「你話revelation？」行山男講。
「……revelation？」
「係個簡單嘅文字遊戲，倒返轉就係revelation，即係啟示。」行山男將一直以嚟嘅謎團解開。
「啟示……」我恍然大悟。
「但你問我點解我都唔知道，正如眼前呢三隻字一樣，就算睇得明係咩字，都唔明係咩意思。」行山男搖頭嘆氣一聲，「想知嘅話，睇嚟要問一問專家。」
「……專家？」
呢個時侯，有個身穿黑袍，留著長髮，頸上戴住一條十字架頸鏈，十足十成個神父咁嘅大叔行出嚟。
我、莉莉、詩詩、鬼仔、Ellie、阿曉……再加埋泰拳女同行山男總共八個人，而剩低嗰個人就係呢個一直無出聲嘅神父。
神父行到我哋面前，一臉驚愕咁向我哋講：「大家，請務必要聽我講！」
「呢個人……做咩事？」鬼仔展現出無奈嘅反應。
「唔知。」我搖一搖頭，「不過佢話晒都係經歷咗四場遊戲嘅人，我諗最好唔好睇小佢。」
大家都俾神父突如其來嘅舉動而引去注意，而神父保持住驚愕嘅神色，中氣十足咁向我哋講：「呢個遊戲只係一切嘅開端……之後會有更重大嘅災難發生……」
「人類文明將會終結，而我哋……將會面臨人類文明嘅末日！」