[深夜重口味] 黑色蒲公英: 去你要去嘅地方，愛你要愛嘅人

話說我用盡方法避免重蹈 Joyce 前夫嘅覆轍，點知遇上嚴重車禍...

呢度邊度? 咩都睇唔到，全身冇晒知覺，發生咩事?
阿邦，你做咁多野係咪怕死?
我唔怕死，不過如果我都死埋，Joyce 會一世走唔出陰影，佢會孤獨一生。
我唔想佢自責，唔想佢難過。
阿邦，我都唔想你自責，唔想你難過。
你係... Rebecca?
對唔住，Rebecca，如果我當時嚮你身邊你就唔使死，對唔住。
阿邦，如果我當時冇死，我依家會點?


我會一直照顧你，雖然我愛嘅係 Joyce，我一樣會畀到幸福你。
阿邦，記唔記得我地嘅第一晚?
你好溫柔，我好舒服，我知你心入面只有 Joyce，不過你冇當我係佢，我感覺得出你對我嘅憐愛。
阿邦，記唔記得果次我講有咗 BB? 
你冇嬲，你攬住我叫我留住 BB，你唔係只為責任先向我求婚，我知你心入面雖然掛住 Joyce，不過同時感覺到你為我著想。
阿邦，記唔記得我地幾時嗌過交?
其實一次都冇，你時常寵我，永遠就晒我。
雖然我唔係你最愛果個，不過行為上你已經証明咗對我嘅重視。
阿邦，我愛你，但唔等如要你愛我，你知道嗎? 不求回報先係真愛。
Rebecca，原來我...


阿邦，已經足夠喇，去你要去嘅地方，愛你要愛嘅人，好好守護佢地。
Rebecca，原來我愛你!
「醫生，升返喇。」
突然有啲強光射入嚟，但都係睇唔到野。
「先生，支持住。」
身體好奇怪，好似好痛但又感覺唔到。
「幫佢打 10cc...」
跟住我又冇晒知覺。
當我再恢復意識，雙眼好蒙。
「老公!」


係 Joyce?
好想講野，不過要出盡氣力先出到微弱聲音。
「老... 婆...」
慢慢睇得番，見到 Joyce 雙眼好紅。
「老公，你嚇死我喇!」
原來佢喊緊，而且好憔悴。
「一早話... 冇事啦...」
我想幫佢抹眼淚，但郁唔到。
「老婆... 我唔畀你喊... 應承你... 唔會早過你... 就算一分鐘... 都會長命過你... 好唔好?」
「老公，多謝你。」
「仲有... 欣欣英文名... 可唔可以... 叫 Rebecca?」

<< 未完待續 >>

P.S. 今集 Alan 尾二果句對白係啟發自經典漫畫『相聚一刻』，唔係我作嘅，特此聲明。