[HiHi喇] 好地地落街食枝煙, 點知.......: (6)

我攤坐在的士後排的座位上。

望著車窗外急速橫移的街景，我不禁陷入了迷思。

試問我怎樣想像到，一夜之間事情會發展到這個地步。

「哥仔。」的士司機道:「見你個樣咁愁，播隻靚歌你聽下呢?」

我苦笑著點了點頭。





司機扭開了喇叭，播放的卻是小鳳姐的「喜氣洋洋」。

「得喇，熄左佢啦。」我沮喪道。

「屌。」司機不悅道 :「 依家啲後生真係唔撚識貨。」

我拿起電話，躊躇著應否為自己的不辭而別而向凱琳道歉。

電話卻剛好因為沒電而熄了機。





這樣也好。

反正我也需要點時間來沉澱思緒。

現在的我，還未有足夠的勇氣面對她。


回到家中，已是凌晨三點，但客廳竟然還有人談話的聲音。

「都話左有掛住妳咯....」





原來家強不知何時已醒了過來。

只聽他嗲聲嗲氣地對著電話道:「唔好嬲啦，最多聽日錫番妳啦。」

我可沒心情聽他哄妹妹仔睡覺，索性把外套一脫便返回房間攤到床上。

我眼光光地瞪著天光板，思潮起伏不已。

今晚發生的一切就像夢境般不真實。

有沒有可能，其實凱琳和翠思都是鬼？

我不禁苦笑。





如果真的是撞邪，那事情反而會簡單得多。


陽光從廉價的窗簾透了進來。

感覺上，我合上眼才不夠幾分鐘。

我翻過身打算多睡一會，但家強卻在這個時候衝了進來。

「嗱嗱聲同我起身!」

「晨早流流做乜鳩呀?」我鑽進了被竇。

「起身啦! 」家強一手扯開蓋在我身上的被單，大聲道:「我地要去旅行呀! 」





「我係咪前世欠撚左你呀，星期六俾我訓多陣都唔得!？」

家強沒有理會我，猶自道: 「有女陪我地去家，快啲起身擦牙洗臉啦。」

「無啦啦又咩女呀?」

「是咁的.....」家強在我的床邊坐了下來。「尋晚半夜有條女打來，應該都係之前蒲開識落果啲。佢一開口就問我喺邊度，仲話好掛住我。咁我見有女自動送上門咯，咪同佢傾多陣計咯。」

「咁又點呀?」我挨著床頭板坐了起來，神智還不是十分清醒。

「跟住就正咯。」家強連連搓手道: 「同佢傾左成晚，我發覺自己同條女相當岩嘴型，之前一定係啲club太嘈所以未熟絡到。依家上天俾多次機會我，我無理由唔好好把握。」

「所以呢?」我打了個很大的呵欠。

「所以我咪趁住今日係禮拜六，特登約佢出來去個短trip聯誼下感情咯!」





「咁關我撚事呀! 」我倒過頭又去睡。

「咩唔關你事呀! 」家強再度把我拉起。「最衰條女唔知怕醜定乜春，係都話要帶埋個女仔friend去，仲叫我約多個朋友，話咁樣開心啲喎。」

「係咩？我一啲都唔開心咯。」我再次倒回床上。

「唔好咁啦。」家強整個人趴在我身上，哀求道:「又係你叫我正正經經搵番個女仔既，依家我咪聽哂你話咯。一場兄弟，你唔係唔撑我呀?」

「我撑你老母。」我用手捂住了耳朵。

「仆你個街吖! 」家強坐直了身子，正色道：「你唔係唔記得肥婆蓮單野呀？」

「喂，講好左唔翻舊帳家喎。」





「我唔撚理。」家強竟在我的房間點了口煙。「你溝Gigi果時我幫你頂左佢個肥婆姊妹，呢筆債你點都要還。」

「你明明話肥婆蓮雖然樣衰衰，但係好好肉地家喎!」 我氣得跳了起來。

「一單還一單。」家強無賴道：「總之你今次去撚緊家喇，話唔定條女個friend好撚正呢。」

「靚女啲friend幾時有正過吖？」

「咁呢個係你既問題啦。」家強吐了口煙便走了出房。