從西鐵醒返之後……: 38
怪物嘅巨爪揮到詩詩嘅頭頂，然後停低落嚟。
詩詩連發生咩事都未反應得切，只能呆木若雞企喺原地。
四隻怪物包圍住詩詩，其中一隻更加舉起巨爪揮過去，但突然間佢哋全部停低所有動作，無再郁動。
『鐵罐數目只剩三個，請各位加油。』
廣播傳出，即係詩詩成功踩扁鐵罐，但係……而家應該點做好？
按照常理，應該係叫詩詩趁呢個機會逃脫怪物嘅魔掌，但怪物停止追殺嘅情況前所未聞，萬一驚動到佢哋嘅話可能會令佢哋再次有所動作。
正當我苦惱時侯，怪物已經幫我作出抉擇。
四雙通紅嘅目光轉移到我身上，然後露出貪婪嘅表情。
「吼吼吼吼吼吼吼吼吼吼吼吼吼吼吼吼！」
「喂，我啱啱只係講下笑，你哋唔係咁小氣嘛……重有你啱啱先跳出嚟，又關你咩事？」
但怪物無理會我嘅說話，向我奔跑過嚟！
「大哥哥！」詩詩嘅叫聲傳嚟。
「你走先！搵個安全嘅地方！」我轉身拔腿就跑，「我會撇甩佢哋，然後自己一個將鐵罐搵出嚟！」
我講完之後，就躍出草叢沿坐山徑一路奔跑逃脫。
蓬蓬蓬蓬——
草叢同樹葉晃動嘅聲音響起，怪物喺我身後洶湧咁追住我。
睇嚟……佢哋真係好嬲。
「哈哈！」唔知點解呢個關頭，我竟然笑咗出聲。
因為直覺話畀我知，我一定可以擺脫怪物嘅追捕。
蓬—！
路邊嘅雜草叢發出強裂嘅晃動聲，一抹黑影從路邊撲出！
怪物從側邊繞到去我身旁，高舉巨爪向我揮過嚟！
千均一發之際，我向側邊跳去避開呢一爪，但喺跳嘅時侯唔小心拗到右腳！
「Shit……」我望住四隻怪物如同獵人般向我走近，準備狩獵我呢個弱小嘅獵物。
右腳拗親，雖然未至於行唔到，但腳踝傳來疼痛嘅感覺，就算咁跑落去遲早都會俾怪物追到……
我望向懸崖方向……唔通我要再一次從懸崖跳下？
正當將要走頭無路，我發現其中一隻怪物腳邊有樣嘢……
係鐵罐……
係紅色鐵罐！
怪物就嚟走到我身前，我咬緊牙關強忍痛楚，將電筒瞄住紅色鐵罐掟過去，然後即刻向後跑！
轟隆—！
爆炸嘅餘波將我成個人吹起，然後重重地跌落地上！
「啊……」我痛苦呻吟一聲，然後望向爆炸方向。
怪物，已經俾熊熊烈火燒得體無完膚。
雖然唔知道佢哋會唔會感到痛楚，但係呢刻我已經別無選擇。
山路已經被火焰斷開，即使我想去搵返詩詩亦無法通過呢度。
我拖住遍體鱗傷嘅身軀離開呢度，去搜索最後三個鐵罐。
而家連電筒都失去埋，只能以肉眼去觀望前方道路，變返好似一開始咁只有大約十米左右嘅視野。
我從斜孭袋拎出一塊布……係修洛文俾我抹走臉上血跡嘅布，然後抹一抹身上嘅血跡同灰塵。
最後三個鐵罐，失去電筒，遍體鱗傷……可以話俾碌落山嗰陣更嚴重。
但係，我一定要通過呢場遊戲……！
就好似詩詩相信住鬼仔，我都相信夏舞、駱譯、莉莉佢哋未死，所以我一定要搵到鐵罐出嚟，咁先可以再見到佢哋。
「咳！咳！咳！」
我用手掩住嘴巴，放開手後卻發現手掌上有灘鮮血。
我驚愕咁望住手上灘血，但除此之外身體並無異常，唔係懲罰嘅徵兆……
睇怕，係我嘅身體受傷程度已經超乎想像。
雙腳愈嚟愈酸軟，眼簾愈嚟愈重，好幾次我差啲先停落嚟，但求生嘅意志總算勉強將我嘅身體撐住。
只不過，行咗差唔多半個鐘，依然搵唔到鐵罐。
『鐵罐數目只剩兩個，請各位加油。』
又少咗一個出線名額，只係剩返兩個鐵罐。
要憑住而家嘅身體狀態，喺一座漆黑一片嘅山上搵出兩個手掌大小嘅鐵罐係幾咁令人絕望。
不過未到最後，我都唔會放棄。
蓬—！蓬—！
前方傳來雜草晃動嘅聲音。
噠噠、噠、噠噠、噠噠噠、噠——
斷續嘅腳步聲從前方傳嚟，但無咗電筒嘅我無法睇到來者何人。
身體已經準備就緒，只要見到稍微唔似人類嘅肢體，就即刻轉身拔腿就跑。
「哈哈……」
一把虛弱嘅笑聲傳出，聲音……十分熟悉。
「……阿逸先生。」
我終於望清發出聲音嘅人係邊個——
「Suki。」
我訝異地望住眼前呢個女仔，喺幾個鐘前我曾經見過佢，當時嘅佢四肢健全，狀態精神。
但而家嘅佢頭髮凌亂，臉上沾滿污垢，校服鈕扣全部鬆開，而且……重少咗一隻手。
「你……肯定係望緊我隻手。」Suki左手大半截手臂唔見咗，斷口附近搵條布帶包住，「想話呢個就係上天對我拎古朗去做誘餌嘅報應呢。」
「我無講過。」我即刻否認Suki嘅話，雖然心裡的確係有諗過，「你做咩會搞成咁？」
「係嗰堆來歷不明嘅長手怪物，將我隻手撕斷……」Suki嘅聲線比之前虛弱好多，「之後重有兩個男人想強姦我，不過我憑自己嘅能力成功走甩咗。」
我啱啱發現，Suki右手拎住一枝前端尖銳，而且滴住血嘅樹枝。
好自然咁，我將滴血嘅樹枝同埋Suki從兩個男人手上走甩呢兩樣嘢聯想埋一齊。
「你睇落好似好唔掂咁。」我講。
「咁又點……只要可以生存落去，幾辛苦我都會捱落去。」Suki瞇起雙眼望住我，「講咁多無謂嘢，而家係可以食飯傾偈嘅時間咩？」
「係我多管閒事。」我搖一搖頭，「我好心問一問你。」
「哈！你嘅情況都唔係好得幾多，你都係同我一樣差唔多——」
『鐵罐數目只剩一個，請各位加油。』Suki講緊嘢嘅時侯，廣播又一次響起。
我哋聽到廣播之後，都頓時沉默落嚟。
因為，鐵罐只係剩返最後一個。
「哈哈哈哈！」Suki突然大笑起嚟，「終於到返一個……不過，呢度有兩個人。」
Suki嘅氣氛有啲異樣，而我亦即刻提高警戒心。
「今個回合講明只要剩返九個人，遊戲就會結束，你知唔知係咩意思？」Suki憔悴嘅臉容露出陰森嘅笑容，「就算搵唔到鐵罐，只要殺剩九個人，遊戲一樣會完結！」
Suki舉起樹枝向我插過嚟，我即刻用雙手將樹枝捉住！
「所以我要殺死你……」Suki出盡全力咁將樹枝刺過嚟，「去死喇……！」
樹枝嘅尖端喺我眼前幾厘米位置，不過Suki只有一隻手，係唔夠兩隻手嘅我鬥力氣。
我直接將樹枝搶過嚟，然後掟到一旁地上。
「重未完！」Suki向我嘅頭踢出掃堂腿，我反應唔切俾佢踢倒地上。
之後，Suki執起地上樹枝，然後向我插過嚟！
只不過，我並無出手阻止。
因為樹枝將要插落我身上嘅一刻，就停咗落嚟。
我望住眼前人，然後緩緩咁講：「你根本就無殺人嘅勇氣。」
Suki嘅表情雖然非常猙獰，但係佢嘅雙眼卻流下兩行眼淚。
熾熱嘅眼淚滴落我臉上。
「嗚……嗚……」
「收手喇。」我將樹枝緩緩挪開，「其實你內心之中重有良心嘅部分，你每次做錯事嘅時侯都會覺得內疚。」
「……你又識啲咩？」
「就係因為想自己過得安樂啲，所以先會用唔同理由去幫自己掩釋。」我講。
「無錯，嗰兩個人我唔係存心殺佢哋，係佢哋想強姦我，我自衛所以先殺咗佢哋。」Suki講出真相，「但係，呢刻唔正常嘅人係你先啱。」
Suki似乎已經放棄咗殺人嘅念頭，佢企起身望住我。
「可以大條道理講點樣去為人付出的確係好偉大，但係為咗理實而搏命生存落去嘅人先係最正常不過！」Suki緩緩咁講，「你為咗你嘅大義，但我都為咗我嘅性命去奮鬥，唔通咁樣就代表我係一個十惡不赦嘅人咩？」
我無諗過Suki會同我講呢番咁嘅話。
「你唔係一個十惡不赦嘅人，我亦明白你係一個點樣嘅人……」我企起身同Suki對望，「但係，我都有唔可以退讓嘅地方。」
如果你係為咗自己條命，咁我就係為咗我珍視嘅所有人，無論係已經死去嘅人，定係可能仍然活著嘅人。
「既然你已經明白呢個道理，點解你要勸我收手？點解你唔出手殺死我？」Suki問，「就算你唔咁做，我哋兩個點都要死一個！」
「因為……」呢刻修洛文嘅臉容以及聲線，浮現喺我腦海之中同我重疊起嚟，「雖然可能係毫無意義嘅行為，但比起為咗現實而喪失理智，至少可以驕傲咁保持自我而活到最後。」
Suki聽完之後，對住我苦苦一笑。
「我明白喇……果然你呢種人嘅思維，係無可能理解得到。」Suki露出釋懷嘅笑容，「但係我會為咗最後一個鐵罐而搏命，所以——」
Suki講講下忽然停咗落嚟。
唔係……
原本企喺我眼前嘅短髮少女，而家只係剩低著住校服嘅軀幹。
咚—！
鮮血從頸部大量噴出，溫熱嘅液體統統噴晒落我身上。
失去頭部嘅軀幹緩緩向前倒下。
發生咩事……係幾時——
嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄——
連續嘅咬合聲不斷傳出，而且就係喺眼前。
點解……怪物會出現？
全身滿佈腐肉嘅怪物，拎住一個類似球狀嘅物體，嘴巴不斷咁郁動。
嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄嗄——
我唔敢去望眼前發生嘅事情。
我打算即刻逃跑，但轉身嗰下卻發現身後有兩隻怪物。
「吼吼吼吼吼吼吼吼吼吼吼吼吼吼！」
其中一隻怪物張開惡臭嘅嘴巴，向我咬過嚟！
但就喺要咬落去嘅一刻，怪物忽然停止咗動作。
發生咩事……
『玩家人數剩下九個，場地二遊戲完結。補給包已傳送到各人附近，請各位玩家在兩小時內到達山頂的石屋。』
＊
第四層遊戲生還者總結：
佟逸霖
詩詩
其餘未知。