[深夜重口味] 黑色蒲公英: 下世都要做夫妻

話說 Joyce 彌留之際...

「老公，老公...」
Joyce 醒咗，我馬上捉住佢隻手。
「老婆，我嚮度。」
我用下巴掂住佢額到，佢感覺到我，平靜落嚟。
「頭先 Carmen 幫你洗過面，試下擘開眼。」
佢慢慢打開眼簾，雖然好細，我清楚見到清晰嘅瞳孔。
「老公，你咁多白頭髮，老咗咁多嘅?」
「啲白頭髮十幾年喇。」


「你隻手好震，係咪好辛苦?」
「你係我最重要嘅人，照顧你點會辛苦?」
我改為梳掃佢啲頭髮，好似安撫小朋友咁。
「老公，我想你攬住我。」
於是我瞓埋上床，攝隻手去佢頸底，佢成日人挨入我懷中。
「老婆，我好耐冇抱過你喇。」
「我記得初初識你果時你好咸濕。」
「乜你記埋依啲野架! 不過我果時有無窮無盡嘅精力，成日唔畀你落床。」
「你仲有好多古靈精怪野，成日氹我開心，本來我嘅人生好灰暗，係你幫我油上顏色，多謝你。」
佢合埋眼，我錫佢嘴唇，雖然有啲乾，不過感覺好甜。


「你係我嘅一切。」
佢想擰轉身，不過身體太虛弱，我幫一幫佢，畀佢望向窗外，我從後攬實佢。
「老公，如果我走咗你會點?」
「冇諗過喎，我只記得應承過你，唔會畀你一個人，就算一分鐘都好，我都會長命過你。」
「老公，出面落雪呀。」
「香港點會落雪? 等我睇過。」
「好靚!」
「唔係雪，係蒲公英呀，不過呢度六樓喎，吹到咁高嘅?」
「老公... 我好幸福... Alan... 我地下世都要做夫妻。」
「老婆，蒲公英嘅花語係停留不了的愛，傳說話好耐以前有個大戶人家，個女叫朝陽...」


嗯? 咁快又瞓咗? 等我仲睇定咁多故仔，不過瞓下都好，發個好夢啦。
我幫佢襟好被，佢嘴角微笑，好開心咁。
咦? 老婆，你側邊部儀器之前有條線彈彈下，依家唔郁，係咪壞咗?
我諗係喇，盞紅燈閃閃下，不過冇聲。
咁都好，靜靜地唔好阻住你瞓，靜到冷氣聲都聽唔到，醫院真係體貼。
啱喇，較暗啲光，慢慢暗，唔好太快，唔係我老婆會驚架。
暗到睇唔到野囉，不過我仲見到你，老婆，想等埋我一齊瞓? 好啦，其實我都攰，一齊瞓...
老婆... 我好幸福... Joyce... 我地下世都要做夫妻。

<< 全文完 >>