由18蚊一包純簿萬 到宜家90蚊一包黑甩 看破紅塵: [人生最後一飛黑甩]

大約兩個月前，我做左一個決定，一個人生中都真係幾重大既決定。
 
喺大約兩個月前，一個夕陽西下既假期，我喺屋企樓下個公園度揀左個可以望到夕陽既長木椅子坐左落黎...
 
首先要講一講，我屋企樓下個公園望出去絕對唔會有無敵大海景，望唔到太平洋，亦望唔到維多利亞河(我絕到唔會稱果條咁窄既河為港囉)。
 
我所望到既夕陽只不過一直向住D一棟二棟高樓大廈插落去...
 
夕陽...真係唔同地方睇有唔同感覺...
 




望住個夕陽，嘆左一口氣後，喺褸袋攞左包巢巢地既黑甩出黎。
 
望住包黑甩，心裏總有一點點失落...一點點唏噓...
 
我單手打開包黑甩，喺裏面攞出最後一飛煙，放到嘴脣邊...
 
“察”一聲，火光紅紅…
 
“斯”閉起雙眼用力抽一口…
 




『黎飛係我人身中最後一飛黑甩…』
 
由十四歲開始至今，我食左足足十六年煙...
 
十六年，開心會食，唔開心會食，返學食，放lunch食，放學食，著校服食，著便服食，趕Project食，考試前食，Fail左食，打機食，吹水食，坐喺沙灘食，坐喺海邊食，食飯食，唱K食，飲酒食，返工食，放工食，返屋企食，拍拖食，失戀食，一班人食，一個人食...
 
點解我會食?
 
望住支著左既黑甩我問自己，點解我會食，仲食左十六年?
 




再吸一口...呼出白白灰灰既輕煙...輕煙慢慢喺空氣中輕舞...消散...
 
因為...我愛自由既空氣...
 
十六年前，李賣藝話俾我知，煙唔會上癮，煙可以令我好開心，煙可以令我忘記一切煩腦，煙...
 
事實上，一切都係假象。
 
煙裏面既一切一切，都係由煙草商編製出黎既大話。
 
一吸，一呼，煙消雲散...
 
不論萬寶路、威豪、Lucky Strike...所有所有都係由煙草商編製出黎既大話!
 
你覺得D味好純咩?




 
你覺得好安穩咩?
 
你覺得好舒適咩?
 
你覺得好暢快咩?
 
你覺得好自由咩?
 
你要用上50蚊先買到你應有既安穩，你應有既舒適，你應有既暢快，你應有既自由，我仲未計你要花上你寶貴既生命，寶貴既青春，值得咩?
 
我忍夠，我受夠...
 
我望住俾我吸剩既半支煙，我遙遙頭...
 




十六年...我竟然花左十六年時間，花左可以買一架瑪莎拉蒂既金錢，買一個又一個幻象，一個又一個假既幻象。
 
就如眼前的輕煙一樣，一切都係幻象。
 
再一吸，再一呼...
 
人生中，有好多取捨。
 
國父孫中山都有好多次既取捨。
 
人唔付出犧牲，就無辦法得到任何回報。
 
想要得到D咩，就必須付出同等既代價。
 
亦則係鋼之鍊金術士中所講既，等價交換原則。




 
所以我決定左，我下定決心，為左得到真正既自由，黎支係我人生中最後一支煙。
 
再吸一吸，再呼一呼...最後一啖...
 
我把煙頭輕輕一彈，彈向天際的殘陽去。
 
「先生，多謝你110蚊呀。」
 
今朝返工，牙痛到喊。所以就去左7仔買支清熱酷清清熱。
 
當我去到收銀時，另外一個收銀既妹妹同隔離個阿叔咁講:「先生，多謝你110蚊呀。」
 
阿叔先係呆一呆，再講:「吓?110蚊?財爺未話加稅喎...」
 




「我都唔知呀，公司話賣黎個價，我先賣黎個價咋。」收銀妹妹立即以熟練既台詞回答隔離果阿叔，想必，佢已經張黎句對白答左成朝...
 
「好啦好啦...」阿叔好唔願意之下拎左110蚊出黎俾收銀妹妹。
 
「多謝。 杜蕾斯持久裝做緊特價喎，買三盒送一個...」
 
我望住阿叔手上果兩包黑甩...
 
遙遙頭...
 
『究竟仲要花幾多時間，犧牲幾多條寶貴既人命，人類先會醒覺?』