一場公司飯局，我們的命運從此改寫: 第二章：警察問話
(第二章：警察問話)
「咦，樂仔今朝無返工嘅？」
「Happy Friday無端端走左去，打佢電話又唔聽，Whatsapp又唔online……」
「樂仔今次搞咩呀，佢不留做嘢都好有交帶個喎。」
星期一早上，樂仔無返工。佢無請假，打電話無人聽，Whatsapp既最後上線時間仍然維持喺上星期五既夜晚。
大家都擔心樂仔既安全，唔知佢會唔會出左咩事。
「你估……會唔會係比南亞人擄左去呢？」Michelle估估下咁話。
「唔會掛，又唔係深水埗……」我就唔係好同意。
「車～旺角咪就喺深水埗隔離囉！」
「嘩，乜你哋咁好想像力嘅，」Felix走左過黎搭訕。「不如再誇d啦，話佢比外星人擄走左！話唔定維港上空依家有部UFO飛緊，飛左過去大帽山嗰邊添呀！」
「我哋依d唔係叫想像力，係叫推理能力，」Michelle駁番佢嘴。「你嗰d講UFO先至係想像力囉！」
此時郭Sir由房走左出黎，同Felix講：「今日樂仔無返，咁上星期樂仔簽成嗰個大客邊個跟呀？」
「哦～我有follow呀，」Felix說。「依個客咁出名，我都想見下佢，之前我都有買佢既股票，雖然蝕左少少……」
「下，你有買佢隻股架？我淨係幫襯過佢個網站乍。」
「無買佢隻股係好事，我之前買左，依家都未返到家鄉……」
眾人有講有笑，如常進行一天的工作，跟單既跟單，call客既call客。
一陣腳步聲。忽然有幾個人走左入黎，兩男一女。我認得行頭既女人，係General Admin既同事。
「你好，請問郭Sir喺度嗎？」女人說。
Michelle幫手叫左郭Sir出黎，女人繼續說：「依兩位係警察，話有d事想向郭Sir查詢……」
大家聽到警察二字，都十分驚訝，尤其係郭Sir聽到話要查自己，頓時嚇得有點失色。
但郭Sir畢竟係一個冷靜既人，而且應該係清者自清，所以好快就回復鎮定。
「兩位阿Sir，請問有咩事？」郭Sir問。
「你係咪羅永樂既上司？」
「係。」
「羅永樂既家人報左警，話佢由上星期五晚開始一直無返過屋企，嘗試用電話同手機軟件聯絡都無回覆，至今已經失聯超過四十八小時。」
「我哋問過你哋公司，知道羅永樂今朝都無返工。根據我哋既資料，佢最後出現既時間，好可能係同同事上個禮拜五食晚飯，請問當晚你有無出席？」
「有呀，我哋在座幾位都有出席，總共五位。」
「咁我哋要向閣下五位問一問話，希望你哋可以合作協助調查。」
「咁不如我哋入會議室傾好嗎？」
「好。」
我哋進入會議室，分別在長方形檯的兩邊坐好。兩位警員坐在主席位置，開始向我哋問話。
「郭先生，你可唔可以講下當晚食飯係點樣，同埋你哋最後係喺咩情況之下見到羅永樂？」
「上星期五係我哋Happy Friday既定期聚會，我哋條team有七個人，出席既有六個，分別係我、阿樂仔、Felix、Karson、TT同埋Michelle。」
郭Sir續道。
「我哋喺瓊華中心牛昇食飯，跟住阿樂仔坐坐下，無端端就話要去接個電話，於是就出左去，之後就無再返入黎，佢成餐飯都無食到。」
「佢出去嗰陣係幾點？」
「Sorry，我無咩印象。」
「係七點九之前既，」Felix插口道。「我哋嗰晚book左六點九食飯，但d食物好耐都未黎，於是嗰一刻我望下隻錶，心諗：『成搭九個字都未到。』嗰陣樂仔已經離開左一段時間。」
「即係六點九至七點九之間？」
「七點至七點……七個字之間，係咁上下。」
「咁佢離開嗰陣有無咩異樣，或者有無提過係邊一個打比佢？」
沉默。
「我希望你哋明白，任何細微既事項，都有機會成為我哋重要既線索，所以如果你哋留意到咩小事，都可以同我哋講。」
在樂仔接電話那一刻，我瞥見他皺一皺眉，似乎十分心緒不靈，但我應唔應該向警察講？
我的答案是NO，因為這點根本沒有內容，不成線索，又或者可能只係我睇錯左。
「你哋咁多位當中，邊位同羅永樂最close架？」
大家都無回應警察既問題。我哋同樂仔份屬同事，但平日交談流於表面，雖然相處融洽，但其實無咩深交。
「樂仔加入左我哋公司只有一年左右，我哋份屬同事，但其實都未有咩深交，至少我自問無。」我帶頭回答警察的問題。
「咁其他人呢？」
眾人均搖搖頭。「我哋都係一樣啦。」Felix說。
「咁你哋有無嘗試聯絡羅永樂？」
「有，星期五嗰晚，同埋今朝都有。」郭Sir說。「Michelle，係咪你嘗試聯絡阿樂仔架？」
「係呀，」Michelle說。「我星期五晚打過比佢兩三次，今朝亦都打過比佢兩次，全部都無人聽，試過飛左去電話留言。」
「我星期五晚都打過一次，」Felix說。「另外，我哋team人自己有一個Whatsapp群組，我哋曾經在群組嘗試搵過樂仔，但佢無回覆。」
「你哋係咪都係打佢既手提電話9773XXXX？」
「係呀。」Felix和Michelle異口齊聲地說。
「咁點解你哋無再搵佢？」
「無話點解個喎……」Felix說。「搵唔到就係搵唔到架啦，又或者佢有緊要嘢做，咁你都無理由keep住打比人個喎。」
「咁其他人呢，有無繼續嘗試聯絡羅先生？」
眾人搖頭。
警察又問郭Sir有無其他方法可以聯絡羅永樂，郭Sir說不知道。
「依位先生有無嘢講？」
「無呀，阿Sir，我同羅永樂唔係好熟架乍。」TT耍晒手擰晒頭咁話。
「Okay，如果羅永樂有搵你哋，或者你哋諗到任何嘢，係可能幫助到我哋搵返羅永樂，都希望你哋主動同警方聯絡。」
(第二章完)