【少甜，非甜故】為左變性，我唯有做雞。: 第四章 醉 (9)
我不知道精神科醫生是特別擅長讀心，還是蒲精猜枚特別厲害，到頭來王偉明只是喝了一口烈酒。
「我唔理呀，我唔玩遊戲啦，你同我飲左呢杯酒。」半醉的逸雋此時已脫下襯衣，只穿著V領短袖衫。
「其實一開始咁咪幾好，你地又何必呃酒飲呢？」他照樣面不改容地一飲而盡。
「今晩我請，當係多謝你呢個好醫生。」我不自覺地倚在他的肩膊上。
「我不過係個庸醫。」
「錯！我話你係好醫生你就係好醫生。」逸雋借故緊抱偉明的臂彎。
他看來不介意被左擁右抱，即使是被男女同志各一夾在中間。
偉明拿起晶瑩剔透的酒杯把玩，用另一隻手托著腮子問道：「你地覺得點先為之一個好醫生？」
「要靚仔，有錢，同大隻。」逸雋真是個膚淺的低等生物。
「Sorry，我幫你唔到。」王偉明裝作愛莫能助，卻未能說服我們。
「我覺得要為病人著想，個人唔好太死板，同埋唔好有架子。」我想像著旁邊的他的形象說道。
「我啲前輩成日話，好醫生最緊要有兩個條件， 就係Knowledge 同Ethics。有knowledge無ethics就無同理心又無醫德，好易比人投訴，有ethics無knowledge就仲大獲，隨時搞出人命，如果唔係和尚同牧師都可以醫人啦？咁你地話啦，一個亂搞男女關係既人渣又點會係好醫生呢？」