從西鐵醒返之後……: 3
大家依照指示行去黃線前方，鑑於終點係車頭嘅車門，大家都盡量湧向靠近列車嘅月台一邊，而我、莉莉、駱譯幾個咁啱喺靠近月台嘅位置。
『睇嚟大家都準備好，事不疑遲，遊戲正式開始。』
挪亞嘅沙啞聲音消失於廣播中，接踵而至嘅係熟悉又親切嘅港鐵廣播女聲。
只不過，廣播嘅內容再唔係貼心嘅提示。
『請各位乘客，請前進七步。』
雖然話唔係熟悉嘅廣播，但廣播內容十分清晰，毫無弄虛作假嘅意思。
不過，過咗大約十秒之後，仍未有人敢踏出第一步。
雖然係簡單嘅指示，但只要一時差錯行多咗一步，就會變成同眼前兩條屍體一樣。
而且，大家仍然對嗰對男女越過黃線而被射殺呢件事心有餘悸，連踏出第一步越過黃線都唔敢。
「啊……」駱譯驚訝地叫咗一聲。
呢個時候，有個高大嘅身影踏出第一步，越過黃線……
係一個身穿牛仔嬲，留住濃密鬍鬚，眼神兇神惡煞嘅中年男人！
眨眼間，佢已經行完咗指示所要求嘅七步。
「無聊遊戲。」鬍鬚男冷冷留下一句。
大部分人都以十分驚訝嘅眼神望住鬍鬚男，同時亦因為見到鬍鬚男平安無事完成指示，好快就有第二個、第三個……甚至更多人踏出佢哋嘅步伐。
「點解嗰個人可以咁夠膽，直接衝出去⋯⋯佢唔驚死咩？」駱譯震驚咁講。
「總有啲人係特別大膽。」我接著講出自己諗法，「同埋，如果挪亞係有心想殺我哋，佢可以隨手好似啱啱嗰對男女咁殺死我哋——只要抱住呢個諗法，就無咩好驚。」
我跟隨眾人嘅步伐，數清步數前行七步，駱譯、莉莉同斯文男亦緊隨其後。
行嘅時侯，我哋途經死去嗰對男女身旁，佢哋一副死不瞑目嘅模樣。
我好快就移開我嘅視線，繼續前行，直到行到七步先停下步伐。
唔使半分鐘，大半數人都成功完成指令。
只要大家有數清楚步數，就唔會有任何問題。
「挑！得未啊？行路呢啲咁簡單嘅嘢，弱智都識行喇！」阿叔囂張地叫道，大聲到成個月台都聽到，「都唔知有咩好驚，一個二個正一懦夫！」
「喂，你可唔可以靜少少，你把聲好嘈。」莉莉頂唔順阿叔嗰種態度，「你咪又係匿埋後面，睇人哋行咗你先行！」
「我呢啲叫靜觀其變，點同你哋班廢青呀？重有我係鍾意大聲講嘢，關你乜撚事咩？」
「你——」
「冷靜。」莉莉嬲到想衝過去咁濟，而我馬上截停佢。
如果我無咁樣做，話唔定莉莉真係會踏出第八步。
不過，阿叔並無諗住收口。
「挑！而家啲後生……啊啊……好痛！」
阿叔講講下，忽然痛苦咁捏住自己條頸，只見佢臉色發紫，鮮血從佢嘅眼耳口鼻漸漸流出。
佢用盡氣力，先緩緩吐出到一句：「啊啊啊啊……救命啊……救命啊……」
「發生咩事……？」我驚訝地望住眼前情景，阿叔咚一聲倒在地上，白色地板被鮮血染紅。
「啊！」
身後傳嚟駱譯嘅尖叫聲，我即刻回頭一望——
駱譯依然安然無恙企喺度，但係佢身後超過十個人出現同阿叔一樣嘅徵狀！
佢哋全部倒臥地下，七孔流血，身體不停抽搐……！
「救我……求你……」阿叔伸出沾滿鮮血嘅手。
大家都呆咗咁望住倒在地上嘅人，但無人明白發生緊咩事情……
唔通……佢哋係因為無行夠指定步數，而遭受到懲罰？
下一秒——
『判定時間到，合格人數：二十八，不合格人數：十四。』
廣播聲響起，宣告咗眼前呢幕情景嘅原因。
「十四個人……」駱譯嘴巴顫抖咁講。
「第一round就有十四個人數錯步數而死。呢種死法，真係望見都覺得毛骨悚然……」斯文男默默望住倒臥嘅人群。
佢哋……係因為行錯咗步數而受到懲罰？
假如一個人行錯算叫唔好彩，但明知懲罰係死嘅情況下，竟然同時十四個人數錯步數？
而且，啱啱阿叔重好囂張咁大叫，自信十足嘅佢無可能唔知自己行咗幾多步。
無論點諗，成件事都係好奇怪……
大家望住眾多倒地嘅血人，有人驚到大叫，有人頂唔住要作嘔，亦有人相對冷靜咁靜觀其變，但似乎無人對呢件事感到詫異。
我望向阿叔，佢已經停止咗抽搐，雙眼同嘴巴張大，鮮血繼續從七孔流出，一副死不瞑目嘅樣。
我諗後方同樣情況嘅人，都一樣下場。
雖然阿叔係有啲煩人，態度係好差，但我諗點討厭一個人，都大概唔會希望對方會死喺眼前掛……除非佢係我嘅殺父殺母仇人——
唔係，應該係殺母仇人先啱，因為我童年時已經再無父親。
『請各位乘客，請前進三步。』
一分鐘過去，廣播播放下一回合嘅指示，幸好嘅係我唔使再經過屍體多一次。
大家好快就完成三步嘅指示，靜待一分鐘嘅過去。
但係，心裡忐忑不安嘅我，忍唔住將上一回合嘅疑問道出。
「你哋覺唔覺得事有蹺蹊？」我向莉莉等人發問。
「有咩問題？」斯文男率先開口問。
「同時有十幾個人數錯步數，好似有啲問題……加埋嗰個阿叔咁有自信，點睇都唔覺佢連自己行咗幾多步都唔清楚。」我講。
「其實……我都覺得太過巧合，應該無可能同時有咁多個人數錯步數㗎？」莉莉同我嘅想法一樣，都認為當中有問題。
「會唔會……係佢哋腳尖轉咗方向，又或者向前滑咗下，所以計多咗一步？」駱譯唔肯定咁講。
「我都覺得係咁，再加埋本身無數清楚步數嘅人，有十四個並唔出奇。」斯文男理性咁分析，「同埋啱啱我都係跟住指示行咗七步，所以之後我都會相信指示繼續前行。」
斯文男講嘅話的確無錯，不過我心裡依然有所懷疑……無論係點樣嘅失誤，同時有十四個人都出現同樣情況實在太巧合。
只有等到今個回合判定完之後，先可以知啱啱嘅情景係咪只係「偶然」。
只不過，我嘅心跳動得相當劇烈，手不由自主顫抖起嚟。
「放心喇，我哋唔會有事。」莉莉忽然開口道。
「點解咁講？」我望向莉莉。
「女人嘅第六感。」莉莉講完後，好悄皮咁向我單眼一下。
我先係呆咗一下，然後無奈地嘆氣搖頭。
其實，我留意到佢嘅手震得相當厲害。
然後——
『判定時間到，合格人數：二十八，不合格人數：零。』
呢個回合……全部人都平安無事！
「嗱，我都話㗎喇。」莉莉自信滿滿咁講。
雖然心中依然存有疑慮，但既然事實擺在眼前，我不得不去相信。
按照呢次嘅結果，至少可以肯定只要依照指示前行，就唔會有任何問題。
一分鐘好快就過，新嘅指示已下達。
『請各位乘客，請前進四步。』
……
之後幾個回合，步數指示分別為四、五、四同埋二。大家依照指示前行，並無任何犧牲者出現。
「我哋離車頭，大概重有一半距離左右。」斯文男望向離我哋唔遠嘅車頭。
「如果毫無意外，過多幾個回合應該可以行到車頭掛……？」駱譯帶著憂慮問。
我哋已經行咗二十五步，按一步兩米去推算，係行咗接近五十米。如果保持住呢個進度，甚至之後嘅回合有更多嘅步數，我哋的確好快就可以到達車頭。
除咗一個狀況。
「無錯，假如——」
嗡——嗡——嗡——
月台嘅燈突然全部熄滅，剩下不祥嘅紅燈——
「哇！發生咩事！」
「做乜嘢……做乜又響起呢道警報聲？」
大家都俾呢道警報聲嚇到慌張大亂！
「喂！大家冷靜啲先！而家嘅情況係遊戲中所謂嘅十二點情況，並唔係越過黃線時嘅警報！」最前方嘅一個西裝男轉身大叫，「只要我哋即刻轉身跑返去黃線之後，就唔會有問……」
西裝男講到中途，忽然停滯落嚟，下一秒咚一聲倒在地上，背上插住咗一把黑色嘅箭……
呢個情況……同遊戲開始前殺死嗰對男女一樣！
「死咗人啊！」
「快走啊！快啲返去黃線後面！」
恐慌嘅叫聲響起，情況一片混亂！
雖然燈光昏暗，但係有一件事可以肯定——
箭係由前方射過嚟！
我望向前方，喺盡頭中央嘅位置天花有個黑色異物突出，但由於太暗關係，只係見到一抹半月形狀嘅黑影，睇落有啲似弓但又唔係，就好似十字弓咁。
「喂！重唔快啲跑！」
斯文男嘅叫聲將我拉返嚟現實，而家無咁多時間俾我思索，當下唯一要做嘅事係退回黃線後！
奪命嘅箭矢繼續射過嚟，我轉身往車尾方向奔跑，箭聲同慘叫聲於身後交替傳來。
不過前方嘅情況都唔好得幾多，啲人為咗活命，甚至不惜將其他人推開撞開，造成人踩人情況！
「喂！跑去呢邊！」有個OL打扮嘅女人指住對面月台，一邊跑一邊示意其他人跑過去。
但當佢跑到對面嘅時侯，一支箭矢筆直貫穿佢嘅胸膛！
即使跑到對面月台都無用……嗰部類似十字弓嘅機器可以瞄準成個月台所有位置！
如果係正常嘅月台，我哋或者可以匿喺電梯或者其他障礙物後，但呢個月台幾乎係空心，只得方柱林立，即使想一邊搵障礙物掩護一邊退後亦係相當困難！
「啊！好痛！」前方有個身穿校服嘅少女喺我眼前跌低。
但周圍嘅人並唔單止無意幫佢，甚至有人無視校服女踩咗落去校服女身上！
「唔好理佢，你幫唔到佢！」同我並排跑動嘅斯文男講。
的確……係連自己條命都唔知顧唔顧到嘅情況下，走去幫其他人係一件好不智嘅行為。就結果論嚟講，最後可能唔單止救唔到人，連自己條命都會無埋。眼前每一個人都係抱住呢種心態，所以就算佢哋嘅行為係點樣醜陋，都只不過係人之常情。
校服女奮力支撐身體，嘗試企返起身。
當我喺佢身邊掠過時，我嘅視線同佢對上。
「你……？」望住校周女，忽然有種莫名奇妙嘅熟悉感。
對方亦愣望住我，呢刻我嘅思緒變得混亂起來——
明明好似係似曾相識，但又講唔出係咩一回事……
「喂！」斯文男回頭大叫。
「你走先！我好快追上嚟！」
喺呢個危急嘅關頭下，我竟然選擇向校服女伸出援手！
我扶起校服女，然後簡單問一句：「跑唔跑得郁？」
校服女露出痛苦嘅表情，但仍點頭示意。
「跑！」
我握起校服女嘅手，向車尾方向奔跑過去。我哋離黃線重有一節車廂嘅距離，只要跑到黃線後就唔會有事！
「啊呀！」
耳邊忽然傳嚟校服女嘅尖叫聲！
我轉身望去，只見校服女嘅小腿血流如注……