《有一晚，我喺學校操場遇到跌落凡間的天使》: 【第一季完結】
去到餐廳，待應問我係咪book咗兩位，我明白佢哋咁問係想確認返，但心裡面總係唔好受。
「唔係啊，一個咋。」待應頓了一頓，繼而明瞭，就帶我去座位上面。
其他人都出雙入對，係呢啲時節，襯托出嚟嘅孤獨感最為強烈。
我不停咁諗，如果小瑤都係度就好啦。
只不過⋯⋯本來今日呢餐飯可能會係我哋最後一次慶祝，心情都會欠佳㗎啦，但至少，唔好係咁樣。
呢間餐廳環境普通，價錢唔太貴，以一個中學生嚟講都仲叫尚可負擔。
係難book位姐呢啲時間，所以我事前都做唔少功夫㗎。
最後落完單，食埋。我都唔知自己食咗啲咩其實。
去坐纜車上太平山頂，今日嘅夜景灰濛濛，濛濛嘅夜色當中，都仲可以睇到高樓大廈嘅星輝點綴。
電車上，街景一幕幕地快進，感覺置身一套電影入面，好多人都會將自己當成悲慘嘅主人翁，我依家都唔例外。
今日嘅我真係唔知自己做緊咩，呢啲事我都唔知可以同邊個呻訴，覺得只有自己吞返落肚先恰當。
我漫無目的咁坐住電車，環繞港島嘅街景，霓虹燈係我眼皮底下閃爍不停，漸漸地，我眼皮沈重起上嚟，就垂底咗。
係夢入面，我處身於一個漆黑一片嘅環境入面，伸手不見五指。
但我聽到好似小瑤嘅叫聲⋯⋯
「夏晨！夏晨！！」佢不停咁叫住我，四面都有小瑤嘅叫聲。
「夏晨⋯⋯」
「夏晨⋯」
我分唔清呢啲聲音係邊度傳過嚟，我不停咁搵小瑤，我好想見到佢⋯⋯
「夏晨⋯⋯喂，夏晨！」我感覺到有人拍我咁，我慢慢睜開雙眼，原來真係有人叫我啵。
我花啲時間回過神來，眼前係一個熟口熟面嘅女仔，但一時之間又認唔出。
「你個傻佬係度瞓著都有嘅？」
「？」我load咗一陣先認到。
「小瑤？？？」我吃驚咁講。
淨係見小瑤嫣然一笑，無多講啲咩，因為佢個造型轉變都幾大，我一時之間都認唔出。
小瑤佢剪咗頭髮，本來長髮飄逸嘅佢，一變清爽短髮，短至條頸嗰個位，但亦難掩佢一把金色頭髮嘅特質，額外顯眼。
小瑤戴上一頂白色cap帽，身穿連帽衛衣，感覺⋯⋯好似有啲唔同。
我諗返起一件事，佢唔係唔得閒咩？
「你⋯你唔係唔得閒嚟咩？」我問小瑤。
「嗯⋯我完咗就即刻趕過嚟見你。」小瑤嘅笑容因為臉色嘅緣故，都覺得倉白。
小瑤好自然咁坐係我隔離，輕輕將佢嘅手搭係我手上面。
一股冰冷嘅感覺傳遞落我手背上，我心入面嘅滋味百感交集，本來消沉嘅情緒並無因為小瑤嘅到來而感覺興奮。
開心係開心，但唔係好開心。好似同我想要嘅嘢已經唔同咗。
「你想去邊啊？」小瑤問我，拖起我手。
「我都唔知想去邊⋯⋯我頭先都一直諗自己想去邊，原本我覺得只要有你係度，我去邊都可以；但你唔係度，我就唔知自己想去邊。」
「唔好咁啦⋯⋯」小瑤聽到我咁講，有啲虛弱、有啲嬌柔咁講。
「我想你清楚自己想去邊，而唔好係因為我，我陪唔到你幾耐咋。」小瑤捱係我膊頭，而我不停來回地磨擦小瑤冰冷嘅雙手，吹下啲暖氣俾佢，希望佢可以暖和啲。
一雙大眼睛注視住我。
我抬頭一望，係小瑤甜滋滋咁笑，然後碌大隻眼咁望住我，我俾佢呢個表情整笑。
「做咩姐？」我笑說。
「好暖啊。」小瑤答道，但佢隻手仍舊冰冷，都無暖過。
「就算我去天堂，我都再無遺憾啦。」我好唔想小瑤咁講。
「可唔可以唔好走啊⋯⋯」我個心牽起一陣一陣嘅痛楚，斷斷續續咁，直叫人覺得生不如死。
「有啲人係注定陪你行一段路，人生路上，要學識俾人落車。」
我正想望住小瑤，講啲咩嘅時候，小瑤已經靠近我，輕輕地，出奇不意地錫落我度。
佢用行動封住我個嘴，呢次係我哋一齊咁耐第一次kiss。
柔軟嘅觸感打亂曬我平穩嘅心跳，我一直都想錫小瑤，但又唔敢，唔知點做好，無咁嘅膽量，亦都想好好珍惜佢⋯⋯
反而最後係小瑤做主動，呢一吻嘅瞬間實在太快⋯⋯
但呢一刻，足以讓我記住成世。
有啲瞬間一閃而過，卻成為你心中求恆嘅烙印。
小瑤離開我嘅嘴唇，用不捨嘅眼神望住我，連嘴唇都帶有不捨嘅味道。
「呢度⋯⋯唔係你嘅終點。」小瑤似有若無地說。
「但我必須要落車，你唔會知邊個會陪到你去到終點，可能你到終點嘅時候，車上面一個人都無。」
「不過你一定要記住，你曾經睇過嘅風景。」
小瑤雙手捧住我雙頗，又再輕輕咁吻多次。
「唔好落車搵我，應⋯應承我好無？」吻別後，小瑤嘅聲線已經係度抖顫緊，我好明白呢種感覺⋯⋯
因為我連出句聲都覺得好吃力，沉重到唔知講啲咩好。
「應承我呢樣啊，好無？」小瑤幾乎用乞求嘅語氣同我講，而我彷佛得返應承佢呢個選項，就算我千百萬個唔願意。
「好。」
「勾手指啊。」小瑤隻手係度震緊，儘管佢想極力控制住，但我都睇到佢隻手震得好勁。
其實佢同我一樣難受。
最後我同樣地伸出抖顫不停嘅手指尾，勾起小瑤嘅手指尾。
小瑤望住我，凝視我雙眼，滿意地笑了。
鬆開手，就起身落車。
係落車嘅旋轉梯度，小瑤停咗落嚟，最後再望一望我，呢一幕就咁停咗係度，空氣都好似靜咗咁，車上面再無其他人，成個世界無曬聲音，淨係得返我同佢。
當小瑤行落去嘅時候，世界先有返聲音，其他人先再出次出現返⋯⋯
我真係做到，無落車搵小瑤。
係車上面，我見到小瑤行出電車，然後向上一望，就同我對視到。
一秒⋯⋯
兩秒⋯⋯
難過呢種情緒已經填滿我成個心靈，咩都裝唔落啦，好想喊好想喊嘅衝動主宰住我大腦。
電車再次開動。
小瑤就咁企係原地，傻傻地望住我。
佢用口形咁講咗三隻字，不消幾秒，我已經解讀到。
「我愛你」
隨住電車嘅開出，小瑤最後送俾我嘅表情⋯⋯
係笑容。
我亦都忍唔住，好唔容易壓制住啲眼淚，但壓抑唔到我搵小瑤嘅衝動，回過神嚟，已經企咗係落車位，等緊下個站嘅到嚟。
一落車就向上一個站跑，街上面嘅人熙來攘往，都擋唔住我講「唔好意思」、「唔該借借」。
只不過，去到上一個站嘅時候，同我預想嘅差唔多，小瑤已經唔再係度。
我仲未意識到小瑤已經消失係我生命入面。
我捱係電車站嘅欄杆，無助、難過嘅情緒唔知點處理。最後好似發咗癲咁不停係附近度搵小瑤，佢都係走咗無幾耐姐。
搵咗兩個幾鍾，花咗好多精神，周圍不停咁望，睇下有無相似嘅身形。
今日平安夜，個個都甜甜蜜蜜咁手拖手行街，而我就係突兀嗰個存在。
返到屋企已經唔知咩時候，屋入面已經無曬小瑤嘅痕跡。
好似小瑤已經準備好要離開我咁樣，我哋又再次回歸起點⋯⋯
假期過去，我唔知呢個假期係點過⋯⋯完嘅時候已經要迎接中學學校最後一次考試，其他人都係度忙住準備緊考試，所以呢排我都無搵肥蔥佢哋，我只能夠獨自吞曬所有嘢。
我搵唔到溫書嘅動力，咩都唔想做，個腦好似重播機咁，重溫當日嘅場面就有，溫書就無啦。
到返學嗰陣，都唔見小瑤，肥蔥佢哋都唔知咩事，雖然都會想關心下小瑤，但實情大家都做唔到咩，加上又就嚟考DSE，所有人嘅精神、心機都放咗係考試上面。
我都唔可以就咁放低考試唔嚟，一直係度傷春悲秋，而我係操卷嘅過程入面，我先真正無諗起現實發生過嘅嘢，專心嘅時候可以好忘我，但做完之後回歸返現實就有種落差感，好似特別空虛咁。
越係感到空虛，就越係發癲咁去做，更投入去做。
Last day到臨，有人開心終於嚟到呢一刻，互相道別，應承大家畢業之後都會keep住友誼，感覺好青春洋溢。
但離愁之情更加濃厚，對我哋幾個嚟講。
「最後啦喎。」以前作風一貫唔正經嘅肥蔥都傷感起上嚟。
「哈！呢啲時候都唔知講咩好。」小男道。
此刻大家嘅心情都係一樣。
「你哋幾時先一齊啊？」呀紫大膽咁問，我估應該都最後啦，有咩唔怕講咁。
「咩⋯⋯咩啊？」小男眼神閃縮，個眼珠周圍咁擺。
「你兩個真係呢⋯⋯成日都扮曬嘢。」呀紫無咁好氣。
「只要你哋唔好後悔，唔好錯過，咁就得啦。」呀紫最後叮嚀佢兩個。
我哋互相係校服度簽名，影相，寫紀念冊，一齊係學校留到最後一分鐘先走。
嗰一日嘅黃昏嘅顏色帶點鮮紅，個天好似燒紅咗咁，係呢個特別嘅景色入面，影咗一張我哋四人嘅合照。
我哋臉上嘅笑容，燦爛嘅程度唔輸蝕俾個日落。
中間考mock，然後就係每日溫書準備考試嘅日子好快就過去，去考場嘅時候，不停地緊張。
唔知係咪幻覺，我好似聽到有把好似小瑤嘅聲音同我講唔好緊張⋯⋯
佢好似從來都無離開過。
考完最後一科，hea咗兩日，瘋狂打機，壓抑咗好耐好耐，考試壓力加埋情傷，我考完試當下就想咩都唔諗，唔理，淨係做自己想做嘅嘢。
兩日過去，爽完，收到肥蔥嘅msg，話要出嚟約食飯。
出到嚟，肥蔥啱啱到，但佢神色唔係幾妥，唔係佢同小男有啲咩事啊？
「得你嘅？其他人呢？」我問。
「嚟緊。」肥蔥淡淡咁講。
「你無事啊？你睇落好似心情唔係幾好咁嘅？」我睇得出一啲端倪嘅。
「Yoyo佢過咗身。」
「Yoyo？邊個嚟？」我不解，一啲雜亂嘅記憶打擾住我。
「下？」肥蔥抬起頭，吃驚咁望住我。
「你女朋友嚟喎，你問我邊個？」肥蔥一字一句衝擊住我。
⋯⋯
「小瑤？」我傻住咗，雙手無力地抖顫緊，我已經成身用唔上力，係度發緊熱。
「傅卓瑤琴日走咗⋯⋯」
我咩都唔想理，就咁蹲係路邊，肥蔥講嗰句說話我唔想聽入耳，但偏偏聽得好清楚。
終於嚟⋯⋯？
空氣中出現不知明嘅裂縫，打破所有事情。
其實小瑤並唔係啲咩天使，但佢嘅出現同存在，猶如天使般⋯⋯佢嘅善良令我相信呢個世界係有天使嘅存在。
嗰一晚大雨，行出學校嘅大門，見到個傻瓜淋到濕曬，咁啱行過嚟。
呢個就係我哋嘅相遇。
我出於好心遮埋佢，我無即時問佢發生咩事，係街燈嘅映影下，小瑤係幾迷人，但少條筋嘅佢，成日講啲莫名其妙嘅嘢，小瑤用佢嘅戇鳩嚟遮掩佢出眾嘅輪廓。
後來發現原來佢住係我隔離再隔離房，新嚟嘅鄰居。
我哋多咗好多機會接觸，唔知佢係悶定係依賴我，時不時就會嚟搵我。
佢仲插班埋入嚟我哋學校，佢一入嚟嘅時候，已經俾我哋班嘅男仔盯上，但佢可以渾然不覺，當佢哋透明咁。
小瑤英文名就係叫yoyo，其他識佢嘅人都會叫佢yoyo，而當晚開始，我就已經叫佢做小瑤。
其實小瑤嘅外表真係好容易俾人留到深刻嘅印象，因為佢係一個混血兒，頭髮仲金金地，又多一番風味。
佢係外國返嚟，住係我隔離，就咁插班入我哋學校，小瑤身邊不乏追求者，甚至有啲仲好瘋狂咁追，而我就成為嗰一個特別又好彩嘅存在。
我同呀紫一直都有種距離感，相比起小瑤，我哋係種種原因下更加靠近⋯⋯
只不過上天好似亂咁玩公平咁，賜俾小瑤短暫嘅壽命。
小瑤見到我整親，緊張我仲緊張過佢自己，佢就係一個咁樣嘅傻瓜。
一個識得感動你嘅人，比起令你心動，更加用心。
而小瑤就係一個咁樣嘅人，一直一直讓我感動。
佢返嚟係為咗醫病，當我哋互相表白心跡嘅時候，小瑤同我坦白所有事情，佢就好似韓劇嘅女主，患有絕症，剩底嘅時間唔多。
但事實係，呢種事真實咁出現，你就不知幾想係一場戲，所有嘢都唔係真，你等緊嘅，係導演嘅一聲「Cut」。
初頭我都半信半疑，咁誇張嘅事說實話我真係相信唔落，我不停地咁搵破綻，直至我慢慢見到佢越嚟越虛弱，由細到大都要人照顧嘅佢，對日常生活咩都唔識，我先明白佢背後嘅苦處。
我睇到嘅，全部都係佢感染嘅笑容，我睇唔到嘅係佢背負嘅生命。
小瑤無具體同我講咩病，佢根本唔想我知呢樣嘢，佢會通知我，已經係佢做嘅極限。
「呢個係我自己嘅生命，你無必要承擔我嘅生命，但你有權知道。」小瑤就連講呢句嘅時候，臉上都係掛住笑容。
「我只係想係我剩底嘅時間入面，好好地咁同你一齊。」
平安夜嗰一晚，我知小瑤無辦法嚟原因，我真係好撚衰，事後諗返起，我係不停地自責。
呢一年嘅情緒就咁爆炸，明知咁樣做唔好，但都忍唔住，好想發洩出嚟，我好想好想好想最後留個美好嘅回憶俾小瑤。
所以小瑤落車嗰陣，我心裡知，呢次係我最後一次見小瑤。
我咁大個仔，頭一次係街上面失聲痛哭，喊到收唔到聲，個人抽蓄到講唔到任嘢，個頭仲暈暈地咁，天崩地裂，唔想知呢個係現實。
就連肥蔥都忍唔住，死別比起生離，難過上一百倍。
小男同呀紫都嚟到，無幾耐我哋都止不住淚水，但我係喊到不似人形，我知呢一日一定會嚟，又咩都做唔到，做到嘅就係等。
我相信⋯⋯
小瑤一定會係天使。
係未考DSE之前，我已經報咗台灣嘅聯合分發入學，決心想離開香港，去台灣易，呢個決定，係一年前已經有咁嘅諗法，不過係呢一排先決定去試下。
想離開呢個傷心地，去另一個地方試著重新開始。
我哋班有出席小瑤嘅葬禮，我有去，呢種沉重嘅情緒就嚟擊敗我，我無辦法釋懷，無辦法放低小瑤。
放榜後，我拎住唔算好好，但又唔係太差嘅成績，一係入asso，一係入大學水泡科，一路等緊台灣大學嘅消息，科目已經搞掂曬。
無幾耐終於收到電話，之後就係參加啲說明會，拎取各方面嘅資訊。
係去台灣之前，小男肥蔥佢哋都有嚟我送我機，臨出發去機場之際，我有去小瑤嘅墓前送別，同佢講咗好多好多好多嘢。
係機場度，佢哋三個都好唔捨得我，呀紫仲喊咗，呀紫佢外表睇落好似冷酷、cool地咁，但佢好重感情，呢一點我好清楚。
「yoyo走咗，之後又到你走，我哋呢班人好似散咁。」呀紫不捨得眼淚流落嚟，但今次我無咁感概，我都知自己咁嘅狀態已經夠，我都知小瑤唔想見到我咁。
「你自己去到小心啲啊，咪成日掛住溝台妹啊！」肥蔥講笑咁講，佢把口出唔到啲咩好嘢，我都估到佢大約會講呢類嘅說話。
小男無講啲咩，就咁攬攬我，真係夠曬man。
之後互相擁抱後，影咗好多張相，就咁不捨地道別。
小瑤成為我心中嘅烙印，係飛機上，專登揀個窗口位坐。
望住窗外嘅白雲，呢一刻，有種錯覺，覺得小瑤好似離我好近好近，天真地諗⋯⋯
呢一片天空最接近天堂。
而小瑤一定係天堂入面，係會一個傻頭傻腦嘅天使。
第一季完