《有一晚，我喺學校操場遇到跌落凡間的天使》: 【3】
佢由喊即刻變返做笑，仲要好興奮添。
「你點去啊？」
「你理得我啊？」小瑤就咁哼住歌落床。
佢對於生活，係零知識，刷牙洗臉都唔識，我要慢慢一步一步教。
手腳唔靈活嘅佢周不時都整出唔少笑話，例如擠牙膏大大力一嘢㩒落去啦，搞到浪費曬啲牙膏啦；洗面又好用力合埋眼啦，個樣勁搞笑。
生活上多咗個人，其實幾好玩，雖然係麻煩，但真係開心嘅。
我同小瑤講我返學先，反正佢一陣有辦法嚟㗎啦。
我一返到學校，就去小食部搵咗佢哋先，通常上堂之前，小食部就係最多人聚集嘅地方，尤其是係要早會嘅日子。
不過我哋一行四人有時都會係小食部食個早餐，然後先去早會或者返上去抄功課。
我一見到佢哋三個，我即刻拉住佢哋，神色凝重咁同佢哋講：「喂！我琴日發生咗一件超級超級不可思議嘅事，你哋一定要認真咁聽我講。」
但睇嚟我講得唔係時候，因為我感到肥蔥同埋小男個氣氛唔係幾對路，個氣場，好老尷。
我潛意識話俾我知，佢哋好似幾大鑊咁。
「做咩事啊？」我偷偷地問呀紫，佢哋點都會聽到㗎啦，但事態嚴重，都無辦法啦。
呀紫知道喱度唔係解釋嘅好地方，於是二話不說咁拉咗我嚟後面無乜人嘅位置。
「琴日肥蔥啊，同小男表白啊！」呀紫講出因由。
「下？」我十分驚訝。
「佢做乜事咁衝動啊？」
「我都唔知啊，依家搞到小男避開佢，唔知點收科好。」
「咁依家點做好啊？」我無知一問。
「我點知喎，我就係等緊你返嚟睇下點算囉。」
哇，睇嚟依家件事都唔係一個好時機同佢哋講，算啦，都係遲啲先。
「咁再睇下情況先啦，依家一時三刻都唔會有咩辦法㗎啦，睇定啲先。」我好認真咁講。
我依家都怕，如果我同呀紫表白嘅話，會唔會變成肥蔥同小男咁㗎⋯⋯
成個早餐好快食曬，因為佢哋兩個都無講過嘢，平時肥蔥咁多嘢講都唔出聲，我都想知琴日詳細情況係點，一陣去八⋯⋯唔係，係去關心下。
上返課室，有嘢唔同咗。
坐係我前面嘅女仔，變咗小瑤。
我哋四個本來就坐係左後排，坐我前面嗰個係一個書蟲嚟，有時啲小測我都係靠佢，因乜解究會變咗小瑤？
小瑤會入到嚟我唔奇怪，奇怪係佢又知我坐佢後面？同埋佢點樣調走人？
怪事接二連三咁發生，我有點吃不消啊大佬……
後尾個書蟲搬咗去對面海，我哋中間隔咗成兩行。
班主任陳Sir幫小瑤介紹，話佢係我哋今個學期嘅新同學，然後順理成章咁坐係我前面。
「嗨！新同學。」小男拍一拍小瑤，小瑤一臉傻呼呼咁擰轉頭。
「嗨！」
「唔洗咁怕醜喎，你住邊頭㗎？」小男一嚟就好熱情咁撩小瑤吹水。
「喂喂喂！我有件緊要嘢同大家講，大家認真聽我講。」我叫齊佢哋專心聽我講。
我將琴日嘅事一五一十咁同佢哋講。
佢哋全部都唔撚信。
都正常嘅，預咗啦。
「我覺得似你有問題多過小瑤有問題。」肥蔥唔信之餘，仲質疑我。
「係真㗎！我初頭都唔信，但後面見識過佢嘅『魔法』之後，我就信啦。」
「咪玩啦，喱個世界上根本就唔會有咩魔法，你當我哋麻瓜啊？」
「係囉，你叫我哋點信喎。」小男都好同意。
「小瑤！」我叫小瑤叫佢變個魔法嚟睇下，令大家信佢係天使。
「下？但係上頭叫我唔好俾太多人知喎。」
「你都係俾多三個人知姐，我同你講啊，咁樣方面好多㗎，信我啦！」我寫包單。
死啦，我會唔會遭天譴㗎？
「好啦，你哋要保密㗎。」
「知啦。」我保證完之後，小瑤就開始嚟料啦。
眨間之間，原本坐係我隔離嘅小男突發間變咗做呀紫。
而小男，就瞬間調咗去後面。
「哇！」
「哇！」
「哇！」
三把聲同時震入我個腦度，嗰種震撼啊，真係媲美戲院入面睇鬼片嘅各種尖叫聲啊。
引到前面嘅人啲注意，我哋即刻收斂曬。陳Sir背住我哋，無咩反應，我哋就樂得興奮。
「係咪啊？」肥蔥算係反應快㗎啦，識得講到嘢，你睇下其餘嗰兩位女士，得個O字。
「喂喂喂！上緊堂㗎，一陣俾陳Sir睇到就麻煩啦，快啲換返佢啦。」
「放心啦，無事嘅！」
「咩……啊…」
陳Sir仲安然無漾咁係度教書，班上面嘅人一啲反應都無。
「真係咁神奇？」呀紫坐係我隔離，我真係開心都嚟唔切。
「佢哋仲係唔信啊？」小瑤傻頭傻腦咁問。
「信啦信啦！」肥蔥好興奮咁講。
「上緊堂啊，嘈咩啊？」陳Sir忍咗好耐，終於都忍唔到，我哋都識驚。
「小息講小息講。」
一到咗小息，goodbye class完，即刻圍埋一齊開會。
「小瑤小瑤，過嚟。」係肥蔥一聲令下，小瑤就舉住佢個傻腦行埋嚟。
「啊，小瑤姐姐啊，你真係天使嚟？」肥蔥成副口吻唔同曬，生怕得罪小瑤咁。
「係啊。」小瑤答得好是爽快。
「係呢，你又會嚟喱度嘅？」呀紫問道，「啊，我指嘅係入嚟中學喱度。」
「無啊，上頭有派任務叫我哋落嚟啊。」
「你…唔係嚟罰我哋嘅？」肥蔥終於都問咗佢心入面最想問嗰句。
「唔係啊，我係嚟體驗人間㗎，所以你哋放心啦。」小瑤和氣一笑。
「咁就好啦，咁我哋就當你係fd㗎啦！」肥蔥開心咁講。
「放心啦，我哋唔會蝦你㗎。」小男搭住小瑤，眨下眼就咁鬼死老友。
「好啦！我哋一陣帶你出去見識下喱個世界啦！」
「好啊！」小瑤都好興奮。
「不過呢……可唔可以換返個位啊？」小男老實不客氣，十分嚴肅咁講。
「Kero……」小瑤望住我，都係要我揸主意。
我見到小蔥個樣即刻頹咗，所有唔開心嘅嘢都寫係塊面度。
「好啦，換返佢啦小瑤。」
「哦。」小瑤無諗咁多，乖乖地聽話咁將頭先調轉咗位回復原狀。
頭先小小嘅尷尬好快就清空咗，我哋下一個小息就帶住小瑤行出班房，同時間介紹下間學校，同埋中學有咩規矩啊之類。
「今日點都要好好慶祝啊，我哋放學帶小瑤去食開心下！」小男係中午食飯嗰陣講。
中午出去食飯，基本上我哋幾個都會一齊，就算放學唔得閒都好，中午喱段時間我哋都係一齊出去。
係中學入面，喱段友誼係我最珍貴嘅禮物嚟。
「我唔理啊，總之放學有咩做嘅，踢波啊，補習啊都同我通通推咗佢啊！」小男佢成日都發號施令，個款成個古惑仔入面嘅十三妹咁。
「下？」我仲諗住踢波添，然後再望一望呀紫，佢唔係都要補習咩？
「無問題啊！」呀紫佢反應好快，好爽快就應承咗。
「你唔係要補習咩？」我疑惑地問道。
「其實呢，我琴日就想講……我哋…都好耐無再一齊放學去食個雪糕吹下水啦，依家大家又各有各忙咁，依家難得有個機會，就算要去補習咪推一次囉。」
原來琴日呀紫有嘢想講就係因為喱樣，我哋之前放學真係少咗一齊聚，間唔中都要出下嚟嘅。
「好啦！今日放學就同你慶祝下啦，我唔去踢波啦。」
「Kero，多謝你啊。」小瑤真誠咁同我道謝，但佢唔知個名……佢仲一直以為我叫Kero。
「小瑤啊，你做咩叫佢Kero嘅？」肥蔥佢捉到了，一啲都唔意外，預咗。
小瑤就將琴晚嘅事話俾佢哋知，結果？咪俾人笑到面都黃囉。
「喂！Kero。」
「嗨Kero！」
「Kero！Kero！」
跟住就係伴隨住歡笑聲，個個都笑到仆街，最慘嘅係，佢哋之後就叫我Kero……
「你不如試下一直Kero，Kero啊，話唔定會吸引其他天使過嚟啊，哈哈哈！」肥蔥仲繼續笑到唔停口，一路由餐廳笑到返嚟學校。
「痴線！如果會啊，我會叫丘比特過嚟幫你手囉。」我唔小心提到啲唔應該提嘅嘢添。
「啊…Sor啊。」
「唔緊要啦，我都有認真諗過喱個問題嘅。」
因為我同肥蔥行係後面，前面班女都唔得閒理我哋，當一個群體入面係女多過男嘅時候，通常男嘅都係無乜地位可言。
我專登放慢腳步，廢事前面聽到。
「點啊你諗住，慢慢放低佢？」我猜想。
「你都傻嘅，我似啲咁易放棄嘅人咩？」哇，嚇我一跳，竟然咁有毅力？
「姐係你諗住繼續追小男？」
「係啊！追到攰為止，哈哈。」
「你唔怕尷尬咩？你哋依家搞到咁喎。」
「有咩好怕，比起尷尬，我更加怕自己追唔到囉。」我忽然間當肥蔥係神咁拜，好佩服佢有喱種勇往直前嘅勇氣。
而喱種勇氣，正正係我無嘅嘢。
「挑，你條友仔，之前問你你又死口唔認對小男有嘢。」之前問佢好幾次都唔認，依家仲唔俾我搵到位串佢？
「咁嗰陣唔想俾咁多人知啊嘛。」
「咁你依家又想？」
「依家點同姐，想去馬啊嘛。」
「嗱！你有咩要幫手就搵我啦，我實會幫你嘅！睇在一場兄弟，你又咁用心份上。」
我祝福完肥蔥之後，頓時感到好無所適從。
見住佢為自己嘅目標前進，而自己呢？
我哋放學之後齊哇哇咁行去老麥食雪糕，幾蚊雞嘅快樂，廉價但珍貴。
係我哋入面，睇得出肥蔥同小男始終都係尷尷尬尬咁，互相避嚟避去。
「點算啊？」頭先行緊去老麥嘅時候，呀紫都行過嚟搵我。
見到呀紫搵我，我個心怒放係唔洗講㗎啦，而且佢仲好細細聲咁問，佢捱埋嚟嗰下仲聞到呀紫嘅髮香，好迷人兼陶醉。
「喂？」呀紫叫住我。
「啊無，我頭先諗緊嘢咋嘛。」如果我哋都可以順利咁就好啦……
「做咩啊？」我問返呀紫，其實我係知嘅，不過扮下姐。
「前面啊，點算好啊？」
「我哋都俾緊機會佢啦，俾佢哋兩個單獨行。」我可以幫嘅就係咁啦肥蔥，你要加油啊！
「咁樣好咩？」呀紫不禁擔心，驚有咩萬一。
「都唔知啊，試咗先知嘛。」
「咩事啊其實？」小瑤插入嚟，係把口插入嚟。
「係喎，你仲未知。」呀紫將個情況話返俾小瑤知。
「所以依家諗緊辦法，等佢哋無咁尷尬囉。」呀紫同我都苦惱緊，咁複雜嘅嘢唔知點搞好。
「交俾我啦。」小瑤胸有成竹地說，喱股自信令我有莫名嘅不安。
「真係㗎？」呀紫信咗，「咁一陣交俾你啦喎。」
「得啦！你放心啦。」小瑤笑得好天真浪漫。
時間又返返嚟老麥，我哋都吹咗一陣水，我哋三個故意俾佢哋兩個坐埋一齊，製造機會。
我留意到，小瑤佢鬼馬一笑。
跟住肥蔥就成個人撞咗落小男度，連人有杯雪糕撞咗落小男度，搞到小男成件衫都係雪糕積，我就知我直覺無錯，真係出事啦。
「Sorry啊，我…我唔係有心㗎。」肥蔥又再激嬲小男，不過今次小男啲火真係出曬嚟。
「妖！你做咩姐。」小男毫不留情面咁話肥蔥。
「我…我賠返杯雪糕俾你啊？」肥蔥都唔知發生咩事，無情情就食咗個死貓。
小瑤仲未好似察覺到大件事，仍然沾沾自喜緊。
「唔洗啊！」小男怒氣沖沖咁走咗入洗手間，氣氛直插落冰點。
「係咪呢，好心做壞事啦。」我忍唔住斥責仲未識醒嘅小瑤。
「下？佢哋都講返嘢啦，唔係咩？」
呀紫知道小瑤並唔係故意搞破壞，所以都幫住小瑤。
「算啦，小瑤唔係有心，佢出發點都係為佢哋好姐。」
聽到肥蔥一頭霧水咁，唔知頭唔知路。
「發生咩事啊？」
「你估都估到頭先發生咩事啦。」我都畫公仔畫出腸啦，「小瑤頭先諗住幫你哋，等你哋唔洗咁尷尬嘛。」
肥蔥知道之後，竟然無聲出，反而靜咗落嚟。
過咗一陣，肥蔥先講：「事先聲明，我嘅愛情你哋唔好幫我手。」
「我想自己爭取屬於自己嘅愛情，如果我需要你哋幫手，我會開聲，其他嘅交返俾我好無？」
「我想靠自己努力令小男真係鐘意我，我相信我會感動到佢，唔好睇小男平時男仔頭咁，其實佢內心好細膩，佢會知道點做先最好，所以……交返俾我啦，你哋想幫我嘅心我收到㗎啦。」
肥蔥比平時更加認真，喱一刻我都覺得肥蔥好有型。
「對唔住啊，我頭先唔係有心…我都係想你哋可以講返嘢咋。」小瑤依家先意識到頭先自己好心做壞事，一臉緊張地同肥蔥道歉。
「我知。」肥蔥溫和地安慰小瑤，「我明白㗎，我都無怪你，不過一陣要同小男講返成件事啊。」
要講返成件事啊，我都有啲講唔出口喎…
過咗無幾耐，小男就由洗手間出返嚟。但係小男個臉色並無因為去洗手間喱段時間而有變化，臉色唔知係咪染上廁所嘅味道，好鬼臭。
「小男，你聽我講啊…」肥蔥心急地想解釋，但小男不加以理會。
「小男。」我叫住小男，然後頂一頂身旁嘅小瑤。
「小男，對唔住啊，頭先係我唔好，諗住幫肥蔥，點知整到你咁，真係好對唔住啊。」小瑤因為咁樣而急到喊出嚟，佢都因為咁而好內疚。
小男即刻講：「好啦好啦，無事啦，我明㗎啦。」
「我知道依家一時間要你接受我係好難，不過我會慢慢等，等你有一日會俾我感動到。」肥蔥嘅氣度，雖然依家感動唔到小男，但都感動到我哋幾個。
「所以我哋好似返以前咁啦，如果唔係…都幾奇怪啊呵？」肥蔥語調輕鬆，一副胸有成竹的自信。
用輕鬆嘅態度掩飾自己嘅尷尬⋯⋯我感覺⋯
「嗯！」小男都一口應承，之前嘅陰霾一下子消散曬。
「咁咪好啦！依家好返咪得囉！你都唔好喊啦。」我摸摸小瑤個頭，希望唔多唔少都可以安慰到佢啦。
我哋各自四散之後，得返我同小瑤，畢竟依家小瑤住緊我屋企，我當屋企多咗個細妹㗎，不過喱個細妹係少咁條神經咁，好難捉摸。
就好似依家咁啊，小瑤一副頹樣刻係塊面度，好明顯係話俾人知佢唔開心啦。
「點啊你，仲因為頭先嘅事唔開心？」
「我成日都做咩都做唔好，越幫越忙…」小瑤真心sad，落到嚟人間係有煩惱㗎啦。
「我哋呢，唔似天上面咁，咁開心咁幸福，無煩惱。基本上煩惱人人都有㗎啦，落到嚟感受下人間煩惱係咩一回事，係咩滋味，你就知做人其實唔易㗎。」
「嗯……我依家好似體會到啦。」
「我想繼續做好啲啊，人間的確好有趣，我每日都過得好充實。」小瑤笑得好滿足，佢嘅表情完全表露曬佢嘅內心。
自從小瑤嚟咗之後，我就多咗個伴，無咁悶，亦都慢慢習慣咗小瑤，融入埋我嘅生活入面。
從此我哋返學就五人行，上堂無聊就互相傳下紙仔解下悶。
至於肥蔥啦喎，一樣成日整蠱小男，佢哋兩個又變返好似以前咁，一對歡喜冤家。
今日中文堂個老師要我哋作文，作一篇叫做「最感動的事」。
「你有無俾我感動過啊？」肥蔥用支筆吉小男背脊。
「無啊！」小男無佢咁好氣，但在我看來，小男係幾受落嘅。
「我終有一日會感動到你喊啊，你睇住嚟啦。」
「咁就睇下你點作啦。」呀紫笑說，十分期待肥蔥會寫出咩文。
我同呀紫打咗個眼色，佢都明白我眼神嘅意思，等肥蔥寫完之後就直接搶佢篇文嚟。