從西鐵醒返之後……: 37
回合完結……！
「修洛文！」我大叫道，但可惜已經遲咗。
鮮血緩緩從修洛文嘅雙眼同鼻孔流下，修洛文手掩住嘴，步履蹣跚挨落身後嘅一棵樹。
原本因為鬼仔嘅死而傷心嘅詩詩亦停止哭泣，企起身愣望住修洛文。
「咳！咳！」修洛文咳出兩口鮮血。
我見過好多人因為懲罰而死，但我第一次因為有人受到懲罰而感到痛心。
修洛文將孭喺單肩嘅斜孭袋放低，連同電筒一齊遞過嚟畀我。
「拎住。」
我接過斜孭袋同電筒，之後修洛文就慢慢坐落地下，用無力嘅手去翻弄牛仔褸嘅衫袋。
「唉……人生最後連一支煙都無得點。」修洛文從容一笑，睇落一啲都唔痛苦咁。
「修洛文，多謝你……」呢刻我除咗多謝之外，諗唔到任何話同佢講。
呢個係修洛文嘅決定，如果我向佢講對唔住，就即係去否定佢嘅心意。
至少，要同佢講句多謝。
望見呢個情景，就連詩詩都行咗過嚟，一臉悔疚咁望修洛文。
「對唔住……我錯怪咗你。」詩詩以極微嘅聲線講。
修洛文合上眼搖一搖頭，然後望向我講：「阿逸。」
「係……！」
修洛文好少叫喚我嘅名，但係呢下叫聲，好親切。
「就算一路以嚟嘅選擇全是缺陷，都要堅持自己嘅路。」
修洛文氣若如絲，彷如係用盡最後一口氣將話吐出。
「你要記住，如果連自己都否定自己嘅答案，就無人會相信你嘅選擇。」
「我……一定會記住。」我將修洛文嘅話牢牢記於心中。
修洛文向我微微一笑，然後又猛然咳出幾口鮮血。
「……我想靜靜坐喺度。」呢句係修洛文最後講嘅一句話。
修洛文背靠樹木坐喺地上，仰望天空。
天空雖然只有一片漆黑，除此之外就咩都見唔到，但我相信修洛文一定望到掛喺天上嘅嗰兩粒星星——
嗰兩粒佢最珍重而又想守護嘅星星。
我向詩詩示意離開呢度，等修洛文可以寧靜度過最後嘅時光。
「多謝你。」臨走之前，我再向修洛文道謝多次。
修洛文最後同我講嘅一番話，令我諗起一句歌詞——
『所有抉擇難做對，得決定無默許。』
無人有義務對另一個人嘅性命負責，但修洛文將佢嘅性命托付畀我。
重有古朗同愛兒……好多人都因為呢場篩選而死去。
所以喺呢刻，我條命嘅存在價值再唔係單單生存落去，而係背負所有人嘅不甘、悔疚，以及希望，將呢場篩選嘅真相搵出嚟。
多謝你，修洛文。
你令我將眼前嘅霧霾抹去，挺起胸膛去面對呢場篩選。
我拎住修洛文畀我嘅電筒，照住前方漆黑一片嘅林路，繼續前進。
寂靜無聲，只有樹葉晃動嘅聲音。
無錯……今個回合同上個回合一樣，都係無音樂播出，而且呢次廣播比之前多咗一句嘢——
當玩家人數剩餘九個時遊戲會即時完結。
換言之，呢個回合就係最後一個回合。
詩詩低頭默不作聲跟住我行，而我亦無講咩特別說話，就咁樣兩個人去搵最後嘅鐵罐。
「其實……」行行下，詩詩忽然出聲，「佢唔係壞人。」
我愣了愣，無諗過畀人印象任性同大小姐嘅詩詩竟然咁講。
「我唔係有心講啲咁難聽嘅嘢，但係……我忍唔住。」
「唔緊要，我明白你心情。」我一邊行一邊講，「你都係因為鬼仔嘅事先會咁。」
詩詩聽到鬼仔，就默不作聲垂下頭。
「雖然發生咗咁樣嘅意外，不過……我唔認為鬼仔就咁死咗。」我講。
「你……話鬼仔未死？」詩詩驚愕咁望住我。
「係，你有無諗過鐵罐得手掌咁大，但每個回合都唔使一個鐘就完結，呢座山或者比想像中細」呢個係我將幾個回合嘅經驗總合得出嘅結論，「我推斷嘅話……可能一百米高都無。」
「咁……所以鬼仔未死？」詩詩嘅眼神流露出希望。
「其實喺遇到你哋之前，我就試過跌咗落山一次，但結果只係輕微擦損手腳。」我向詩詩展示身上傷痕，「除非係垂直懸崖，如果唔係……我諗佢應該仍然未死。」
「咁我要返去搵鬼仔！」詩詩任性嘅表情又出現。
我苦笑一聲，明明遊戲重未完結，但知道鬼仔可能未死之後，就執意要去搵返鬼仔。
不過我唔討厭呢個做法，雖然佢哋之間經常有爭拗，但彼此之間內心仍然係關心對方。
反正鐵罐位置已經刷新，行過去嘅途中一樣可以搜索鐵罐。
我同詩詩沿住原路奔跑，唔使幾耐之後就返到去鬼仔墮崖嘅位置。
「就係呢度。」我行到崖邊，拎住電筒照落去。
不過下方只要密密麻麻嘅雜草，唔見有任何人喺度。
「鬼仔呢？鬼仔喺邊？」詩詩見鬼仔唔喺度，不斷好焦急咁問。
「你小心啲先！」我將詩詩拉返去無咁近懸崖嘅位置，「既然鬼仔唔喺下邊，即係佢已經無事離開咗。」
「真、真嘅？」詩詩眼泛淚光。
我諗返起鬼仔同我講嘅話，然後同詩詩講：「鬼仔重有一件十分重要嘅事未做，所以佢一定唔會咁容易就死。」
鬼仔雖然生咗一副稚氣嘅臉容，但係佢認真起嚟時嘅表情可以話比男人更加有男人味。
『鐵罐數目只剩八個，請各位加油。』
廣播突然播出。
「剩返八個……！」我驚訝咁講。
雖然唔知點解會有廣播提示，但廣播嘅出現，即係代表已經有人成功踩扁鐵罐！
詩詩慌亂咁問：「點算——」
『鐵罐數目只剩七個，請各位加油。』
廣播接二連三播出，鐵罐數目又少咗一個！
情況開始變得危急，我馬上同詩詩講：「我哋要加快腳步去搵鐵罐出嚟，咁你先可以再見到鬼仔！」
「嗯、嗯！」詩詩用力咬住唇點頭。
我帶住詩詩打醒十二分精神沿路搜索。樹邊底下，雜草草叢，每一個角落都一個不漏咁搵。
不過我哋搵咗將近二十分鐘，仍然未搵到一個鐵罐。
『鐵罐數目只剩六個，請各位加油。』
又有一個人搵到鐵罐！
每少一個鐵罐，生存名額就少一個，我哋嘅生存機會就會變得更低。
「呼——呼——」詩詩氣喘吁吁，而且重有啲臉青口唇白。
「你得唔得？」我慰問詩詩。
「我無問題，再頂得順……」詩詩死頂住咁講，「我一定要搵到鐵罐，再見到鬼仔！」
詩詩雖然係個任性同蠻不講理嘅人，但而家我對佢嘅印象開始有改觀……至少我俾佢呢刻嘅決意打動到。
我打開修洛文嘅斜孭袋，裡面嘅糧食已經食得七七八八，水亦剩返好少。
我將僅餘嘅水遞畀詩詩，同佢講：「飲啲水，會好啲。」
詩詩接過水樽，微微一笑講：「唔該你。」
『鐵罐數目只剩四個，請各位加油。』
呢次廣播鐵罐數量竟然直接由六個跳到去四個……！
咁樣落去我哋會一個鐵罐都搵唔到就玩完……！
但至少……一定要俾我身後呢個細佬女踩到一個鐵罐先！
蓬—！
微風吹過，雜草緩緩晃動。
「等等！」我示意詩詩聽低。
「做咩？」詩詩不解咁問。
我企喺原地，細心聆聽周圍嘅聲音。
蓬蓬蓬—
嗄嗄嘞嗄嗄嗄嘞——
雖然十分斷續而且微弱，但呢道聲音……的確係怪物嘅聲音！
怪物……怪物……
假如有怪物嘅話……就一定會有鐵罐喺附近！
怪物嘅目的係守住鐵罐，呢樣嘢係修洛文話畀我知。
「你小心跟喺我後面，萬一發生咩事嘅話，唔好理我即刻跑！」
我同詩詩講完之後，就舉起電筒，俯身小心翼翼咁向路邊佈滿雜草嘅泥地行去。
喺三棵樹中間嘅空地，有個綠色鐵罐喺中間。
「係鐵罐——」
我即刻將詩詩嘅手掩住，因為……喺鐵罐周圍嘅樹林中，三雙通紅嘅目光從黑暗中映出。
——係怪物。
怪物似乎未發現到我哋，但就牢牢盯住鐵罐，原地不動守住呢度。
「點算好……？」詩詩細細聲問。
怪物同鐵罐之間只有幾米距離，而且重係三個方向圍住鐵罐，貿然出去會非常危險！
但係鐵罐就係我哋眼前，我哋唔可以放棄任何一個機會！
方法，只有一個。
「詩詩，你匿喺度唔好出聲，我會去引開班怪物。」我喺詩詩耳邊輕聲講，「你就趁呢個機會偷偷地去踩扁鐵罐，然後逃走！」
「你……認真㗎？」詩詩驚訝叫咗聲。
「喂！」我即刻掩住詩詩嘅嘴巴，但係已經太遲。
怪物俾詩詩啱啱嗰下叫聲驚動到，三雙通紅嘅眼睛正向我哋走近。
「弊傢伙……無計喇！」我企起身，然後同詩詩講：「你照我嘅說話去做！」
外表滿佈腐肉，身體修長，雙手可以輕易撕裂肉體嘅怪物一步一步行過嚟。
「喂！你班發育畸形嘅二世祖，有膽同我單挑賽跑！」我向同詩詩相反嘅方向行，「不過睇死你哋都唔敢㗎喇，成班生到弱智咁款，唔好講話賽跑，唔去搵媽媽話要吃奶奶就已經好好㗎喇！」
「吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼！」
唔知係咪我錯覺，佢哋好似真係俾我嘅話激嬲咗。
噠噠噠噠噠噠噠噠噠噠——
急步而震耳嘅跑動聲傳來，怪物向我奔跑過嚟！
無錯……就係咁樣！
去呀，詩詩！
詩詩趁住怪物俾我引開，不經不覺行到鐵罐面前，準備將鐵罐踩扁。
但鐵罐面前嘅嗰棵樹後面，竟然重有一隻怪物！
「小心呀！」我高聲大叫。
嗰隻怪物從樹後躍出，猛然向詩詩撲過去！
唔單止嗰隻怪物，就連原來打算過嚟追我嗰三隻怪物，都轉身往詩詩衝過去！
喀嘞—！
其中一隻怪物舉起深紅色嘅巨爪，瞬間向詩詩揮去！
「唔好啊！」
我原本以為……又要有多一個人死喺我面前。
但係之後落嚟嘅事情更令我驚訝——