[HiHi喇] 好地地落街食枝煙, 點知.......: (10)

剛踏出破屋不久，雨勢便出乎意料地迅速減弱。

我和翠思依照著家強所指的方向，尋找他所謂的「安全屋」。

沿路上，翠思不發一語，看樣子還在怪我和家強欺騙了她。

「睇來啲雨就來停喇喎。」我刻意找些話題打破僵局。

說時遲那時快，雨竟真的停了。





隨著烏雲逐漸散開，淡淡的月光如水銀般洒在地上。

但翠思還是低著頭默默前進。

四周一片寂靜，叢林裏偶爾傳來夏蟬的低鳴。

我只好轉換話題道: 「家強條友係咁家喇，成日都會諗埋哂啲古靈精怪野，妳就唔好太介懷喇。」

還是沒有回應。





「我信妳係無心整傷佢既，妳都唔似咁既人。」

「我特登家。」翠思語氣平板道。

「咩話？」我呆站在原地。

「我果時見到佢隔離有個窿特登推佢埋去家。」

聽她說得如此輕描淡寫，我不禁火從中來。





「妳有無過份啲呀!! 」 

「吹呀？」翠思挺起胸膛逼近我。

「妳.....」我氣得臉都紅了。

她昂起臉，趾高氣揚道： 「我頭先打左你，你夠疆咪打番我咯!」

啪!

我確確切切地賞了她一巴掌。

翠思捂著半邊臉，神色怨恨地盯著我。

我氣憤道：「妳睇下人地凱琳幾善良，點解妳唔可以學下人呀!」





「係呀! 佢最善良呀! 佢乜都係最好家啦!」翠思發了瘋似的大叫。「睇來你好鐘意佢咁喎，不過我勸你咪戇鳩啦! 就算凱琳真係鐘意你，都只不過係因為你個樣生得似佢以前條仔喳!!」

我腦袋霎時嗡了一聲。

我一直想不通，凱琳當初到底是看上我哪一點而接近我。

現在才知道，我一直都只是她前度男友的代替品。

「點呀，好大打擊呀? 你夠我俾人屈咁大打擊咩?」 說罷，翠思便哭著向前跑去。

俾人屈? 

她是指之前推跌家強的事嗎? 





難道她不是故意的? 

到我回過神來的時候，翠思已消失不見了。



終於，我在叢林附近的一間石屋旁邊找到了翠思。

只見她蹲在門前的石級上泣不成聲。

我沒有作聲，只是默默地坐在她的身旁。

直至她止住了哭聲，我才輕輕道: 「Sorry 呀，整喊妳。」

「你知就好啦。」翠思緩緩地抬起頭。





一時間，我被她梨雨帶花的臉容吸引得忘記了說話。

「做咩呀? 」翠思抺了抺自已的臉。「我啲妝甩哂好樣衰呀?」

我情不自禁道: 「呢個係我見過最好睇既素顏。」

翠思破涕為笑道： 「咁你就係我見過最樣衰既素顏。」 

「車。」我不以為然道:「靚仔先無本心呀。」

「咁你連本錢都無咯。」翠思忍俊不禁。

我們兩人一起哈哈大笑，剛才緊張的氣氛消散於無形。





「係呢，點解妳先前話俾人屈既?」我問道。

「我講你會信咩? 」翠思瞅了我一眼。

「信。」我真誠地看著她。

「車。」翠思避開了我的視線，道：「之前你個friend家強追上來果時，我見佢下一步就會踏落地上面個坑，咪伸手推開佢咯，點知會累到佢拗柴既者。」

「咁點解當時妳唔講?」

「無人信，講來都哂氣。」翠思將腳邊的一顆碎石拋得遠遠的。

「咁之後你又喺破屋度踏多佢一腳?」

「哦...」翠思笑了笑。「果下純粹係我見佢唔老實想教訓下佢者。」

「唉...」我哭笑不得道: 「真無吹妳唔漲呀。」。

「話時話呢間係咪我地要搵既安全屋呀? 」翠思站了起來，指了指身後的石屋。

「睇怕係喇，附近都無其他房屋。」

「橫掂威叔又未到，不如入屋睇下啦。」未等我同意，翠思便走進了石屋。

「小心啲呀。」我無奈地跟著她後面。

這間石屋，比起之前的破屋好上許多，至少我很容易便在門旁找到了燈制。

不得不佩服家強的心思，事關屋裏面的家居用品一應俱全，有床又有沙發，中間還有一堆木柴以供生火之用。

「嘩，呢度仲有煙花添喎。」翠思指著沙發旁邊的一個紙皮箱道。

我好奇地把裏面的煙花逐樣拿出。

「龍吐珠，鑽地龍....仲有炮仗添呀!」

「呢個好似幾好玩。」翠思遞給我兩條像「甘大枝」的煙花。

「迷幻星? 」我歪著頭道:「個名咁搞野既? 點玩家?」

「點著佢咪知咯。」翠思很難得露出了期待的表情。

我掏出了火機，對著門口點燃了一根。

燦爛的光芒隨即在棒頭冒起，猶如一朵閃閃發光的蒲公英。

「嘩，好靚呀。」翠思興奮得像個小女孩似的。

「俾妳揸住喇。」我把迷幻星交在她手中。

「嘻嘻。」翠思一瞬不瞬地看著煙花，渾然不知道自已笑得有多自然，多燦爛。

我由衷道: 「其實妳依家咁樣真係好靚，好過妳平時乸埋口臉多多聲啦。」

翠思隨即板起臉，收起了笑容。

既然此路不通，我唯有再度轉換話題。

「係呢，點解凱琳會同佢之前個男朋友分手既？」

「講起佢我就慶。」翠思一臉厭惡道: 「條友係我同凱琳喺Sky Bar識既，一開始既時候對凱琳千依百順家，扮到成個絕世好男人咁，我都差啲都走漏眼。」

「咁之後發生咩事呀？」

「無咩事，純粹係佢扮死狗借左凱琳好多錢，之後就粒聲唔出走左佬者。」

「哦，呢啲情場老千周時有啦。」 我又點亮了另一根煙花。

「都唔明凱琳點會睇上呢啲人家。」翠思把另一枝湊了過來借火。

「貪佢靚仔掛。」我笑道。

「唔知醜，都話左你唔靚仔咯。」翠思道。

「哦。」我裝作恍然大悟道: 「係咪因為我個樣生得似果個仆街，所以妳對我既態度先咁差呢？」

「咪自作多情啦，我對每個男人都係咁。」翠思望著煙花呆呆出神。

看著她佈滿泥濘的狼狽樣子，我不禁心生憐惜。

說到底，她一直強裝倔強只是深怕受到傷害而已。

「咁妳又唔使咁灰既。」我安慰道。

翠思輕輕地嘆了口氣，道:「埋得我身既，咪淨係想同我上床，有邊個會係真心想了解我吖.....」

「呢個世界係多賤精，但唔代表無好既男人。」 

「係就好啦。」

我受不了這種她這種淡淡的哀愁，於是道:「喂，表演樣野妳睇。」

「咩呀? 」翠思抬起頭。

我將兩枝點著的迷幻星倒轉，假插在自己的鼻窿，然後問:「似唔似妳今日喺船上面幫我畫既鼻毛呀?」

「嘩哈哈!」 翠思鼓掌道: 「好似呀，仲識發光添呀。」

「妳笑返咪幾好。」我憐惜地看著她。

翠思竟害羞地的別過了臉。

「信我。」我蹲在她的前面，握著她的手道: 「以妳咁既條件，一定會搵到個真心錫妳既人。」

「死開啦.....」翠思的淚水在眼眶裏打滾。

我拋下手上的煙花，給她一個有力的擁抱。

「你做咩呀，放手呀!」

任憑她如何拳打腳踢，我也沒有放開。

我知道，她現在很需要別人給予的溫暖。

「死咸濕佬! 死咸濕佬! 」翠思把我的膊頭哭濕了。

「係喇係喇，你就當我想抽水啦。」我輕撫著她的秀髮。

誰知翠思竟然道:「抽水咁抽既咩，我教你啦! 」

說罷，她便一把吻在我的唇上。

這一次，我沒有掙扎，安然陶醉於這溫柔的一吻。

正迷糊間，門口卻突然傳來了一聲呼喝：

「打劫!」

我和翠思即時分開。

只見威叔笑嘻嘻地站在門口，道: 「點呀? 我晏晝啲戲係咪好逼真呢?」