[深夜重口味] 黑色蒲公英: 我地好耐冇見

話說我寢食難安，終於捱到舞會當晚...

「Sarah，行快啲啦!」
我邊行邊收好隻結婚介指。
「條裙咁窄點快呀? 你 J 痕咪自己入去先囉。」
我拋低佢衝入場。
Joyce 呢? 佢嚮邊?
會場好多人，但見唔到佢。
「頭先有冇見到愛家建個張太?」
講緊 Joyce?


「真人靚好多喎。」
「唔好意思，請問你地講嘅張太嚮邊?」
「佢應該嚮舞池。」
我馬上衝過去。
咁多人嘅? 死開啦!
Joyce 呢?
終於，嚮人罅之中我見到佢。
「Excuse me.」
點知未埋到去，有人捷足先登，跟住音樂響起。
我望住冇幾遠嘅 Joyce，心入面異常激動。


終於見番你喇，你知唔知我等得幾痛苦?
身邊男女開始起舞，我一個人企嚮度特別礙眼。
「Alan，你係咪跳舞?」
「Sarah?」
於是我同 Sarah 跳，不過一直望住 Joyce，其實其他人都一樣望住佢，因為佢實在太靚。
火紅色晚裝同雪白肌膚係絕配，low cut 剪裁透視完美胸形，薄紗長裙令一對長腿若隱若現，加上迷人舞步，簡直仙氣迫人。
「Alan，你又話自己舞皇嘅? 點解成日踩到我架?」
我唔理佢，只想快啲去 Joyce 身邊，可惜三番四次被人截糊。
見到我啦，佢對我微笑!
唔理咁多，我掉低 Sarah 企埋去等音樂完。


終於，佢個舞伴不情不願地行開。
「Alan，我地好耐冇見。」
等到喇! 等到喇!
苦等十年，我終於等到你喇!
「你大個咗，成熟咗好多喎。」
我強忍淚水，迫自己開口。
「Joyce，我好掛住你，你去咗邊?」
「呢啲遲啲先講，係咪想請我跳舞?」
我左手提起佢右手，右手扶住佢肩背，挺起胸膛，帶佢起舞。
我地雙眼冇離開過對方半秒，身體跟隨韻律旋轉，舞步配合得天依無縫。
「Joyce，我...」
「我地享受埋隻舞先，好唔好?」
呢一刻係我人生最興奮嘅時刻，亦係最難受嘅時候。
希望音樂永遠唔會完，不過現實往往最殘酷，最後我地停低。
「多謝你，Alan。」


呢個時候有個肥佬行埋嚟。
「我來介紹，他是我的丈夫，張虹虹。」

<< 未完待續 >>