從西鐵醒返之後……: 2【1/F 登上列車】
人類經常會將一啲無法解釋嘅事情詮釋為不合理。
其實，所謂不合理嘅事情，並非真係不合常理，而只不過係超出人類想像範圍嘅事情而已。
一把來歷不明嘅廣播聲傳出，內容十分令人在意，遊戲、篩選、死亡……就好似生存電影所出現嘅劇情。
不過，並無人留意到廣播內容，因為眼前發生咗一件事情——
嗰對試圖越過黃線嘅男女倒臥地上，血水沿住地板嘅空隙，將周圍一帶染成血色。
死寂一片。
事情太過突如其來，明明清晰聽到廣播內容，明明清楚見到眼前發生嘅事，但我無法做出任何反應。應該係話，呢刻我嘅腦袋重未意識到發生緊咩事情。
唯一知道，係「死亡」二字。
幾秒後，一把女人嘅尖叫聲傳出，打破寂靜。
「啊啊啊！死咗人啊！」
「報警啦！重唔快啲報警！」
「你唔好推我先，呢度信號都無，點報警啊？」
連本身唔信我哋勸告嘅阿叔，親眼望到兩條屍體之後，都大嚇一跳咁叫：「哇！做乜撚嘢呀，嗰兩條友做咩無啦啦冧低咗㗎！」
鮮血不停從嗰對男女身上流出，而佢哋胸口上插住嘅係一支黑色嘅嘢。
仔細一望……係一把箭。
嗰兩支箭……係由邊度射出嚟？
「發、發生咗、發生咗咩事啊……」駱譯驚到連講嘢都口齒不清，「快啲走……要快啲走呀！」
「你冷靜啲先！」我即刻搭住駱譯嘅膊頭，勸喻佢冷靜，「如果要殺咗我哋，一早就郁咗手喇！嗰對男女係因為唔聽警告繼續踩過黃線，先會死。」
「但係，好地地點會無啦啦死人啊啊……」
「會……會唔會係整蠱節目……？」莉莉顫抖地講。
「我都希望係……」我皺起眉講。
但係，事實就擺在眼前。
後方傳來一陣擾攘聲——
原來係有另一批人衝咗去防煙門，打算撞開防煙門逃走。
「快啲開門啊！快啲啊！」
「你唔好逼過嚟先，開唔到啊！」
「你讓開，等我嚟踢開道門啦！」
「道門鎖死咗，點開都開唔到啊！」
嗰堆人塞晒喺防煙門前，不斷對防煙門又打又撞又踢，但防煙門依然係紋風不動，完全鎖死。
假尖東月台、收唔到信號、完全鎖死嘅空間……再加上眼前兩條屍體。
無論點睇，事情都係往最壞嘅方向發展緊。
『咳咳……』就喺大家仍在驚慌嘅時侯，廣播聲再次傳出，『呢個地方已經被封鎖，你哋無人可以離開呢度。』
大家再次聽到廣播聲後，停下恐慌嘅舉動，然後將注意力由兩條屍體轉移返到不明嘅廣播聲上。
「你係啲咩人？我同你講，我係休班警察。你而家涉嫌非法禁錮，我命令你快啲放咗我哋，否則後果自負！」一個著polo shirt嘅中年男人講。
「係呀！你條撚樣好快撚啲放我哋返出去喎！」阿叔加把嘴落去和應。
『非法禁錮……？哈哈哈！我諗你好似唔係好明白而家嘅狀況喎！就算係非法禁錮又點，乜你認為你可以安然出返去，然後拎住個手銬嚟拉我走咩？』
「你條撚樣……你睇住嚟！俾我出到去嘅話，我一定要你有排嘆！」休班警嬲到滿臉通紅，但事實上對方係講得啱，唔清楚而家情況嘅係休班警自己。
『你捉到我先算啦！我生平最憎你呢啲以惡為能嘅人。咳咳……不過啊，你唔好話我唔畀機會你，如果你可以通過所有遊戲，我企定定喺你面前俾你拉又點話呢？』
「遊戲……？」休班警愕然咁講。
『係呀……睇嚟啱啱大家掛住驚呼尖叫，都無聽到我嘅開場白添……我先自我介紹，我嘅名叫做「挪亞」。』
挪亞——係《聖經》中建造方舟嘅聖人嘅名字。
『無錯……係同《聖經》嘅挪亞一樣嘅名字。你哋好幸運得到登上方舟嘅機會，參加呢場篩選。呢場篩選會分為幾個遊戲。只要你哋可以通過篩選，唔單止可以離開呢度，而且會得到豐富獎勵。不過，既然叫玩遊戲，輸咗嘅話當然會得到懲罰喇。』
「咁……贏咗會有咩獎勵，輸咗又有咩懲罰？」有個女人出聲問。
『獎勵啊……容許我賣個關子先，只要你哋贏咗自然會知。至於懲罰，既然輸咗遊戲，咁出局係理所當然嘅事喇，係咪？』
「出局嘅下場……會係點？」女人追問道。
『出局嘅下場，就好似呢兩個唔聽指示衝出嚟嘅人咁……簡單啲講，就係——死。』
一聽到「死」呢個字，大家開始哄動。
「快啲放我出去啊！乜嘢挑選幸運兒，我從來都無講過話想參加呢個篩選！」
「我唔要咩獎勵啊，總之放我出去啊！」
『就算你哋唔想參加，都為時已晚。你哋體內注入咗一種納米機械，只要我一撳掣，裡面嘅劇毒將會釋放出嚟，短短幾秒內就能將你哋致死。』
挪亞講完之後，大家馬上鴉雀無聲。
『哈哈！睇嚟大家已經明白我所講嘅嘢！如果大家可以好好合作，就唔使出現無謂嘅犧牲喇！』
「點解會咁……我明明喺度上緊堂，點會變成咁……今次、今次真係要死……」駱譯聽到會死，又開始失去冷靜。
我搭落佢膊頭安慰佢：「喂，佢話可能會死啫，但無話一定死喎，冷靜啲先啦！只要過咗關咪唔使死囉！」
「我玩遊戲好渣㗎，一定會輸喇！一定會輸喇！」
「未試就認輸，咁點會知最後結果係點啫？」
「你講到咁……唔通你真係一啲都唔驚咩？」
其實，我唔係唔驚，只係一開始事情太突如其來，令我反應唔切，當我回過神時，已經俾周圍嘅哄動擾亂咗我情緒。
而家冷靜落嚟，先開始萌生害怕嘅感覺。
『咳咳……都講得太多啦，時間已經無多。既然大家明白嘅話，我哋即將開始第一層遊戲——登上列車。』
登上列車⋯⋯？
我相信全場無一個人聽完呢句之後無呆咗喺度。
轟隆轟隆——
同我哋落車相反嘅另一邊月台，一架列車從另一個方向駛入。
『往紅磡列車即將到達，請先讓車上乘客落車……』
親切嘅港鐵廣播聲響起，列車埋站之後，響起嘟嘟嘟嘅開門聲。
不過，車門並無打開，就好似啱啱喺列車入面嘅時侯一樣。
『一個鐘之後，呢個月台會喺釋放一種瞬間溶解人體嘅劇烈毒氣，而唯一逃離方法就係登上列車。只要喺一個鐘之內成功登上呢架列車，就可以乘搭呢架列車離開，逃過毒氣嘅威脅。』
「吓？咁我哋直接上車咪得囉？」一把男人聲傳嚟。
「你盲㗎，車門都無打開，我哋點樣上車啊？」另一把聲音和應。
「既然係遊戲，當然無咁容易上到車……」莉莉低聲吟道。
「無錯……不過連車門都唔開，要點樣先可以上到車……」斯文男問。
「係車頭。」我瞇起眼望住車頭，隱約見到車頭最頭嗰道門打開咗，同啱啱列車上玩嘅係同一把戲。
『佟先生果然夠眼利，一眼就睇穿遊戲嘅玩法。』
「你點會知我叫姓咩？」我對挪亞道出我嘅姓氏感到驚訝。
『哈哈！莫慌張，我唔單止知道個姓，重知道你全名添。既然你係我哋呢場篩選嘅參賽者之一，知道又有何出奇？』挪亞似是而非咁回答我問題，然後繼續講解遊戲，『正如佟先生所講，只有車頭最頭嗰一對門打開。』
「咁有咩意思？只要我哋湧晒去車門，就可以上晒車。」斯文男不解咁講。
『呢個正係遊戲嘅重心，你哋應該見到眼前條黃線，知道越過黃線會有咩下場。』
聽完挪亞咁講，我下意識望咗去倒臥喺我哋眼前嘅嗰對男女。
無錯……如果要行去車門，就先要越過呢條黃線……
『不過你哋遵守遊戲規則去行動，就可以安全越過黃線，走到車頭登上列車。你哋有無玩過——「狐狸先生幾多點」？』
「狐狸先生……？」
大家聽到呢個遊戲，不禁露出疑惑嘅表情。
應該係話，「狐狸先生幾多點」同而家嘅氣氛完全格格不入。
『就如同「狐狸先生幾多點」一樣，呢個遊戲採取回合制。每一回合，我會透過廣播向你哋傳達一個「數字」，而你哋必須要喺一分鐘內喺指定區域內依照指示前行指定步數。一分鐘過後，若然你哋走嘅步數同指示不符，不論係過少或過多，都會受到懲罰。當然，喺判定嗰陣，如果你哋偷偷哋郁咗，一樣會受到懲罰。』
「嘖！無聊遊戲，淨係要跟住你啲指示行咋？呢啲垃圾遊戲我輕鬆搞掂啦！」阿叔不屑咁講。
『哈！當然唔係咁簡單啦，既然講得「狐狸先生幾多點」，當然唔少得十二點呢個情況。假如響起嘅係警報聲而唔係廣播聲，大家就要即刻退到黃線後方。若然一分鐘之後仍然喺月台黃線前方範圍，亦會受到懲罰。』
就咁聽落去，呢個遊戲的確同「狐狸先生幾多點」無咩分別，但係若然出現失誤嘅話，等待自己嘅只會係死亡。
『遊戲規則大致上係咁，每個回合為一分鐘遊戲時間同一分鐘判定時間。一小時之後，成功上車嘅人就可以逃離毒氣嘅威脅，參加第二層遊戲，上唔到車嘅就要留喺度慢慢等死。』
挪亞講解完遊戲規則後，大家一臉茫然。
斯文男手指數緊車卡數目，然後講：「呢度離車頭有五節車卡距離，最差嘅情況都係車頭附近時響起警報聲。一節車卡大概有幾長左右？」
「大約二十米。」駱譯好快就答到出嚟。
「二十米。」斯文男托一托眼鏡，「一節車卡二十米，五節一百米。我用女仔去做標準，假設一個普通女仔要用二十秒跑完一百米，咁都起碼重有十秒時間buffer。照咁睇，除非係行錯步數，如果唔係唔會有任何生命危險。」
「但就算係咁簡單，只要真係差錯腳我哋就會死。」莉莉不安咁講。
無錯，就算係簡單嘅遊戲，喺知道一旦有所失誤就會死嘅壓力底下，再加上望住眼前嗰對男女嘅屍體，係無可能冷靜到如同平常一樣咁玩遊戲。
而且，我有種不安嘅預感。
「呢個遊戲……真係咁簡單？」我帶著疑惑問。
「咩意思？」斯文男皺起眉頭問。
「唔……」我自己都講唔出係咩一回事，「無嘢，我純粹問下。」
呢個只不過係我純粹嘅直覺，明明係死亡遊戲，但用狐狸先生幾多點咁兒戲，總覺得……好似暗藏陷阱當中。
『睇嚟大家都明白遊戲規則，事不疑遲，麻煩大家稍移玉步，企去黃線前方。』