《有一晚，我喺學校操場遇到跌落凡間的天使》: 【1】
「喂！中午食咩好啊？」肥蔥問佢前面嗰位女仔。
個女仔嬲爆爆咁答佢：「唔知啊！」
「喂啊，唔好嬲啦，頭先講下笑咋。」肥蔥成日都唔識死，係鐘意激嬲穎藍。
「好心你就唔好成日激嬲佢啦，激嬲完人又要道歉，你真係自己攞嚟。」坐佢隔離個女仔都忍唔住出聲。
「好啦……我知錯啦，最多一陣凍飲我嘅！」
「唔好理佢姐，淨係得凍飲喎！真係小家到佢啊。」我係旁邊同小男講。
小男係穎藍嘅暱稱，其實佢係女仔嚟，但係就比較男仔頭，其他人就叫佢小男，不過其他人就會話係男人個「男」囉。
「夏晨！你唔好亂咁係度加鹽加醋啦。」肥蔥不滿道。
其實明眼人都睇得出肥蔥係鐘意小男嘅，只不過佢自己都唔認，好幾次我單獨同肥蔥傾嘅時候，佢都避啊避咁樣。
小男就更加唔知添，佢哋不嬲都係咁反復無常。
我呢，就坐係小男隔離，而肥蔥呢，就同我女神坐。
所以我女神呀紫，就坐係我後面。
中學嘅緣份真係好奇妙，我哋本來唔熟，我哋中四分班嗰陣，大部分都係由其他班五湖四海咁聚埋一齊。
但就唔知因為咩事而熟咗，依家要我諗返起咩原因，我都講唔出嚟添。
我哋四個人嘅感情，係我會珍惜一世嘅感情嚟。
我哋喱班係歷史班，全班主修歷史，剩底嗰科就睇自己想讀啲咩。
個個一入嚟都係痴返之前自己班，識或者熟嘅朋友一班，所以一開始個個圈子係分得好明顯。
就連班主任分好座位，唔熟嘅都係唔會點講嘢。
但好彩嘅係，分好座位之後，班主任都懶得再分，佢就任由我哋咁樣坐，我哋都咁樣坐咗一年啦。
我哋四個慢慢打破隔膜，我都唔記得咗由幾時開始熟，我諗係慢慢一件一件事堆疊吧？
「唔好彩佢姐！佢咁惡。」我笑住咁同小男講。
「好！」小男都同意。
「邊個叫佢咁可惡，話你男人婆，俾我就嬲死佢啦。」我斜斜地望住肥蔥，對住佢賊眉賊眼咁笑。
肥蔥伸手過嚟戳我一下腰位個笑穴，假生氣地說：「你條友仔啊！」
「好啦好啦，肥蔥佢加多個雪糕，你就大人有大量，原諒佢啦。」通常我幫下口，小男就會算數。
其實佢唔係成日嬲㗎，佢同我哋班啲男仔好玩得，但佢唔鐘意人哋話佢男人婆。小男樣子係幾討好，不過就性格男仔頭啲，豪邁無架子，有足夠嘅親和力。
情緒亦都係來得快去得快。
「哼！」小男無轉過頭去同肥蔥fd返，睇怕依家都仲係唔想理肥蔥住。
肥蔥都好識做，繼續抄呀紫嘅功課。
而我，由一年前坐係喱個位置無幾耐，就睇鍾意上呀紫。佢嗰種文靜而又正經嘅氣質，好吸引我注意。
我諗！喱啲就係所謂嘅一見鍾情！？
係我哋幾個未熟嘅時候，我會成日借啲意問後面嘅肥蔥借嘢，目的就係可以偷偷地望下呀紫。
事關一開始問隔離個女仔借嘢唔係咁好，問男仔好啲，所以就會問肥蔥，問問下我同肥蔥都熟稔起嚟，跟住就會影響埋周邊嘅人。
我哋幾個可以坐埋一齊，好難得；亦都好難得地咁開心。
「今日一齊放學啦。」肥蔥叫道。
「唔啦，我仲有學會啲嘢要整。」我參加咗足球學會，係喱間無乜校隊嘅學校，由細到大鍾意踢波嘅我，只好參加足球學會，過下踢波鋪隱。
學校個操場，都唔知留低咗我幾多腳毛。
但話咁快就已經中五，今年我接咗個學會主席嚟做，今日留低想整理遲下招募新會然啲嘢。
「又踢啊？」肥蔥身形小小肥，但又懶得做運動，最大興趣呢，就係同一般男性一樣——打機！
「今日出面落咁大雨，點踢啊？」
望住出面場雨，總有些時日，總係會落狗屎咁樣落，大家都諗住等細雨啲嘅時候走。
所以咁啱喱啲時候可以俾我做下自己嘢。
呀紫都因為要補習而被逼要早走，中四嗰陣我哋四個都會間唔中一齊放學，一齊去學校後面嘅M記食杯雪糕已經夠我哋坐上個幾兩個鐘。
對我哋嚟講，食個麥旋風已經係高消費，有多個閒錢剩先會嗌，平時都係新地多。
「小男，睇你都無帶遮㗎啦，洗唔洗我遮你啊？」肥蔥問小男，語氣帶點挑釁。
喱兩對真係歡喜冤家嚟，成日都互相挑釁嚟挑釁去，以前我會幫下手勸下交，依家早已見怪不怪，可能喱啲就係佢哋嘅相處模式掛？
小男早就嬲完，不過佢聽到肥蔥挑釁佢話「無帶遮」，又心有不忿，道：「我問隔離班啲人遮都唔要你遮啊！哼！」
到咗中五，距離DSE越嚟越近，好多同學都開始慢慢走去補習，咩類型嘅補習都有，為嘅就係提高自己成績。
「我哋又順路啊係咪？嚟啦，我遮你啦！」肥蔥興奮咁講，佢既要撩人，又要氹返人，認真犯賤。
「好啦好啦。」小男勉為其難咁承認，無肥蔥咁好氣。
係我眼中，佢哋感情真係好好，成日打打鬧鬧，嘈個唔停。
相反我同呀紫就好似香港同九龍咁，隔咗個海。
放學嘅鐘聲敲響我哋嘅期盼，本來個個都急不及待咁咩起書包準備行出課室，但因為一場雨，打消咗好多人放學嘅念頭。
但呀紫佢今日出奇地叫住我，然後輕輕叫咗聲，「喂⋯⋯」
我轉頭望住佢，睇嚟佢唔係叫我，而係叫「我哋」，不過呀紫欲言又止。
「都係無事啦，下次再講啦！趕時間⋯⋯」然後呀紫就行出班房，我嘅視線無離開過呀紫半步。
可以咁樣望住自己鐘意嘅女仔，對我嚟講，已經好滿足。
「小男！行啦。」肥蔥同小男都走埋，無幾耐，慢慢場雨開始細，周圍得返我一個。
靜靜地留係度做嘢都幾唔錯。
唔經唔覺夜幕低垂，學校操場都著埋燈，成個走廊都唔見咩人影，我都開始收拾好啲嘢，準備走。
唉，好死唔死，一落到樓下，場雨又大返，衝口而出就係一句粗口。
喱個鐘數連老師都走啦。
我唯有去小食部度坐下等雨停。
操場一個人都無，成個全世界好似淨係得落得嘩啦啦嘅下雨聲。
我去小食部個汽水機買返罐冰極檸檬茶飲下。
個汽水機就近學校嘅操場，放眼望去，遠處閃過好幾道雷電。
但奇怪嘅係，點解硬係覺得嗰幾道雷電係慢慢⋯⋯
慢慢地⋯一道⋯又一道地⋯⋯閃緊過嚟嘅？
我剛剛嘟完八達通，㩒完個冰極，等緊冰極bb出世，嗰幾道疑似閃緊埋嚟嘅閃電⋯⋯
突然間就閃正係我哋學校嘅操場！
喱一道閃電嘅光芒刺痛我雙眼，伴隨而來嘅係震耳欲聾嘅聲響，心諗：唔撚係掛？我差啲就俾雷劈中。
「哇！屌！」我第一句就係屌出嚟先，嚇到我即時退後兩步，心臟好似經歷完地震咁。
我係咪做錯事得罪咗神？
因為個汽水機行前兩步就係操場，所以咁啱可以睇到出面咩環境。
嗰道閃電一閃而過，我仲仍然陷入驚嚇嘅情緒入面。
「搞乜鬼啊？」
一切恢復平靜，頭先嗰道閃電突發劃破天際，整亮咗本來漆黑嘅天空，就連雨滴都可以睇得清楚。
係濛濛細雨入面，我好似見到個人影⋯⋯
喂⋯⋯唔好玩喎⋯⋯
咁夜啦，學校都好似無曬人啦⋯⋯
係雨影當中，個人影身穿白色衣裳，遠望似係一條白色連身裙，緩緩地走過嚟。
大佬⋯⋯我後背開始寒起上嚟，我前排先聽到傳聞過學校以前係戰亂時期嘅亂葬崗嚟，唔係咁邪啊？
我即刻嚇到往學校大門嘅門口跑過去，但中間必須穿過一條長長嘅走廊，我諗都唔諗就衝去學校門口。
喺走廊嘅盡頭，個白衣人就企正係走廊嘅另一端，嗰種詭異嘅氣氛令人心脈飆升，出面又行雷閃電咁，想搵人求助又求助無門。
我個腦好慌亂，一亂就好難諗到嘢，就係俗人所稱嘅個腦一片空白。
個白衣人留住一頭金色嘅長髮，女仔嚟；一身白哲嘅皮膚。離遠望淨係望到咁多。
我即刻諗都唔諗就衝咗入更衣室度藏起嚟，真係唔好睇少人踲求生慾，咩都做得出㗎。
「人類？」
「哇！我屌！！」啱啱推開度門，迎面就撞正個白衣少女，嗰種驚嚇兜口兜面直衝埋嚟。
「喂⋯⋯喂喂⋯」我控制唔住我把抖顫嘅聲音，續道：「你⋯你你你想做咩啊？」
白衣少女長相清純，天真無邪嘅臉容映入眼簾，仲對我露出個燦爛嘅笑容，同頭先營造嘅感覺好大反差，反而令人更加覺得怪異。
個笑容直叫人心寒。
「你係人類？」一把清秀又甜美嘅聲音從佢嘴裡發出，但唔知點解望住佢嘅眼神，笑容配上佢喱個眼神係極之違和。
「Kero？」我諗起細個睇嘅一片卡通片，講述外星人侵襲地球，佢會問我係咪人類⋯⋯好有可能係一個嚟到地球，蕩失路嘅外星人。
我見白衣少女聽到咁無乜反應，於是我緩緩地伸出我嘅食指⋯⋯緩緩地向佢伸去。
我已經俾我嘅恐懼徹底地支配住。
「E⋯⋯ET？」
「你做咩啊？」白衣少女笑笑口，突然間又變得好和善。
「你係⋯⋯係外星人？」
「我唔係外星人啊，我係天使啊。」喱個白衣少女真誠地道。
老實講，我頭先嘅恐懼失去咗大半，因為好似感覺喱個白衣少女無乜惡意，但又不能太意，實在可惡！
「天使？」
「係啊！」不知何解，佢好興奮。
「你係人類啊嘛？」佢成個細蚊仔咁，拍曬手掌，跳起上嚟。
「係又點啊？」我試探地問，我講出嚟之前一定係思考過，小心翼翼咁講。
我驚一陣唔知咩事就死係佢手上，我仲未扑野㗎，唔想死住啊。
「咁你帶我去見識下喱個世界啦！」白衣少女帶著興奮的笑容，跳著興奮的舞步，興奮地過來拉著我。
突然由一個恐懼嘅氣氛轉變得咁戇鳩，個反差實在太巨大，令人一時反應唔過嚟，只能夠呆係原地。
我心入面十萬個問號⋯⋯