《有一晚，我喺學校操場遇到跌落凡間的天使》: 【12】
小瑤返嚟之後，醉醺醺咁返嚟，頭髮散亂無序，條友又做啲咩傻事啊？
「你去飲酒嚟？」
小瑤好似變咗個人咁，佢又再坐係熟悉嘅沙發上面，散發住一身嘅酒味。
小瑤一直係度低聲呻吟，口嗡嗡咁，唔知講緊咩。
「我去倒杯水俾你。」我真係唔識照顧一個飲到醉曬嘅人。
「喂⋯喂⋯⋯返⋯返嚟！」小瑤佢叫住我。
「？」
我行埋佢，唔知佢要做啲咩，但估佢係咪想要啲咩要求要我幫佢做。
「啜」一聲。
小瑤毫無先兆地錫埋嚟，仲要封實咗我個嘴。
佢並唔係蜻蜓點水咁錫下就算，而係錫係實一實，你好難推得開嗰一隻。
輛到我支支吾吾，想講嘢又講唔到，又抖唔到氣。
我終於有啲明白，原來有啲男仔突發間咁樣錫女仔，大大力咁，女仔會推開你應該係因為抖唔到氣，再鍾意都唔會想窒息吧？
我估唔到我要用咁大力去推開小瑤。
推開完之後，小瑤用含情脈脈嘅眼神望住我，個氣氛真係好情迷意亂，之後應該係啲越級嘅情節。
「你⋯你做咩啊？」此刻，我真係好想搞清楚佢做緊咩。
「我⋯⋯我忍唔住啦⋯」
哇！大佬你唔好講得咁挑逗得唔得啊？
「你忍咩啊？」此刻我仲未做好心理準備。
我分唔清佢係真醉定點樣呢？望住佢清澈動人嘅雙眸，感覺佢唔知醉醺醺咁，但又有別於平時嘅人。
「我唔⋯⋯」
唉屌⋯⋯
奶曬嘢，出曬事。
佢嘔曬落我度，然後我就確信佢真係醉醉地，如果唔醉都唔會嘔成咁啦？
我處理完自己之後，佢已經係沙發度瞓著咗。
第二朝，佢又回復到平時嘅熱情⋯⋯
⋯
做乜事啊？女人轉變得真係可以咁快？
「一齊返學啊，我哋好耐無一齊返學啦。」回想下，好似都大約有一個禮拜啦喎。
雖然可能覺得一個禮拜唔算好耐，但同小瑤嘅時光好似「好快」咁。
同佢相處「好短」咁樣。
對於佢話一齊返學，我又無咩所謂嘅，一切返回以前咁。
今日小瑤嘅笑容好似多咗咁，可能受唔住佢之前嘅冷淡吧？我幾驚之後都係咁冷淡啊？
見到佢咁開心，我笑容都多咗。
「你哋好返啦？」呀紫見我同小瑤今日關係好咗，然後問我。
「嗯⋯⋯算係啦，我都唔係幾知發生咩事。」
「唉，你份人呢，係咪特別遲鈍嘅呢？」呀紫用食指做咗個勾形，輕輕敲落我天靈蓋度。
我扮到好痛咁問佢：「做咩喎你！」
做埋個楚楚可憐樣俾佢睇，呀紫都笑起上嚟。
「我覺得小瑤佢係鍾意你先咁囉。」呀紫講出佢嘅見解。
我的確係有咁嘅猜疑，但呀紫講出口就好似更有說服力。
而呀紫依家係我面前，彷彿失去咗愛情嘅魔力，好似變到⋯⋯無咁吸引我。
唉，嗰種感覺我都唔知點形容，只可以話並唔討厭。
反而對呀紫話小瑤鍾意我有啲飄飄然。
「係咩⋯⋯？」我仍然有啲唔敢相信。
「唉！遲鈍男！！！」呀紫向我喊咗聲。
更加疑團重重⋯⋯
點知⋯⋯
點知小瑤放學真係講出心底話。
「其實我鍾意你。」俾呀紫講中咗，女仔嘅直覺準得可怕，準得毫無道理。
「但我唔清楚呢啲感覺係咪鍾意，因為我都未試過。」小瑤苦笑。
「我根本唔知係咩嚟，但當我好似確認嘅時候，就已經鍾意咗啦。」
估唔到⋯⋯我會有俾人表白嘅一日，但原來會咁迷惘，會唔知點做好。可能有好多人好提子，但發生係你身上，就係另一種感覺啦。
「人間原來有好多新鮮嘢，但原來咁多嘅新鮮事，唔見得所有都係好事嚟。」小瑤難得感觸地講，以往佢都係大頭蝦，又笑哈哈咁，係一個開心果嚟。
見住小瑤都唔知唔覺咁成長咗咁多，而自己就⋯⋯
「就好似鍾意咗你咁樣啊，我都唔知點解就係會咁著緊你，就譬如你上次受傷咁樣。」
「我唔知點解就係會好緊張，好驚你有事，但可能你出事我哋就可以係天堂團聚呢？哈哈哈！嗰陣我有呢個邪惡嘅諗法。」
「見到你同呀紫行得咁近，會成個人好唔舒服⋯⋯」
其實我同小瑤只不過好似往常咁行返屋企，但我哋好似傾到興起，一直係屋企附近嘅公園徘徊。
返屋企都可以傾姐，但就唔知點解彼此有個默契？或者有共識唔想返屋企。
「我知你係鍾意呀紫，睇到你嘅笑容就知。」
「因為個笑容從來都未出現過係我身上。」
小瑤唔理係表情，定係動作，都顯出佢好唔甘心，佢緊緊地捉住自己嘅裙擺，然後咬咬下唇。
佢仍舊將所有表情都寫係臉上，呢種真性情更覺得可愛。
小瑤佢真係⋯⋯徹頭徹尾地可愛，樣貌可愛、性格可愛，就連骨子裡都好惹人憐愛。
「但我剩底嘅日子唔多啦，我明白終有一日我會都離你而去。」
我由頭先開始，感覺就已經超唔好，一嚟唔知點樣面對小瑤嘅表白，二嚟就係有啲唔好嘅預感。
然後小瑤講中曬我嘅擔憂，因為之前小瑤消失咗嘅時候我都有咁猜想過。
「我原本想成全你同呀紫⋯⋯所以去搵月老，去求佢俾個好嘅姻緣你哋。」
「但我後悔⋯⋯係好後悔。」
「後悔點解唔為自己試一次？唔通我嚟凡間要帶住後悔離去？」
「所以⋯⋯我想憑自己努力去追你一次，係我剩底嘅呢一年時間入面。」
⋯⋯
「一年？」