[HiHi喇] 好地地落街食枝煙, 點知.......: (9)

「我諗佢無追上來喇。」家強氣連喘喘地靠著一棵大榕樹道。

「點搞家! 你唔係同個司機好熟既咩？! 點解佢會打我地劫家! 」翠思人未站穩便開始破口大駡。

「點知者! 唔熟唔食掛。」家強攤了攤手。

「咁我地依家點算呀?」凱琳撥了撥她淩亂的頭髮。

我抬頭望著天空道: 「依家個天黑成咁，我諗要盡快搵個地方避雨喇。」





「果邊好似有光喎。」 家強指著前方道。

「有咩?」我張目望去。

除了密密麻麻的灌木和雜草，我看不到有任何燈光。

「行左先算啦。」家強向我打了個眼色。

我急步趕到他身旁，悄聲問:「你搞乜春呀?」





家強神秘地笑了笑，道: 「你無聽過人喺危機之中最易培養感情既咩?」

「吓？即係威叔打劫係假家?」

「真既話你估我會唔會咁夠彊衝出車吖?」

「仆你個街吖。」我頓時鬆了口氣。「咁你依家諗住點?」

「你同我定啦。」家強笑道: 「我已經準備好一系列既遇難情節，保證驚險浪漫又刺激。」





「嘩，玩到咁大，你諗住點收科呀?」

「小事啦，到其時咪話係威叔特登為我哋準備既體驗營咯。」

「咁樣未免有啲牽強喎......」

「你地兩條友鬼鬼崇崇講咩呀?」翠思喝了過來。

「無呀。」家強停下腳步，換上嚴肅的表情道:「我地商量緊係咪應該分兩pair人手拖手咁行，先無咁容易走失者。」

「好啊。」凱琳毫不猶豫地牽起了我的手。

「喂，唔係咁…」家強想說甚麼又不敢說。

翠思奇怪地瞥了我和凱琳一眼，獨自走在最前面。





「都話左要拖手咯!」 家強不甘吃虧地跟了上去，剩下我和凱琳二人愣在原地。

「呀豪, 你驚唔驚呀？」凱琳輕聲問道。

「梗係驚啦，老笠喎。」我言不由衷道。

「我就唔驚喇。」凱琳握著我的手緊了一緊。「你知唔知點解吖?」

「唔知喎....」我別過頭，不忍看她天真的笑容。

我們這樣子欺騙她們，會不會太過份?

「嗚啊!!!!!」





前方突然傳來一聲淒厲的慘叫。

「又搞咩呀?!」 我馬上牽著凱琳急步上前。

只見家強神色痛苦地躺在一個泥坑旁邊，不住打滾。

我跑到他身旁問道：「喂! 呢次堅定流呀?」

「條八婆咯!」家強毫無顧忌地指著翠思大聲道:「唔肯拖手咪算撚數咯, 使唔撚使咁大力推開我呀, 仲要累到我拗柴!」

眼看他痛得眼水直流, 倒不像是假裝。

「男人老狗咪喊苦喊忽啦。」我安慰道:「 Tracy一定係無心既，係咪呀?」

但翠思只是神色木然地盯著遠方, 不發一語。





「你講呀, 好撚痛家!」家強仍舊未能息怒。

「不如我地一齊扶住你行啦。」凱琳提議道:「再唔行威叔又會追上來家喇。」

「Helen妳真係好心地喇，唔似得妳個friend.....」 」 家強餘怒未消地瞪著翠思。

「講少兩句啦。」我和凱琳合力將他扶起。

「Helen呀。」家強問道:「妳咁純品點會識到呢啲損友既?」

「你講夠未呀! 」翠思終究按捺不住。

凱琳連忙勸道:「你地唔好嗌交啦....」





轟隆!!!

突如其來的雷聲把我們嚇了一跳。

「死啦! 要落雨喇! 」凱琳著急道。

話音未畢，豆大般的雨點便從烏雲密佈的天空傾盆而下。

「嗱嗱聲向前行啦! 」家強邊說邊把雙手架在我和凱琳的肩上。

我們踉蹌著於雜草泥路上匍匐前行。

無奈雨勢越下越大，眼前的道路亦變得模糊不清。

轟隆！！

一道又一道的閃電劃破天際，把叢林照得亮如白畫。

但剎那過後，四周又回復一片漆黑。

「到未家! 」我必須大喊才能蓋過雨聲。

「奇怪喇。」家強皺眉道：「間屋明明係呢頭家喎.....」

「唔該你快啲啦!」 狂風夾著雨點不斷打到我們的臉上。

「你地睇下!」凱琳指著左上方叫道。

我瞇著眼晴望過去。

密密麻麻的雨點中，我依稀可以看見不遠處的叢林裏有一幢建築物的剪影。

「好似唔係果邊喎.....」家強沉吟道。

轟隆!! 

「行啦仲講!」翠思一馬當先地朝著建築物跑去。

翠思每踏出一步，地上便濺起一大片泥水。

我吃力地攙扶著家強 ，臉上分不清哪些是汗水，哪些是雨水。

凱琳那邊的情況也不樂觀，但她仍然咬緊牙關，支撐著家強的體重。

幾經辛苦，我們終於來到了建築物的跟前。

那是一幢既像破廟，又像是荒廢了很久的村屋。

斑駁的外牆殘破不堪，看樣子隨時都有倒塌的危險。

古舊的大門中間懸掛著一塊搖搖欲墜的紅色牌坊，從剝落得七七八八的油漆當中，我們只能夠勉強看見最後那一個「宅」字。

「你都好有心思下喎...」 我在家強耳邊道:「呢度仲恐怖過Halloween啲鬼屋呀。」

「你戇鳩家。」家強呑了呑口水。 「我咁驚鬼會唔會玩埋啲咁既野呀...」

「你講真家? 」我不自覺鬆開了手，家強即時痛得大叫。

「仲企喺度做咩呀? 」翠思不耐煩道: 「入去避左雨先喇。」

她輕輕一推，大門隨即「呀」一聲打開。

破屋裏空無一人，整個空間瀰漫著一股酸縮的味道。 

驟眼所見, 大廳的傢俬七零八落，表面還積滿厚厚的灰塵，顯然很久沒有人在這裏居住。

「嘩屌......好撚恐怖...」家強滿臉懼色。

我放聲喊道:「有無人呀？」

叫聲迴蕩著整間破屋，卻得不到回應。

「嗌乜春呀.....呢啲屋搵鬼住咩...」家強驚得臉色發青。

「唔係喇.....」我擦了擦汗。「穩陣起見，我都係行入啲視察下環境先。」

「我又去。」凱琳道。

我搖頭道:「妳地都係喺門口附近等我啦，有咩依旭走佬起上來都快啲。」

翠思想說甚麽，又閉上了嘴。

「最衰我隻腳傷左啦，唔係我都可以陪你去。」家強挨著大門坐了下來。

我十分明白這只是他為了保住面子的廢話。

「你要小心啲呀。」凱琳關心道。

「嗯。」我轉過身，打亮了火機。

籍著微弱的火光，我戰戰兢兢地在屋子內緩步而行。

外頭仍然風聲颯颯，聽起來很像女人的哭聲。

真後悔沒有帶神婆所贈的護身符來。

但其實到目前為止，我也不知道那道符究竟靈或不靈。

想著想著，我已走到了大廳的最深處。

那裏擺放著一張供奉靈位的神枱。

我撩開纏繞在枱上的蜘蛛網，伸手去點上面的燭台 。

沒想到蠟燭一點即著，嚇得我不小心打翻了燭台旁邊的神主牌。

「有怪莫怪，細佬仔唔識世界。」我畢恭畢敬地將神主牌扶正。

只見牌上面刻著:

王氏故女凱琳之靈位。

剎時間，我全身如墜冰窯。

原來這一切都是個局。

凱琳處心積慮便是想引我到她的故居，與她 長相廝守 。

這樣看來，翠思很有可能便是替她達成遺願的幫兇。

我驚慌地到處張望，尋找逃生的方法。

但全屋唯一的出路便是兩隻女鬼所在的大門。

我應該不顧一切地奪門而出嗎？

不行!

我不可以棄家強而去這麽衰仔。

雖然那仆街成事不足，敗事有餘。

但怎說也是兄弟一場，要逃便一起逃!

「嗚啊啊啊啊啊啊!」

我鼓氣勇氣向著家強衝了過去。

「做乜撚野呀! 」家強一個打滾躲開了我。

「再唔走來就唔切家喇!」我再度撲向家強。

「屌你咩!」家強用盡全力地頂著我的身軀。 「我成個遇難計劃係叫你擒女，唔係擒我呀!」

「你唔明家喇! 」我力竭聲嘶道:「前面個神主牌寫左凱琳個名，佢一心想害死我地兩個呀!!」

「你係咪傻撚左呀!」

「你信我啦!!」

「唔該.....」凱琳拍了拍我的膊頭。「請問你係咪講緊呢塊牌呀？」

我回頭一看，凱琳竟拿著自己的神主牌站在我的面前。

那目無表情的臉容配搭上搖曳不定的燭光，嚇得我全身發軟。

「唉，無啦無啦。」我攤在地上，閉目待死。

只聽凱琳奇怪道：「王氏故女？我都唔係姓王既.....」

「無啦無啦.....」

「唔信你自己睇下喇。」

我將眼睛瞇開了一條縫。

凱琳已將自己的身份證遞了過來。

我接過身份證，訝異道:「吳凱琳?」

「係呀。」凱琳失笑道:「我無同你介紹過我既全名咩?」

「吓.....嗯.....好似無....」

「是咁的。」家強搶著道:「我個friend血糖一低就會神經緊張，大家千奇唔好怪佢。」

「係呀係呀，仲會嘔奶同埋消化不良添。」我尷尬到語無論次。

「哈哈哈哈。」 凱琳捧腹大笑。「 呀豪你好可愛呀。」

「係咩?」我和家強同時道。

「咪住! 」翠思神色不善地走向家強, 問道：「你頭先講既遇難計劃，究竟係咩一回事?」

「哦..」家強乾笑了兩聲，道:「是咁的....啊啊啊啊啊啊!」

只見翠思邊踏著家強的腳踝邊道:「你最好同我老老實實。」

「有事唔可以慢慢講既咩!」我站起來拉開了翠思。

「放手呀! 」翠思用力掙扎。

「點解妳旭啲就折磨人呀! 」我緊捉住她不放。

「你理得我者!」翠思一巴打在我的臉上。

那清脆的掌聲在屋內響起了回音。

凱琳激動道: 「Tracy妳做咩打佢呀! 」

翠思咬緊下唇，氣得渾身顫抖。

「唔好撚嘈啦! 」家強坐了起來，忿然道: 「我講喇!」

然後，他便把原本的計劃一五一十地告訴了我們。

「所以話....我地本來要去既係另一間屋？」凱琳問道。

「係呀......」家強垂頭喪氣道：「再過多一個鐘，威叔就會去果度接番我地家喇。」

翠思鄙夷道: 「得你啲柒頭先會諗埋啲咁既屎橋。」

「收爹啦妳。」家強不服道: 「唔係妳搞到我拗柴，我個plan不知幾成功。」

為免他們再度鬧翻，我息事寧人道:「當務之急，係咪應該盡快去你指果間屋，等威哥來救濟我地呢?」

「你去接佢過來啦。」家強無賴道:「出面橫風橫雨，我隻腳又腫到豬蹄咁撚樣，點都行唔旭家啦。」

「好啊。」翠思二話不說便走向門口。

「咁我地走先啦。」我故意牽起凱琳的手惹家強生氣。

「喂! 」家強喊了過來：「你個人渣唔係諗住留低我一個喺度等呀嘛？!」

我沒好氣道:「咁唔係你想點呀？」

「你明知我受傷，點都留個人陪我啦.....」家強故意裝出一副可憐的樣子。

凱琳鬆開了我的手，微笑道:「你同Tracy去啦，我留喺度照顧佢。」

「咁點得家? 」

「唔通你放心俾佢地兩個單獨相處咩? 」 凱琳指了指站在門旁等侯的翠思

「咁又係。」我無奈道:「如果俾佢地兩個留喺度既話，返到來家強可能已經死左九世。」

「咪係咯。」凱琳笑道:「你地去啦，兩個人點都叫有個照應嘛。」

凱琳這般溫柔體貼，令我有種擁抱她的衝動。

可是神主牌一事仍然令我猶有餘悸，只好道: 「我地會早去早回家喇。」

「一言為定?」凱琳伸出了手指尾。

「一言為定。」我和她打了個勾勾。